Muⱪeddes Kalam (yǝngi yeziⱪ) Ⱨekmǝt topliƣuqi 4

Jǝbir-zulumƣa ⱪarax

1 Andin mǝn ⱪaytidin zeⱨnimni yiƣip ⱪuyax astida daim boluwatⱪan barliⱪ zorluⱪ-zumbuluⱪni kɵrdüm; mana, ezilgǝnlǝrning kɵz yaxliri! Ularƣa ⱨeq tǝsǝlli bǝrgüqi yoⱪ idi; ularni ǝzgǝnlǝrning küqlük yɵlǝnqüki bar idi, biraⱪ ezilgǝnlǝrgǝ ⱨeq tǝsǝlli bǝrgüqi yoⱪ idi. □ 2 Xunga mǝn alliⱪaqan ɵlüp kǝtkǝn ɵlgüqilǝrni tehi ⱨayat bolƣan tiriklǝrdin üstün dǝp tǝriplidim; 3 xundaⱪla bu ikki hil kixilǝrdin bǝhtliki tehi apiridǝ bolmiƣan kixidur; qünki u ⱪuyax astida ⱪilinƣan yamanliⱪlarni ⱨeq kɵrüp baⱪmiƣan.

Rǝⱪiblikning bimǝniliki

4 Andin mǝn barliⱪ ǝjir wǝ barliⱪ hizmǝtning utuⱪliridin xuni kɵrüp yǝttimki, u insanning yeⱪinini kɵrǝlmǝslikidin bolidu. Bumu bimǝnilik wǝ Xamalni ⱪoƣliƣandǝk ixtur.

5 Əhmǝⱪ ⱪol ⱪoxturup, ɵz gɵxini yǝydu.■

6 Japa qekip xamalni ⱪoƣlap oqumini toxⱪuzimǝn degǝndin, qanggilini toxⱪuzup hatirjǝmliktǝ bolux ǝladur.□

Aqkɵzlükning türtkisidǝ ixlǝx

7 Mǝn yǝnǝ zeⱨnimni yiƣip, ⱪuyax astidiki bir bimǝnilikni kɵrdum; 8 birsi yalƣuz, tikǝndǝk bolsimu, xundaⱪla nǝ oƣli nǝ aka-ukisi bolmisimu — biraⱪ uning japasining ahiri bolmaydu, uning kɵzi bayliⱪlarƣa toymaydu. U: «Mǝn bundaⱪ japaliⱪ ixlǝp, jenimdin zadi kimgǝ yahxiliⱪ ⱪaldurimǝn?» — degǝnni sorimaydu. Bumu bimǝnilik wǝ eƣir japadin ibarǝttur.□

Ⱨǝmraⱨliⱪ

9 Ikki birdin yahxidur; qünki ikki bolsa ǝmgikidin yahxi in’am alidu. 10 Yiⱪilip kǝtsǝ, birsi ⱨǝmraⱨini yɵlǝp kɵtüridu; biraⱪ yalƣuz ⱨalǝttǝ yiⱪilip kǝtsǝ, yɵligüdǝk baxⱪa birsi yoⱪ bolsa, bu kixining ⱨaliƣa way!

11 Yǝnǝ, ikkisi billǝ yatsa, bir-birini illitidu; lekin birsi yalƣuz yatsa ⱪandaⱪ illitilsun? 12 Yǝnǝ, biraw yalƣuz bir adǝmni yengiwalƣan bolsa, ikkisi uningƣa taⱪabil turalaydu; xuningdǝk üq ⱪat arƣamqa asan üzülmǝs.

