APOSEL MO MEY
Aposel mo mey Luk hiy ma mey hiy non
Meyamey uwr hokwe: Luk.
Yier hiy ma lwayr meyamey hokwe: Hiykwe yier perey lwak non po meyamey pak e, nonkway lopa.
Enekwei hiy ma meyamey hokwe: Hiykwe enekwei Yia 65-70 so ompok sok meyamey, Jisas hiy ma lokrue so meyki.
Ok mamey mon ma lwak mokwe senkin: Mamey Aposel kokwe Luk hiykwe mamey Luk ke ma nak-meyamey saronay nok, senkin mesair kow e, mey Jisas hiy ki erey ma meio pie hokwe, hiykwe enekwei enkin kokwe hyo sios ko kueir nonaw ma-meio. Mamey okukwe peyr aposel me God so krai hiy ma wanohyay, sa hom God so ok ke ma mesor, sawk 3000 uwrsa me enekwei kamon-aw sok ma huonokyaw prosue, sehe lohruw-a pie. Sohiy so meyki hokwe sios Jerusalem ko mo liwak yor o, God so ok ke Samaria mon ma mesor nok o, aposel Pita so weynpaweyn o, seyr low senkin senkin nan-kiykiy-ay uwrsa mo owh mon ma lousne o, seme lohruw-a. Wo, ok kraiar mokwe sawk aposel Pol so mey hiy ma lanio meio nok, hiy enekwei krompri, yier iwon God so ok-ihey ke ma ley mesor ke lohruw-a, uwrkayn irweyk mo kipay mon. Aposel Pol so mey krompri-ar mokwe, Luk hiykwe ok ipey-ar eyn kornak-ohruw-a sopay sopay. Ok pariawey kokwe, aposel Pol hiy yier Rom mon ma ley se lohruw-a, suw mamey ke ma meyamey kane kawk limon hok non. Hyo mamey mon kokwe Luk hiykwe Pol se ma preisia kow ha o, mey har hiy ma lanio meio nok o, hye ma nekie sakawk o, hyo lokrue o, somokwe nak-meyamey pa.
Luk so uron ko hokwe senkin: Mamey Aposel kokwe sokwe meyamey, God so ok-ihey ke ma mesor nona nona nok ke mesair kow e. God so ok-ihey kokwe Jerusalem mon o, Juda mo kipay mon o, serey-aw liy lwak ley. Sawk, God so ok-ihey, Jerusalem ko kokwe Samaria mon ley, sei, sohiy so meyki hokwe kipay lowpwarowp mon nakey neyney. Niohney Pekneyweys hiykwe uwrsa mo uron mon meio, sa God so ok-ihey kokwe kipay lowpwarowp mon sokwe nakey.
1
Jisas hiykwe niohney pekney-weys se me-ha e me-loray
1 Uwr ipey-ar Tiofilus ara, hano mamey peyr-mawk ko, paraw ha ma meyamey kokwe, hakwe mey Jisas hiy ma meio o, seyr ok hiy ma hiy-mon sorasor o, somokwe lowpwarowp po meyamey, enekwei Jisas hiy mey seme ma meio pie, * Luk 1:3 2 senkin-awaw, hye nonkumey mon nuw-huonok ie. Enekwei sohokwe, hiykwe peyr Niohney Pekneyweys so kueir nonaw aposel hiy ma liaup me hiy-me-sorasor ok me kow hain. 3 Jisas hiy ma lokrue so meyki hokwe, hiykwe ma-loksian nok, aposel mo owh mon lousne. Sa ki mon kokwe eypok 40, sankaw ma-lwayr hain, seyr God so Wayr-hre-yier se lohruw-a kow. Hiykwe aposel me kokwe meir poya poya krai non me seme meio mesair kow, hom hiy inaw ma lwak se nuw-nonkway popriy e. 4 Enekwei kamon hokwe hiykwe hyo aposel me nion ayay non-hokruw-a menkin, hiykwe ok ipey-ar senkin me-kow hain, “Homkwe Jerusalem se peie lokriy hain o, peyr homkwe hano Aio so me-loray-ok, ha hme ma mekow nonkway ke kwa naruok. * Luk 24:49 5 Payhokuaw, paraw kokwe Jon hiykwe uwrsa me hu mon prouk. Sawk eypok har mo meyki hokwe, hme kokwe Niohney Pekneyweys non prouk ey.” * Mat 3:11; Mak 1:8; Luk 3:16
