1 Bi cheyaḻa' goncho xbab Diosen' bechojlaže' nación Israel c̱heto' to ši'ize. Neda' naca' beṉe' Israel, golja' ḻo diaža c̱he da' Abraham na' naca' diaža' c̱he da' Benjamín. 2 Biṉa' yechojlaže' Diosen' neto' nacto' diaža c̱he ben' gože' Israel, ḻe gwleje' neto' cani'te cont nacto' nación c̱he'. Ḻe gon xbab can' nyoj dan' gwna Elías ben' be' xtiža' Diosen' cani', gwdagüe' xya c̱he da' x̱ozxta'oto' ca', gože' Diosen': 3 “X̱ana', beṉe' gualaž c̱hia' quinga ba gosote' beṉe' ca' goso'e xtižon', na' ba bosyoc̱hiṉje' mes de yej ca' gan' cheyaḻa' yesonxene' le'. Yetoga neda' zoa' chzenaga' c̱hio' na' lencze neda' chese'nde' yesote'.” 4 Nach Diosen' boži'e xtižen' gože'ne': “Ṉe' nita' gaže mil beṉe' ba gwleja' beṉe' biṉa' yosozoa xibe' yesonxene' ḻ gua'a ḻsaca' dan' nzi' Baal.” 5 Na' ca'cze naquen ža ṉa'aža, neto' beṉe' Israel chejnilaže'to' Criston' bi nacto' beṉe' zan, perw Diosen' ba gwleje' neto' cont chonxento'ne', ḻe nži'ilaže'de' neto'. 6 Diosen' gwleje' neto' cont chonxento'ne' da' nži'ilaže'de' neto'. Bi gwleje' neto' lagüe' da' nonto' bi da' güen. Šaca' gwleje' neto' lagüe' da' nonto' bi da' güen, bi naquen con to goclen da' choṉ Diosen' neto' ḻo yeḻa' beṉe' šagüe' c̱he' cate' chbeje' neto' še ca', san naquen to goclenze.

7 Zan beṉe' nación Israel c̱heton', ḻa'czḻa' chesonchgüe' da' chesacde' cheyaḻa' yesone', bi chesyeželde' naclen' yesone' cont yesaque' beṉe' güen len Diosen'. Perw Diosen' gwleje' baḻto' cont šejnilaže'to'ne' na' none' neto' ca to beṉe' güen. Na' beṉe' yezica'chle zjanaque' güedenag len Diosen'. 8 Chac c̱hegaque' can' nyoj Xtiža' Diosen' žan: “Diosen' bene' cont zjanaque' ca beṉe' bicze nte. Na' ža ṉa'aža zjanaque' ca to beṉe' bi chle'e len yejlagüen', na' ca to beṉe' bi chene len naguen'.” 9 Na' da' Davin' gwne' c̱hegaque':

11 Ṉezeczecho zan beṉe' Israel gualaž c̱heton' bi chesejnilaže' Criston'. Na' chṉaba', ¿zjanaque' ca beṉe' gwyo'o yeja' ṉi'e? ¿še zjanaque' ca beṉe' gwbix̱e' na' gote'? Zjanaque' ca to beṉe' con gwyo'o yeja' ṉi'e na'ze. Da' bi chesejḻe'e c̱he Criston' de latje cont le'e bi nacle beṉe' Israel chzenagle xtižen'. Da'nan' ḻegaque' gwžin ža yesezelaže' gon Diosen' güen len ḻegaque' ca ba chone' len le'e bi nacle beṉe' Israel. 12 Da' yoble chnia', da' bi chesejnilaže' beṉe' gualaž c̱heto' ca' Criston', chac ca' cont yezica'chle beṉe' že' yežlion' yesenite' mba con še yesejnilaže'ne'. Na' da' bchoj nación Israel c̱heton' ḻo na' Diosen', de latje cont le'e bi nacle beṉe' Israel soale mba ḻo na' Diosen'. Perw gwžin ža cate' yogo'te beṉe' gualaž c̱heto' yesenite' yesejnilaže' Diosen', na' cana'ch gac mba juisyw.

