2
Ni chaꞌ laca ngujuiꞌi̱ caꞌa̱ nguꞌ jiꞌi̱ Cristo lo crusi
1 Cuꞌma̱ tyaꞌa ngusñi na chaꞌ jiꞌi̱ Cristo, tyiꞌu tiꞌ ma̱ ñiꞌya̱ nguaꞌni naꞌ tya clyo, loꞌo ndyalaa naꞌ su ndiꞌi̱ ma̱ chaꞌ chcuiꞌ naꞌ loꞌo ma̱ chaꞌ tsoꞌo nu cua nda ycuiꞌ Ndyosi loꞌo na, chaꞌ jiꞌi̱ Jesucristo biꞌ; ná quiñaꞌa̱ tsa chaꞌ tucui nchcuiꞌ naꞌ loꞌo cuꞌma̱ liꞌ, siꞌi chaꞌ nchca tsa naꞌ nchcuiꞌ naꞌ loꞌo cuꞌma̱ liꞌ. 2 Laja loꞌo ngutiꞌi̱ naꞌ quichi̱ tyi ma̱, ngüiñi tiꞌ naꞌ chaꞌ ná ta naꞌ xi xaꞌ la chaꞌ loꞌo ma̱ tsiyaꞌ ti; sca ti chaꞌ jiꞌi̱ ycuiꞌ Jesucristo, la cuiꞌ Cristo nu ngujuiꞌi̱ caꞌa̱ nguꞌ jiꞌi̱ lo crusi, tsa biꞌ ti chaꞌ nchcuiꞌ naꞌ loꞌo ma̱ liꞌ. 3 Loꞌo ndyalaa naꞌ su ndiꞌi̱ ma̱, ngunaꞌa̱ tya tiꞌ naꞌ ndu̱ naꞌ liꞌ; nchcua̱ tya naꞌ chaꞌ ngulacua tsa tiꞌ naꞌ ni chaꞌ xacui̱ ma̱ ꞌna liꞌ. 4 Loꞌo nda naꞌ chaꞌ biꞌ loꞌo ma̱, ná ngulana naꞌ quiñaꞌa̱ tsa chaꞌ nu tyuꞌu tuꞌba naꞌ, ná nguaꞌni naꞌ ñiꞌya̱ nu nduꞌni ñati̱ nu nchca tsa chcuiꞌ. Pana cua nda ycuiꞌ Ndyosi juersa jnaꞌ; cua nchcuiꞌ naꞌ loꞌo ma̱ lcaa chaꞌ nu cua nda Xtyiꞌi ycuiꞌ Ndyosi loꞌo naꞌ, chaꞌ caca cuayáꞌ tsoꞌo tiꞌ ma̱. 5 Xquiꞌya cña nu nguaꞌni ycuiꞌ Ndyosi, biꞌ chaꞌ ngusñi ma̱ chaꞌ jiꞌi̱ Jesús liꞌ; siꞌi xquiꞌya sca chaꞌ nu ngulo hique ti naꞌ chaꞌ nchca tsa jnaꞌ.
Sca chaꞌ tsoꞌo nu ntiꞌ ycuiꞌ Ndyosi chcuiꞌ Ni loꞌo ñati̱
6 Masi juaꞌa̱, cua ntsuꞌu chaꞌ tsoꞌo nu nchcuiꞌ na loꞌo ñati̱ nu nduna tsoꞌo chaꞌ jiꞌi̱ ycuiꞌ Ndyosi; chaꞌ nu nguaꞌya hique ycuiꞌ Ndyosi laca chaꞌ biꞌ, siꞌi sca chaꞌ nu jlo tiꞌ ñati̱ chalyuu. La cuiꞌ ti ná jlo tiꞌ nu laca loo chalyuu chaꞌ biꞌ, masi cua lijya̱ tye chaꞌ culo nguꞌ biꞌ cña. 7 Cua nda ycuiꞌ Ndyosi chaꞌ tsoꞌo biꞌ loꞌo na chaꞌ chcuiꞌ na loꞌo ñati̱. Bilya caca cuayáꞌ tiꞌ ñati̱ chalyuu jiꞌi̱ chaꞌ biꞌ tya saꞌni la, chaꞌ ná ntiꞌ Ni chaꞌ cuna ñati̱ nu ngua liꞌ. Pana tya loꞌo bilya tyaꞌ chalyuu, tya liꞌ ngulacua tiꞌ Ni ñiꞌya̱ nu cuaꞌni Ni; ngua tiꞌ ycuiꞌ Ndyosi chaꞌ cuaꞌni lyaá Ni jiꞌna loꞌo xñi na chaꞌ jiꞌi̱ Jesús. Tlyu tsa chaꞌ tsoꞌo caca jiꞌna liꞌ. 8 Ni sca ñati̱ nu laca loo chalyuu, ná ngua cuayáꞌ tiꞌ nguꞌ chaꞌ biꞌ. Si ngua jlo tiꞌ nguꞌ chaꞌ biꞌ, ñiꞌya̱ nu ngua tiꞌ ycuiꞌ Ndyosi chaꞌ cuaꞌni Ni, ná ngujuiꞌi̱ caꞌa̱ nguꞌ biꞌ jiꞌi̱ Jesús lo crusi liꞌ, ycuiꞌ Jesús nu Xuꞌna na nu tlyu tsa chaꞌ tsoꞌo ntsuꞌu jiꞌi̱. 9 Ñiꞌya̱ nu nscua chaꞌ lo quityi cusuꞌ, juaꞌa̱ laca chaꞌ biꞌ. Ndiꞌya̱ nchcuiꞌ quityi biꞌ:
Cua nguaꞌni choꞌo ycuiꞌ Ndyosi chaꞌ tsoꞌo nu tyacua jiꞌi̱ ñati̱ nu ntsuꞌu tyiquee jiꞌi̱ ycuiꞌ Ni;
laca biꞌ chaꞌ nu bilya ñaꞌa̱ ñati̱ chalyuu jiꞌi̱, chaꞌ nu bilya cuna ñati̱ jiꞌi̱,
ni ná ngulacua tiꞌ nguꞌ chaꞌ caca chaꞌ biꞌ.
10 Pana nu na, nguꞌ tyaꞌa ngusñi na chaꞌ jiꞌi̱ Cristo, cua nguluꞌu Ni jiꞌna ñiꞌya̱ caca chaꞌ tsoꞌo biꞌ xquiꞌya Xtyiꞌi ycuiꞌ Ni nu cua nda Ni chaꞌ tyanu neꞌ cresiya jiꞌna. Tsoꞌo tsa ndachaꞌ loo Xtyiꞌi ycuiꞌ Ni jiꞌna lcaa chaꞌ nu ntsuꞌu tyiquee ycuiꞌ Ndyosi chaꞌ cuaