1 Chronicles
Hay mipanggep ketuwen liblu an 1 Chronicles
Hituwen liblu an 1 Chronicles ya ipainila nan ugge inwalong Apu Dios nadan tatagunan holag Israel. Takon di inapput nadan iAssyria ya nadan iBabilon dida ot alan da didan balud hi boble da ya ugge kinal-iwan Apu Dios dida. Wadaday udum ke didan immanamut ad Israel an nalpu ad Babilon, mu nadismaya da te nadadag di Templo da ya nakapuy di gubilnu da.
Ot hay inat nan nangitudok ketuwen liblu ta mibangngad di dinol datuwen holag Israel ke Apu Dios ya impanomnom nan diday inat Apu Dios an numbendisyon hi aammod da handi ya nan nangipaptokanan dida ta baddangana dida ya tumulid da. Athidi kuma damdamay aton nadan holag Israel an mundinol dan Apu Dios an mangipaptok ke didad uwani ya hi udum hi algo. Te hi Apu Dios ya adi malumman, mu munnananong di pamhod na ya pamaptok nah tataguna. (Psalm 100:5)
Hay nitudok ketuwen liblu:
1. Hay numbendisyonan Apu Dios nadah aammod di holag Israel ot dumakkodakkol da. (chapters 1-9)
2. Hay numbendisyonan Apu Dios nadah holag Israel hi nanudduwanan David an mumpatul ke dida. (chapters 10-21)
3. Hay numbendisyonan Apu Dios nadah holag Israel hi nangidadaananan am-in nadah tatagu ya nadan mahapul hi pamohwatan da nah Templo ya nadan udum an mahapul da. (chapters 22-29)
1
Hituwey tonton mipalpun Adam inggana ke Abraham
1 Nahlag hi Adam ot wadah Seth. Nahlag hi Seth ot wadah Enos. Nahlag hi Enos ot wadah Kenan. 2 Nahlag hi Kenan ot wadah Mahalalel, nahlag hi Mahalalel ot wadah Jared. 3 Nahlag hi Jared ot wadah Enoch an aman Methuselah. Nahlag hi Methuselah ot wadah Lamek. 4 Nahlag hi Lamek ot wadah Noah an tuluy imbabalenan hi Sem, hi Ham ya hi Japet. 5 Nahlag hi Japet ot wadah Gomer, hi Magog, hi Madai, hi Jaban, hi Tubal, hi Meshek ya hi Tiras. 6 Nahlag hi Gomer ot wadah Askenas, hi Riphat ya hi Togarmah. 7 Nahlag hi Jaban ot wadah Elishah, hi Tarsis, hi Kittim ya hi Rodanim. 8 Nahlag hi Ham ot wadah Kush, hi Misraim, hi Put ya hi Kanaan. 9 Nahlag hi Kush ot wadah Seba, hi Habilah, hi Sabta, hi Raamah ya hi Sabteka. Nahlag hi Raamah ot da Seba ke Dedan. 10 Wada boy ohan holag Nimrod an hi Kush an namangulun nanganapput hi nakigubagubatanah kabobboble. 11 Hay nahlag damdaman Misraim ya dida nadan numpumbobled Lydia, Anam, Lehab, Naptuh, 12 Patrus, Kasluh ya ad Crete. Diday aammod nadan iPilistia.
13 Nahlag hi Kanaan ot wadah Sidon an nahlagan nadan Sidonians. Nahlag bo ot nadan Hittite, 14 nadan Jebusite, Amorite, Girgashite, 15 Hibite, Arkite, Sinite, 16 Arbadite, Semarite ya Hamatite. 17 Hanadan imbabalen Sem ya hi Elam, hi Assur, hi Arpachshad, hi Lud, hi Aram, hi Us, hi Hul, hi Gether ya hi Meshek. 18 Hi Arpachshad di kon imbabalen Selah an aman Eber. 19 Duway imbabalen Eber: hi Peleg di ngadan nan oha te handih katagguna ya naganodway tataguh kabobboble tuh luta mipuun hi nunhihinnatkon an kali da. Hay ngadan nan oha ya hi Joktan. 20 Hi Joktan di aman Almodad, hi Selep, hi Hasarmabet, hi Jerah, 21 hi Hadoram, hi Usal, hi Diklah, 22 hi Obal, hi Abimael, hi Seba, 23 hi Ophir, hi Habilah ya hi Jobab. 24 Datuwe nadan nuntutun-ud an holag mipalpu ke Sem inggana ke Abram. Nawadah Sem, ot ahi wadah Arpachshad, hi Selah, 25 hi Eber, hi Peleg, hi Reu, 26 hi Serug, hi Nahor, hi Terah 27 ya hi Abram an hi Abraham di ohan ngadana.