Inawǝtning biⱨudiliki

13 Kǝmbǝƣǝl ǝmma aⱪil yigit yǝnǝ nǝsiⱨǝtning ǝtiwarini ⱪilmaydiƣan ⱪeri ǝhmǝⱪ padixaⱨtin yahxidur; 14 Qünki gǝrqǝ u bu padixaⱨning padixaⱨliⱪida kǝmbǝƣǝl bolup tuƣulƣan bolsimu, u zindandin tǝhtkǝ olturuxⱪa qiⱪti.□

15 Mǝn ⱪuyax astidiki barliⱪ tiriklǝrning axu ikkinqini, yǝni padixaⱨning ornini basⱪuqini, xu yigitni ⱪollaydiƣanliⱪini kɵrdum. 16 Barliⱪ hǝlⱪ, yǝni ularning aldida turƣan barliⱪ puⱪralar sanaⱪsiz bolsimu, biraⱪ ulardin keyinkilǝr yigittinmu razi bolmaydu; bumu bimǝnilik wǝ xamalni ⱪoƣliƣandǝk ixtur.□

□4:1 «Ularni ǝzgǝnlǝrning küqlük yɵlǝnqüki bar idi» — baxⱪa birhil tǝrjimisi: «Ularni ǝzgüqilǝr tǝrǝptǝ küq bar idi».

■4:5 Pǝnd. 6:10; 24:33

□4:6 «Japa qekip Xamalni ⱪoƣlap oqumini toxⱪuzimǝn degǝndin, qanggilini toxⱪuzup hatirjǝmliktǝ bolux ǝladur» — 4-ayǝttǝ mǝnpǝǝt-abruy izdǝxning bimǝniliki kɵrsitilidu; 5-ayǝttǝ «Ⱨeqnemǝ ⱪilmaymǝn, paydisi yoⱪ» degǝn ⱨurunluⱪ pozitsiyini ǝyiblǝydu: 6-ayǝttǝ bu ikki yolning otturidiki durus yolni kɵrsitilidu.

□4:8 «Birsi yalƣuz, tikǝndǝk bolsimu, ...» — ibraniy tilida «Birsi yalƣuz, ikkinqisi (ikkinqi adǝm) yoⱪ bolƣan ⱨalda bolsimu,...». «U: «Mǝn bundaⱪ japaliⱪ ixlǝp, jenimdin zadi kimgǝ yahxiliⱪ ⱪaldurimǝn?» — degǝnni sorimaydu» — bǝzi baxⱪa tǝrjimilǝrdǝ: «U: «Mǝn zadi kim üqün japaliⱪ ixlǝp, ɵz jenimdin yahxiliⱪni ⱪaldurimǝn?» — dǝp ɵkünidu» dǝp oⱪulidu.

□4:14 «Gǝrqǝ u bu padixaⱨning padixaⱨliⱪida kǝmbǝƣǝl bolup tuƣulƣan bolsimu,...» — bu ayǝtning ⱪaysi gǝwdilik ǝⱨwalni kɵrsǝtkǝnliki ⱨazir bizgǝ eniⱪ ǝmǝs.

□4:16 «...yǝni ularning aldida turƣan barliⱪ puⱪralar» — «ular» degǝn kim? Bǝlkim birinqi «ⱪeri» padixaⱨ wǝ uningdin keyin tǝhtkǝ olturƣan yigitni kɵrsitixi mumkin. «barliⱪ puⱪralar sanaⱪsiz bolsimu, biraⱪ ulardin keyinkilǝr yigittinmu razi bolmaydu» — Sulayman mǝlum bir misal toƣruluⱪ sɵzlǝwatidu. Bu «ⱪeri padixaⱨ» Saul padixaⱨⱪa, «yax yigit» Dawut padixaⱨⱪa ohxitilidu; biraⱪ dǝl ularning ɵzini kɵrsǝtmǝydu (Dawut zindanda yatmiƣan). Gǝpning poskallisi xuki, yurtning pikri tayanqisizdur; ikkinqi padixaⱨ pǝⱪǝt bir mǝzgilla ⱪarxi elindi, biraⱪ hǝlⱪ tezla uningdin yüz ɵrüp, uning tɵⱨpisini untup, uni ⱪollimidi. Bu bir bimǝnilik!