Muⱪeddes Kalam (yǝngi yeziⱪ) Amos 2

Moab ⱨǝⱪⱪidǝ

1 Pǝrwǝrdigar mundaⱪ dǝydu:

—«Moabning üq gunaⱨi, bǝrⱨǝⱪ tɵt gunaⱨi üqün, uningƣa qüxidiƣan jazani yandurmaymǝn,

Qünki u Edomning padixaⱨining ustihanlirini kɵydürüp ⱨak ⱪiliwǝtti.

2 Ⱨǝm Mǝn Moab üstigǝ ot ǝwǝtimǝn,

Ot Keriotning ordilirini yutuwalidu;

Wǝ Moab quⱪan-sürǝnlǝr bilǝn, ⱪiya-qiyalar bilǝn, kanay sadasi bilǝn ɵlidu.

3 Wǝ Mǝn ularning ⱨakimini arisidin üzüp taxlaymǝn,

Uning ǝmirlirini uning bilǝn billǝ ɵltürüwetimǝn, — dǝydu Pǝrwǝrdigar.

Yǝⱨuda ⱨǝⱪⱪidǝ

4 Pǝrwǝrdigar mundaⱪ dǝydu: —

«Yǝⱨudaning üq gunaⱨi, bǝrⱨǝⱪ tɵt gunaⱨi üqün, uningƣa qüxidiƣan jazani yandurmaymǝn,

Qünki ular Pǝrwǝrdigarning Tǝwrat-ⱪanunini kǝmsitti,

Uningdiki bǝlgilimilǝrgǝ ǝmǝl ⱪilmidi;

Ularning sahtiliⱪliri ɵzlirini adaxturup ⱪoydi; ularning ata-bowilirimu bularƣa ǝgixip mangƣanidi.□

5 Ⱨǝm Mǝn Yǝⱨuda üstigǝ ot ǝwǝtimǝn,

Ot Yerusalemning ordilirini yutuwalidu.

Israil ⱨǝⱪⱪidǝ

6 Pǝrwǝrdigar mundaⱪ dǝydu: —

Israilning üq gunaⱨi, bǝrⱨǝⱪ tɵt gunaⱨi üqün, uni jazasidin ⱪayturmaymǝn,

Qünki ular ⱨǝⱪⱪaniylarni kümüxkǝ setiwǝtti,

Yoⱪsul adǝmni bir jüp qoruⱪⱪa setiwǝtti;

7 Ular namratlarning bexidiki qang-topilirini box ⱪoyuwǝtmǝydu,

Ajiz mɵminlǝrning nesiwisini ⱪayriwalidu;

Ata-bala ikkisi Mening muⱪǝddǝs namimni bulƣap, ohxax bir ⱪizning yeniƣa tǝng baridu.□

8 Ular ⱪizlarni ⱨǝmmǝ ⱪurbangaⱨning yeniƣa elip berip,

Ⱪǝrzgǝ rǝnigǝ ⱪoyƣan kiyim-keqǝklǝr üstidǝ ular bilǝn yatidu;

Ular ɵz ilaⱨining ɵyidǝ jǝrimanǝ bilǝn alƣan xarabni iqmǝktǝ.□

9 Biraⱪ Mǝn Amoriylarni ularning aldidin ⱨalak ⱪilƣanmǝn,

Amoriylar kedir dǝrihidǝk egiz, dub dǝrihidǝk küqlük bolƣan bolsimu,

Mǝn üstidin uning mewisini, astidin yiltizlirini ⱨalak ⱪildim.■

10 Ⱨǝm Amoriylarning zeminini igilixinglar üqün,

Silǝrni Misir zeminidin elip qiⱪip,

Ⱪiriⱪ yil qɵl-bayawanda yetǝklidim.□ ■

11 Silǝrning oƣulliringlardin bǝzilirini pǝyƣǝmbǝr boluxⱪa,

Yigitliringlardin bǝzilirini «Nazariy» boluxⱪa turƣuzdum.

