7
1 I oghlum, sözlirimge emel qil,
Tapshuruqlirimni yürikingde saqla.
2 Tapshuruqlirimgha emel qilsang, yashnaysen;
Telimlirimni köz qarichuqungni asrighandek asra.■ Law. 18:5; Pend. 4:4
3 Ularni barmaqliringgha téngip qoy,
Qelb taxtanggha yéziwal.■ Qan. 6:8; 11:18
4 Danaliqni, sen hede-singlim, dégin,
Pem-parasetni «tughqinim» dep chaqir.
5 Shundaq qilsang, ular séni yat xotundin yiraqlashturidu,
Aghzidin siliq söz chiqidighan yochun ayaldin néri qilidu.■ Pend. 5:3
Buzuq xotun
6 Bir qétim öyning dérize köznekliridin tashqirigha qarighinimda,
7 Birnechche yash, sadda yigitlerni kördüm,
Ularning ichidin bir eqilsizni körüp qaldim,
8 U kocha boylap buzuq xotun turushluq doqmushtin ötüp,
Andin uning öyi terepke qarap mangdi.
9 Kechqurun qarangghu chüshkende,
Zulmet kéche, ay qarangghusida ishiki aldidin ötti.
10 Mana, öydin bir xotun chiqip uni kütüwaldi;
Kiyimi pahishe ayallarningkidek bolup,
Niyiti hiyle-mikir idi.
11 Aghzi bishem-hayasiz, nahayiti jahil bir xotun,
U öyide turmaydu,■ Pend. 9:13
12 Birde mehellide, birde meydanlarda,
U kochilardiki her doqmushta paylap yüridu.
13 Héliqi yash yigitni tartip, uni söyüp,
Nomussizlarche uninggha: —
14 «Öyümde «inaqliq qurbanliqi» göshi bar,
15 Shunga men sizni chaqirghili chiqtim,
Didaringizgha telpünüp izdidim.
Emdi sizni tépiwaldim!
16 Karwitimgha Misirning keshtilik, yolluq libas yapquchlirini yaptim.
17 Orun-körpilirimge xush puraq murmekki, muetter we qowzaq darchinlarni chachtim.■ Küy. 4:14.
18 Kéling, tang atquche muhebbetlisheyli, oynap huzurlinayli,
Könglimiz qan’ghuche özara eysh-ishret qilayli,
19 Érim öyde yoq, yiraq seperge chiqip ketti.
20 U bir hemyan pul élip ketti,
Ay tolghuche u öyge kelmeydu» — dédi.
21 Ayal köp shérin sözliri bilen rasa qiziqturdi,
Chirayliq gepliri bilen uni esir qiliwaldi.■ Pend. 1:17
22-23 Soyushqa élip mangghan öküzdek,
Hamaqet kishi kishen bilen jazagha mangghandek,
Qiltaqqa chüshken qushtek,
Yigit uning keynidin mangdi.
Jigirini oq téship ötmiguche,
U bu ishning hayatigha zamin bolidighanliqini héch bilmeydu.
24 I oghullirim, sözlirimni köngül qoyup anglanglar,
Dégenlirimge qulaq sélinglar,
25 Qelbinglarni bundaq xotunning yoligha ketküzmenglar,
Uning aldam xaltisigha chüshüp ketmenglar.
26 Bundaq ayal nurghun kishilerni yiqitip yarilandurghan,
Uning boghuzlighan ademliri tolimu köptur,
27 Uning öyi bolsa tehtisaraning kirish éghizidur,
Ademni «halaket méhmanxanisi»gha chüshürüsh yolidur.□ «tehtisara» — ibraniy tilida «shéol», ölüklerning rohliri qiyamet künini kütidighan yer. ■ Pend. 2:18; 5:5
□7:14 «inaqliq qurbanliqi» — Musa peyghemberge tapshurulghan muqeddes qanun békitken bir xil qurbanliq, uning ehmiyiti; (1) Xuda bilen bolghan inaqliqqa érishish üchün; (2) Xudagha alahide rehmet éytish üchün; (3) Xudagha dua bilen qilghan qesimini ipadilesh üchün. Qurbanliqqa kala, qoy yaki öchkimu bolidu. Bu xil qurbanliqning alahidiliki, qurbanliq sun’ghuchi kishi uni qurbanliq qilghandin kéyin, göshidin élip yéyeleydu. Mushu yerde bu ayal: «Men Xuda aldida pak» démekchi bolidu. Bu pütünley saxtipezlik, elwette.
□7:27 «tehtisara» — ibraniy tilida «shéol», ölüklerning rohliri qiyamet künini kütidighan yer.