13 Na' le'e bi nacle beṉe' Israel, che'nda' ṉezele Diosen' gwseḻe' neda' cont güe'lena' le'e xtižen' le'e bi nacle beṉe' Israel. Na' chona' con ga zelao chzaque'da' cont beṉe' yosozenague' c̱he Diosen'. 14 Ḻe chaclaža' gona' cont beṉe' gualaž c̱hia' ca' yesezelaže' gon Diosen' güen len ḻegaque' can' chone' len le'e chejnilaže'lene', na' gata' yeḻa' mban c̱hegaque' toḻi tocaṉe. 15 Diosen' ba bnite' zan beṉe' Israel gualaž c̱heton' ca'ale to tiemp cont le'e bi nacle beṉe' Israel gwbiga'le len ḻe'. Na' gwžin ža cate' gon Diosen' yesyebiga' yezan beṉe' gualaž c̱heto' len ḻe'. Na' ḻeca mba gac cate' yesyebigue' len Diosen'. 16 De costumbr c̱he neto' nacto' beṉe' Israel cate' chonto' yetextil, na' chnežjwto' Diosen' to bḻoḻ dao' cuazin' cont chlo'eto'ne' doxenen naquen c̱he'. Na' ḻecze še ṉacho to loe yaguen' naquen c̱he Diosen', zejen ḻecze xoze' yaguen' naquen c̱he'. Na' da' x̱ozxta'oto' ca' ben' gosejnilaže' Diosen' cani' zjazaca'lebde' ca bḻoḻ dao' cuazina' na' ca' loe yaguen'.

17 Nación Israel c̱heton' zaca'leben ca xoze' yag da' ba nc̱hog x̱an yaga' to lao yag olivo güen na' ba bniten' šḻa'ale. Na' le'e bi nacle beṉe' Israel zaca'leble ca xoze' yag olivo da' ze do yix̱e', da' ba gwc̱hogue' lagüen na' ba bozoen' yag güen cont beyaquen toze. Nach guac ṉacho loe yag güenṉa' ba nox̱en' le'e na' niže' c̱henṉa' chac banḻenḻe. 18 Bi gaquele naquechle beṉe' güen ca beṉe' Israel gualaž c̱heto' da' chac c̱hele ca'. Gague le'e chnežjwle yeḻa' mban c̱he loe yaguen', san loe yaguen' choṉen le'e yeḻa' mban.

19 Le'e bi nacle beṉe' Israel, šeca che'ḻja ḻježle: “Diosen' bene' beṉe' Israel ca yag da' gwc̱hogue' xozen' cont goc bozoe' chio' gualaz ḻegaque'.” 20 Da' ḻi can' žalen'. Perw da' bi gosejnilaže' Criston', Diosen' bene' len ḻegaque' ca xoze' yag da' ba gwc̱hog x̱an yaguen' ḻen, na' ba bozoe' le'e lagüe da' chejnilaže'le Criston'. Da'nan' bi ga'laže'le, san ḻe gwsaca' cont soac̱hac̱hle šejnilaže'lene'. 21 Da' bi gosejnilaže' Criston', Diosen' bene' cont gwdi gwxaca' beṉe' Israel gualaž c̱heto' ca' beṉe' zjazaca'lebe' ca xoze' yag güenṉa', na' ḻecze ca' gone' saca'zi'le še bi soac̱hac̱hle šejnilaže'lene'. 22 Ḻe gonšc xbab can' nži'ilaže' Diosen' chio' chejnilaže'chone' na' can' chone' cont saca'zi' beṉe' ca' bi chesejnilaže'ne'. Nachen' cheyaḻa' soac̱hac̱hle šejnilaže'lene' cont bi gone' saca'zi'le can' ba bene' len beṉe' Israel gualaž c̱heton' bi gosejnilaže'ne'. 23 Na' Diosen' yebede' si' ḻo ne'e beṉe' Israel gualaž c̱heto' ca' cate' yesejnilaže'ne', ḻe nape' yeḻa' guac cont yozoe' ḻegaque' binḻo len ḻe', nach yesaque' ca xoze' yag da' bezyone' toze len yag c̱hen da' yoble. 24 Le'e nacle ca xoze' yag olivo da' ze yix̱e', Diosen' gwc̱hogue' le'e na' bozoe' le'e ḻo xoze' yag güen ḻa'czḻa' bi nacle dogualje xozen'. Na' naquechxe yebede' yozoe' beṉe' Israel gualaž c̱heto' ca' ḻe'e yaguen' da' yoble beṉe' ca' zjazaca'lebe' ca dogualje xoze' yaguen'.