Xundaⱪ ǝmǝsmu, i Israil baliliri? — dǝydu Pǝrwǝrdigar.□

12 Biraⱪ silǝr Nazariylarƣa xarab iqküzdunglar,

Ⱨǝm pǝyƣǝmbǝrlǝrgǝ: «pǝyƣǝmbǝrlik ⱪilmanglar» — dǝp buyrudunglar.■

13 Mana, Mǝn silǝrni basimǝn,

Huddi liⱪ ɵnqǝ besilƣan ⱨarwa yǝrni basⱪandǝk, silǝrni besip turimǝn;

14 Ⱨǝm qapⱪurlarningmu ⱪaqar yoli yoⱪaydu,

Palwan ɵz küqini ixlitǝlmǝydu,

Zǝbǝrdǝs batur ɵz jenini ⱪutⱪuzalmaydu.

15 Oⱪyani tutⱪuqi tik turalmaydu;

Yǝltapan ⱪaqalmaydu,

Atⱪa mingüqi ɵz jenini ⱪutⱪuzalmaydu.

16 Palwanlar arisidiki ǝng jigǝrlik baturmu xu künidǝ yalingaq ⱪeqip ketidu, — dǝydu Pǝrwǝrdigar.

Amos
<
2
>

□2:4 «Ularning sahtiliⱪliri ɵzlirini adaxturup ⱪoydi» — «sahtiliⱪliri» keyinki gǝplǝrgǝ ⱪariƣanda, ularning yasiƣan butlirini kɵrsitidu.

□2:7 «Ata-bala ikkisi Mening muⱪǝddǝs namimni bulƣap, ohxax bir ⱪizning yeniƣa tǝng baridu» — bu ix paⱨixiwazliⱪ bolupla ⱪalmay, yǝnǝ ularning butiƣa, yǝni «Baal»ƣa birhil qoⱪunux paaliyiti ⱨesablinatti.

□2:8 «Ular ⱪizlarni ⱨǝmmǝ ⱪurbangaⱨning yeniƣa elip berip, ⱪǝrzgǝ rǝnigǝ ⱪoyƣan kiyim-keqǝklǝr üstidǝ ular bilǝn yatidu; ular ɵz ilaⱨining ɵyidǝ jǝrimanǝ bilǝn alƣan xarabni iqmǝktǝ» — bu jümlidǝ Amos ularning, bolupmu baylarning tɵt gunaⱨini kɵrsitidu: — (1) ularning (butlarƣa atap beƣixliƣan) kɵp ⱪurbanliⱪliri bar idi; (2) ular Musa pǝyƣǝmbǝrgǝ qüxürülgǝn muⱪǝddǝs ⱪanunƣa hilapliⱪ ⱪilip, ɵzlirigǝ ⱪǝrzdar bolƣan namratlardin kiyim-keqǝklirini tartiwalidu («Mis.» 22:26, «Ⱪan.» 24:12-17ni kɵrüng); (3) ular buthanilarni selip, butlarni ɵzlirining Hudasi dǝp etirap ⱪilƣan; (4) ular ⱨaram yolda hǝⱪtin jǝrimanǝ alidu — u gunaⱨlar bǝlkim 6-ayǝttǝ eytilƣan «üq gunaⱨi, tɵt gunaⱨi»ni eniⱪ toluⱪlap kɵrsitip berixi mumkin.

■2:9 Qɵl. 21:24; Ⱪan. 2:31; Yǝ. 24:8

□2:10 «Silǝrni ... ⱪiriⱪ yil ... yetǝklidim» — «Misirdin qiⱪix» wǝ «Qɵl-bayawandiki sǝpǝr» boyiqǝ ular qɵl-bayawanda kɵp ⱪetim Hudaƣa itaǝtsizlik, asiyliⱪmu ⱪilƣan. Hudaning xu künlǝrdǝ ularni taxliwǝtmigǝnliki uning meⱨri-xǝpⱪitigǝ intayin zor ispat bǝrdi wǝ beridu.

■2:10 Mis. 12:51

□2:11 «Nazariy» — bu adǝmlǝr alaⱨidǝ yol bilǝn (jümlidin xarab iqmǝy, qaqlirini qüxürmǝy) waⱪitliⱪ yaki ɵmürwayǝt ɵzini Hudaƣa atap beƣixliƣan. Xunga ularning yürüx-turuxliri hǝⱪlǝrgǝ baⱪiy dunyani ǝslitip turatti («Qɵl.» 6-babni kɵrüng).

■2:12 Am. 7:12, 13