1 Indanit iang-ang ku bo ya tinibok on naluddun an papel an muntayyapan.

2 Kanan nan anghel di “Nganneh diyen tinibom?”

Kanak di “Tinibok on muntayyapan an naluddun an papel an tulumpulun piyey kadukkena ya himpulut liman piyey kabilog na.”

3 Ot kananan ha-on di “Hay nitudok kediyen papel ya mipanggep nah idut an umalih tataguh kabobboble an hay nitudok nah bah-el nan papel ya mipakaan am-in di mangako nah boble. Ya nah binnah-el nan papel ya nitudok an mipakaan am-in nadan munlangkak nah boble. 4 Hituwe boy kanan APU DIOS an Kabaelanan am-in: ‘Ipaalik di idut hi nunhituwan nadan mangako ya nadan munsapatah langkak hi ngadan ku. Ya munnanong hidiyen idut kuh nunhituwan da inggana makadaddag takon nadan kakaiw ya batun nikapyah di.’ ”

5 Indani ya immalin nih-up ke ha-on nan anghel an mungkalkalli ot kananay “Itangad mu keh kabunyan ta tibom din mamuddal.”

6 Kanak di “Nganneh diye?”

Kananay “Hidiye ya basket an punlukud an napnuh liwat am-in di taguh kabobboble.”

7 Handih nitagge nan hukap an lubay ya dehdi on inumbun an babai. 8 Kanan nan anghel di “Hay kibalinan tuwen babai ya nan namahig an kinagaga-ihon di tagu.” Indani ya intalmod na nan babai nah basket ot hukapona bo.

9 Intangad ku ya tinibok di duwan babain muntayyapan an hay payak da ya kay payak di stork an hamuti. Mangali dah kad-ak ot itagge da nan basket ot pun-ie da.

10 Ot hanhanak nah anghel hin daanay pangiayan da kediyen basket.

11 Himmumang nan anghel an kananay “Ie dad Babilon. Ya mangapya dah temploh din pangiha-adan da kediyen basket. Deket nagibbun nakapya nan templo ya iha-ad dah diyen basket hidi nah kiha-adanan napattuk ta makattibo.”