1 Ǝmǝrǝdda imǝdrayan-nana, tansayat-anaɣ-in Mǝššina, fǝl ad iwǝziwǝz awal n Ǝmǝli itǝwǝgg-as saɣmar wa das-itawaggan ɣur-wan. 2 Ǝgmǝyat ǝnta da daɣ Mǝššina a danaɣ-ogazan daɣ zǝnga ǝd nǝzzulam fǝlas wǝrgeɣ aytedan kul a ǝttafnen ǝzǝgzan. 3 Mišan, Ǝmǝli alɣadil a imos, ǝnta a kawan-z-isǝssuhen agǝz-kawan daɣ Iblis. 4 Nǝga attama s esǝm n Ǝmǝli as tǝtamazalam awas kawan-nomar taglim deɣ tǝtamazalam-tu. 5 Issǝdǝget Ǝmǝli iwallan-nawan sa sǝr tara ǝn Mǝššina ǝd zǝmmerat ta ihakku Ǝlmǝsix.

6 Imǝdrayan-nana, nomâr-kawan fǝl udǝm n Ǝmǝli-nana Ɣaysa Ǝlmǝsix s ad tǝnǝmǝggǝgam ǝd mǝzzǝgzan kul win mǝssǝndad, wǝr ǝlkeman y awa tan-nǝsassaɣra. 7 Kawanay iman-nawan, tǝssânam wǝllen as immikkan ad tataggim awa nǝtag. Harwa a ɣur-wan nǝlla, wǝr nǝmos imǝssǝndad. 8 Wǝr nǝgmay daɣ waliyyan daɣ-wan a danaɣ-išatšu bannan, kalar nǝrḍa s anay n arkanay d iduz labasan, nǝšɣâl ehad ezal fǝl ad wǝr nǝqqel ǝzuk i waliyyan daɣ-wan. 9 Wǝr dana-isassaga adi iba ǝn tǝla n alxaq n a dana-tilalam, kala ar nǝg-ay fǝl a dawan-nǝqqǝl almasal. 10 Harwa kawan-nǝha, nomâr-kawan s as: Wa ugayan s ǝššǝɣǝl, ad wǝr atšu.

11 Amaran ǝmǝrǝdda nǝsla as ahân-kawan aytedan ǝglânen ǝs tamajalladat, wǝr tan-iha ar iguz ǝn taɣawšiwen a tan-wǝr-nǝqqel. 12 Aytedan win di nomâr-tan, nǝgmây daɣ-san deɣ s esǝm n Ǝmǝli Ɣaysa Ǝlmǝsix, ad agin ǝššǝɣǝl-nasan ǝs tǝnagrit fǝl ad atšin daɣ ǝššǝɣǝl ǝn fassan-nasan. 13 Amaran kawanay imǝdrayan-nana, ad wǝr tǝddǝzam igi n awa olaɣan. 14 Kud ih-iwan awedan wǝr nǝlkem y awa nǝnna daɣ širawt ta, ǝssǝnat-tu, a tu-wǝr-tǝmǝl tassaq waliyyat gar-ewwan dǝr-ǝs, fǝl ad ikǝrukǝd. 15 Dǝr iga adi da, a das-wǝr-tagim iduf n azangaw, taggat-as ǝnnǝsixa wa za tagim y amadray-nawan.

16 Akfet-kawan Ǝmǝli n alxer ǝnta iman-net alxer faw daɣ arat kul, ilal-awan ketnawan. 17 Ǝfus wa-nin iman-in a iktaban awa: Šihulawen a din-ǝgmadnen Bulǝs. Awa da a imosan ejwal ǝn šira-nin kul. Ǝmmǝk wa da as tanat-kattaba. 18 Mǝššina ya tǝkfeq-qawan arraxmat n Ǝmǝli-nana Ɣaysa Ǝlmǝsix.