1 Neda' Pablo chzoja' cart nga c̱hio' le' Timoteo. Naca' postlw c̱he Jesucriston', ḻe Diosen' len X̱ancho Jesucriston' gosone' mandadw chona' xšinen'. Dios nan' noṉe' chio' yeḻa' mban toḻi tocaṉe na' X̱ancho Jesucriston' chone' cont zoacho lez šjayzoacho len ḻe' toḻi tocaṉe. 2 Chzoja' le' Timoteo, ḻe naco' ca dogualje xi'iṉa' da' bzejni'ida' le' cont chejnilažo' Criston'. Na' chṉablaža' ṉita' X̱acho Diosen' len X̱ancho Jesucriston' yesyeyaše' yesyeži'ilaže'de' le' na' yesaclene' le', na' yesone' cont soa cuezo' binḻo len xbab da' yo'o ḻo' yic̱hjlažda'oguon'.

3-4 Caten' gwza'a Efeson' gwya'a Macedonian' gwṉeyoeda' le' cont bega'aṉo' Efeson' ṉec̱he nita' baḻ beṉe' chosozejni'ide' beṉe' Efeso ca' diža' güenḻaže'. Con bi cheyož yedo chesonchgüe' xbab c̱he diaža c̱he da' x̱ozxta'ocho ca' na' cheso'e zan cuent c̱he ḻegaque'. Na' da' yoble chṉeyoeda' le' gono' mandadw bich yosozejni'ide' c̱he da' ca'. Dan' chosozejni'ide' chonen ga yesacžejlaže' beṉe', na' bi chaclenen yesone' dan' gwlo'o Diosen' ḻo na'cho gon chio' ba chejḻe'cho xtižen'.

5 Na' gono' mandadw yesone' güen, ḻe chaclaža' yesenite' yesaque ḻježe'. Na' cont bibi gwžon yesaque ḻježe', cheyaḻa' yesaque' beṉe' laždao' xilaže', cheyaḻa' yesone' dan' ṉezecho naquen güen yogo' ṉi'a, na' cheyaḻa' yesejḻi'e diža' ḻi c̱he Diosen' do yic̱hj do laže'. 6 Beṉe' ca' chosozejni'ide' diža' güenḻaže' bi chesone' ca', na' da'nan' cheso'e diža' da' bibi zaca'. 7 Ḻa'czḻa' chesaclaže' yosozejni'ide' ley dan' bzoj Moisésen', bi chesejni'ide' dižan' cheso'e na' ṉeca chesejni'ide' da' ca' chesene' cheyaḻa' goncho.

8 Ṉezecho ley nan' naquen güen con še gwc̱hinchon can' cheyaḻa' gwc̱hinchon. 9 Na' ḻecze ṉezecho ley nan' gague chosbagan' beṉe' cheson da' güen, san chosbagan' beṉe' cheson da' mal na' beṉe' cheson güedenag len dan' nonen mandadw goncho. Chosbagan' beṉe' bi chosozenag c̱he Diosen', na' beṉe' chesonteze' da' malen', na' beṉe' bi chesape' Diosen' bala'aṉ ṉeca chesonxene'ne', na' beṉe' chesot no x̱axṉa'gaque', na' len nochle beṉe' güet beṉe'. 10 Ḻecze chosbagan' beṉe' chesata'lene' no'ole bi nac xo'olgaque' o beṉe' byo bi nac beṉe' c̱hegaque', na' no beṉe' byo beṉe' chesata'lenteze' ḻjež beṉe' byoe' gualaz no'ole, na' beṉe' chesec̱he'x̱ox̱je' beṉe' yoble cont chesote' ḻegaque' chesezi'e mechw, na' beṉe' ca' chesonḻaže', na' beṉe' ca' cheso'e diža' güenḻaže' lao justis, na' note'teze beṉe' cheson da' zej clele len diža' güen da' ba bzejni'i Diosen' chio'. 11 Na' diža' güen da' ba bzejni'i Diosen' chio' zaca'chguan, na' Dios ben' zoa mba juisyw, ḻe'na' ba gwlo'en ḻo na' chyix̱jue'edan' beṉe'.

12 Choa' yeḻa' chox̱clen c̱he X̱ancho Jesucriston' ben' chon cont chac chyix̱jue'eda' xtiže'na'. Chox̱clenen' chacde' gona' xšinen' can' chazlaže' na' da'nan' gwleje'nda' gonan'. 13 Gwleje' neda' ḻa'czḻa' cana' bia' diža' bya' c̱he' na' bgue'eda'ne' na' bc̱hi bsaca' beṉe' ca' chesonxene' ḻe'. Na' ḻa'czḻa' bena' ca', Diosen' beyaše' beži'ilaže'de' neda', ḻe biṉa' šejnilaža'ne' ca hora' na' biṉa' gacbe'eda' chona' clele. 14 Nach X̱ancho Jesucriston' nži'ilaže'chgüede' neda' na' goclene'nda' cont gwyejnilaža'ne', na' ṉa'a chacda'ne' na' ḻecze chacda' yezica'chle beṉe'.

15 Da' nga naquen to diža' ḻi da' zaca' šejḻe'cho: Jesucriston' bide' yežlio nga cont beque'e xtoḻa' chio' beṉe' güen da' xiṉj. Na' chacda' neda' naca' beṉe' ḻa'zelagüe gwyanch xtoḻa'. 16 Na' ḻa'czḻa' naca' beṉe' ḻa'zelagüe gwyanch xtoḻa', Jesucriston' beyaše'de' neda' na' bezi'xene' c̱hia' cont blo'e napchgüe' yeḻa' chxenḻaže'. Bene' ca' cont beṉe' za' za'ac yesacbe'ede' nape' yeḻa' chxenḻaže' xen na' yesejnilaže'ne' na' gata' yeḻa' mban c̱hegaque' toḻi tocaṉe. 17 Cheyaḻa' gonxencho Diosen' ben' nac Rey c̱hechon' toḻi tocaṉe. Gague da' te c̱hen'. Zoacze' ḻa'czḻa' bi chle'echone' na' naque' ḻa'zelagüe beṉe' sina'. Totc ḻe' zaque' gonxencho na' gapchone' bala'aṉ toḻi tocaṉe. Na' can' gonšcaczcho.

18 Xi'iṉa' Timoteo, ben xbab c̱he dižan' gosoe' beṉe' ca' bosozende' le' can' gwna Diosen' c̱hio' cana'. Na' can' ba gose'e le' gono' xšin Diosen', ḻecze can' chṉeyoeda' le' gonon' do yic̱hj do lažo', ḻa'czḻa' še gacdo' zdebe gonon'. Soac̱hac̱ho' šejnilažo' Diosen', na' soatezo' gono' cont ṉezdo' ḻo' laždaguo' bibi da' mal chono'. 19 Baḻ beṉe' chesonteze' da' malen' ḻa'czḻa' zjaṉeztede' ḻo' lažda'ogüe' bi cheyaḻa' yesonen', na' da'nan' ba gosebejyic̱hje' bich chesejnilaže' Diosen'. 20 Can' goc c̱he Himeneo na' c̱he Alejandro. Da'nan' ba gwṉabda' Diosen' yesaque' ḻo na' Satanás dan' chnabia' da' x̱igüe' ca', na' gonen con ca chaclažen' len ḻegaque' cont yesacbe'ede' bi cheyaḻa' yeseṉeye'e c̱he Diosen'.