28 Hi Abraham ya duway imbabalenan da Isaac ke Ismael. 29 Hanadan himpulut duwan imbabalen Ismael ya hi Nebayot an panguluwan, hi Kedar, hi Adbeel, hi Mibsam, 30 hi Misma, hi Dumah, hi Massa, hi Hadad, hi Tema, 31 hi Jetur, hi Naphis ya hi Kedemah an udidiyan. 32 Hanadan onom an imbabalen Abraham nah babain imbilang nan inayanan hi Keturah ya hi Simran, hi Joksan, hi Medan, hi Midian, hi Isbak ya hi Suah. Hi Joksan ya duway imbabalenan da Seba ke Dedan. 33 Hi Midian ya limay imbabalena: hi Ephah, hi Epher, hi Hanok, hi Abida ya hi Eldaah. Datuwen am-in di holag Keturah.
34 Hi Isaac an imbabalen Abraham ya duway imbabalenan da Esau ke Jacob. 35 Hanadan imbabalen Esau ya hi Eliphas, hi Reuel, hi Jeus, hi Jalam ya hi Korah. 36 Hanadan imbabalen Eliphas ya hi Teman, hi Omar, hi Sephi, hi Gatam, hi Kenas, hi Timna ya hi Amalek. 37 Hanadan imbabalen Reuel ya hi Nahat, hi Serah, hi Sammah, ya hi Missah.
Hanadan datin numbobled Edom
38-42 Hanadan datin numbobled Edom ya nahlag da nadah imbabalen Seir an hi Lotan, hi Sobal, hi Sibeon, hi Anah, hi Dishon, hi Eser ya hi Dishan. Hi Lotan ya duway imbabalenan da Hori ke Homam. Waday tulang Lotan an babai an hi Timna. Hanadan imbabalen Sobal ya hi Alban, hi Manahat, hi Ebal, hi Sephi ya hi Onam. Hi Sibeon ya waday duwan imbabalena an da Aiah ke Anah an aman Dishon. Hanadan imbabalen Dishon ya hi Hamran, hi Esban, hi Itran ya hi Keran. Hanadan imbabalen Eser ya hi Bilhan, hi Saaban ya hi Jaakan. Hanadan imbabalen Dishan ya da Us ke Aran.
Hanadan numpatul ad Edom
43 Handih maid da ni-an di numpatul ad Israel ya wadada tuwaliy nahanhanot an patul ad Edom. Hay namangulu ya hi Bela an imbabalen Beor an iDinhaba. 44 Nateh Bela ot mihannot hi Jobab an imbabalen Serah an iBosrah. 45 Nateh Jobab ot mihannot boh Husham an iTeman. 46 Nateh Husham ot mihannot hi Hadad an imbabalen Bedad an iAbit. Hituwen hi Hadad nan nangapput nadah iMidian handih nunggugubatan dad Moab. 47 Nateh Hadad ot mihannot hi Samlah an iMasrekah. 48 Nateh Samlah ot mihannot hi Saul ad Rehobot an boble nah kad-an di Wangwang an Euphrates. 49 Nateh Saul ot mihannot hi Baal-Hanan an imbabalen Akbor. 50 Nateh Baal-Hanan ot mihannot hi Hadad an iPau. Hay inayan Hadad ya hi Mehetabel an imbabalen Matred ya inap-apun Mesahab. 51 Indani ya nate damdamah Hadad.
Hanadan mangipangpanguluh iEdom mipuun hi nahlagan da ya hi Timna, hi Albah, hi Jethet, 52 hi Oholibamah, hi Elah, hi Pinon, 53 hi Kenas, hi Teman, hi Mibsar, 54 hi Magdiel ya hi Iram.