Jisas se nonkumey mon ma huonok ie hiy non
(Mak 16:19-20; Luk 24:50-53)
6 Enekwei aposel hom Jisas se nion non-hokruw menkin, homkwe hye senkin mesopok, “Hakamay, pokon enekwei ohokwe hunkwe hromo yier Israel, hiy king ipey-ar non ma-lwak e pankaw mon ousne a?” * Luk 24:21
7 Sa Jisas hiykwe hme senkin mekow, “Yor omok ko sohom mo eypok o, enekwei o, hano Aio hiy hyo krai arian non ma me-iaup hokwe, hom nonkway ey korey. * Mak 13:32 8 Sawk homkwe krai ya lonok a, enekwei Niohney Pekneyweys hiy hme ma ka-wanohyay sowkriy non, seyr hom, hane me-kumay-uwr ma lwak omokwe, homkwe Jerusalem mon o, Judia mon o, kipay Samaria mon o. seyr uwrsa ki ohiy so limon mon ma lwayr o, serey kwa lanio mesor nok.” * Mat 28:19; Luk 24:48
9 Hiy ok seme ma lohruw-a lowpway so meyki hokwe, hye kokwe sawk nonkumey mon ma-huonok ie, hmo inour ko se. Hiy ma nonay nonay ie hokwe, sa waw kamon hok swakuwmay lowm-a-lowm, homkwe sa hye ma-lira pa sehe lwak.
10 Hom waw, Jisas hiy ma lie serey-aw lira saiarokay popriy nonaw, sawk uwr prueysyar omeme weyspey me-aw ma lie hohkwe sa hme nion po amsaw-orok okin peykyay. 11 Uwr prueysyar sohokwe aposel me senkin mekow, “Galili uwr om, homkwe nonkumey mon puraw panoke ar-orok ira o? Uwr Jisas sohokwe, God hiykiaw nonkumey mon po makiy-huonok ie. Seyr hiy ma-le enekwei hokwe, liy-liy-aw ma-laye ey, hom ma lira ha senkin.” * Mat 26:64; Luk 21:27
Matias se ma liaup hiy non, Judas so siopsow meio e
12 Aposel homkwe mnuw Oliv se lokriy hain nok, Jerusalem mon ma-ley. Mnuw Oliv sohokwe Jerusalem so ohriar eyn lwak. Yerki sohokwe kilomita kamon-aw. * Luk 24:50-53 13 Hom Jerusalem mon lyawriy nok, a-ampok ayaw ko homkiaw ma lwak nyanyaw mon ma-lie. Uwr a-ampok serey ma lwayr mo uru mokwe, Pita, Jon, Jems, Andru, Filip, Tomas, Bartolomyu, Matyu, Jems, hiykwe Alfius so ney, seyr Saimon, hiykwe Selot mo uwrku ko, seyr Judas, Jems so ney. * Mat 10:2-4 14 Uwr lowpwarowp somokwe, uron kamon-awaw nuw-wak. Homkwe God se-aw hokruw mesopok wayr. Sa har o, Jisas so pouh Maria o, Jisas so nay-ih nayh o, homkwe seyr siraw-aw non-hokruw mesopok.
15 Enekwei sohiy non kokwe uwrsa Jisas se ma nan kiykiy-ay mokwe, sankaw hokruw konpakon, 120. Sa Pita hiy hmo ompok mon loksian iarok nok, ok enkin mesor kow, 16 “Hano wayh-om, ok kamon God so mamey porih ko, paraw Devit hiy Niohney Pekney-weys so kueir non ma me hokwe, okar po lousne. Devit hiykwe Judas so yor, aw-uwr me ma hiy-ey, Jisas se nekie owkway nok ey ke po me koruay. * Sng 41:9 17 Mo senkin, ompeys serey-ar kokwe Judas hiykwe hromo nion non-wak. Seyr mey, hrom ma meio okukwe hiykwe siraw non-meio.”