25 Beṉe' migw, che'nda' šejni'ile da' nga da' nono ṉa' ṉeze cont bi ga'laže'le gaquele zaca'chle clel ca beṉe' Israel gualaž c̱heto' ca'. Diosen' be'e latje zane' zjanaque' beṉe' güedenag len xtižen' šlac yesejnilaže' beṉe' bi zjanaque' beṉe' Israel ben' ba bsi'e xṉeze yesejnilaže'ne'. 26 Nach gwžin ža yogo' beṉe' Israel gualaž c̱heto' ca' yesenita' yesaque' ḻo na' Diosen'. Gac can' nyoj Xtiža' Diosen' žan:

28 Dan' bi chesejḻe' zan beṉe' Israel gualaž c̱heton' diža' güen c̱he Diosen', da'nan' ba bzoe' šḻa'ale nación c̱heton' na' ba gwleje' le'e bi nacle beṉe' Israel cont chejḻe'le c̱he'. Perw na' Diosen' ṉe' chacde' beṉe' ca', ḻe gwleje' da' x̱ozxta'oto' ca' cont yesaque' nación c̱he'. 29 Na' Diosen' bi chetiṉjde' c̱he beṉe' mbeje' yesaque' nación c̱he', ṉeca chetiṉjde' c̱he goclen da' chone' len beṉac̱hen'. 30 Cana'te le'e bi bzenagle c̱he Diosen' na' da' bi gosaclaže' beṉe' Israel gualaž c̱heton' yosozenague' c̱he', nach beyaše'laže' Diosen' le'e na' goclene' le'e cont chzenagle c̱he'. 31 Na' da' bi chosozenag beṉe' Israel gualaž c̱heto' ca' c̱he Diosen' ṉa'a, chac ca' cont žin ža gwlo'e Diosen' ṉe' cheyaše'laže'de' ḻegaque' can' cheyaše'laže'de' le'e. 32 Diosen' ba gwc̱hoglagüe' c̱he yogo' beṉac̱hen' de xtoḻa'gaque' da' bi chosozenague' c̱he', na' ba bene' ca' cont ḻecze gwlo'ede' cheyaše'laže'de' yogo'cze'.

33 Ḻeca beṉe' sina' Diosen'. Ṉezczede' yogo'ḻoḻ. Gwbat šejni'icho da' nžie' bia' gac o da' nžie' bia' gone' ḻo yeḻa' sina' c̱he'. 34 Nyoj Xtižen' žan: “Nono ṉeze yogo' xbab c̱he X̱ancho Diosen'; nono nape yeḻa' sina' cont gwzejni'ide' ḻe' can' cheyaḻa' gonen'. 35 Na' nono cheyaḻa' gon xbab yebi'i Diosen' güen len ḻe' še bi da' ba be'ene'.” 36 Yogo'ḻoḻ da' de naquen c̱he Dios. Bene' beṉac̱h, beyix̱e' na' bica'chle da' zjade. Na' lagüe yogo'ḻoḻ da' bene' zoe' blao. Ḻen' gacxene' toḻi tocaṉe. Can' gacšca.