18 (Mein-owon, Judas hiy hyo weynpaweyn piap-araw me ma mon me hokuaw ma lonok omokwe, hiykwe ki kamon so kopi se nakway. Sawk hiykwe ki serey makuayk nok, lokrue. Hyo swaw hokwe lon-kanseyr sow, seyr hyo siowp-owok hom kumay mon lousne sa-ousne. * Mat 27:3-8 19 Uwrsa lowpwarowp Jerusalem ko homkwe ok somokwe papo lonuayk. Sa homkwe ki-kopi sohokwe hmo ok arian non “Akeldama” sehe nakinariy kow. Uru sohiy so meyk hokwe senkin, “nioh-ki.”)
20 Pita hiy kiy-me, “Payhokuaw, ok kamon, paraw Devit hiy ma meyamey, mamey yayh mon ma lwak kokwe, Judas se enkin me,
‘Ki, hiy ma lwak hain hokwe, puraw ka lwak e. Uwr prueyn, sa prueyn, ki serey peie ma-isay meio wayr o.’
Seyr mamey porih ko ok kamon kokwe senkin me,
‘Uwr prueyn hiykwe hyo mey sokwe hyo siopsow ka ma-sahre meio.’ Sng 69:25; 109:8
21-22 Sawk pokon kokwe hromkwe uwr prueyn hromo ompok mon ma lwak, enekwei lowpwarowp Hakamay Jisas hiy hreme nion ma non-anio merie merie, Jon hiy hyo hu mon prouk mey ke ma meio pie o, enekwei Jisas Krais hiy hreme nion ma non-wak se ma huonok ie se ma lira o, sehe me-iaup e. Payhokuaw, uwr sohokwe Krais hiy lokrue ko se ma loksian se, hrome nion non-anio mesor ey.” * Mat 16:19; Mak 1:9; Jon 15:27
23 Sa uwrsa serey ma lwak homkwe uwr prueysyar se nanpanan, mey sokwe meio ey se. Prueyn hokwe Josep, hyekwe Barsabas ok me, seyr hyo uru kamon hokwe Jastus. Prueyn hokwe Matias. 24 Homkwe sa God se senkin sehe mesopok, “Hakamay, hunkwe uwr lowpwarowp mo uron mokwe papo nuw-nonkway liy-ay. Sawk pokon kokwe hunkwe hreme uwr prueysyar so prueyn ehe kwaw kiy-mesair kow, uwr hwon ma me-iaup se. 25 Uwr, hwon ma me-iaup sohokwe, hiykwe aposel-mey ke ka meio, Judas so siopsow. Payhokuaw, Judas hiykwe hreme papo lokriy hain, hiykwe hyo yerki piap arian mon po ley ha.” 26 Sa homkwe satu non sasow onkuwseyn ira,* Aposel homkwe uwr prueysyar so uru hokwe mein nareysyar non sehe mey. Mein kamon hokwe Barsabas so uru se mey, kamon hokwe Matias so uru se mey. Sawk poso mein hiy lokuayk pie e, uwr sohokwe God hiy ma me-iaup hiy non. sawk satu sokukwe Matias so uru mon makuayk. Homkwe hyekwe aposel se hieyn lira memeir, aposel iha seys pruw non me nion ma non-meio ey hokwe.
*1:5: Mat 3:11; Mak 1:8; Luk 3:16
*1:16: Sng 41:9
*1:21-22: Mat 16:19; Mak 1:9; Jon 15:27
*1:26: Aposel homkwe uwr prueysyar so uru hokwe mein nareysyar non sehe mey. Mein kamon hokwe Barsabas so uru se mey, kamon hokwe Matias so uru se mey. Sawk poso mein hiy lokuayk pie e, uwr sohokwe God hiy ma me-iaup hiy non.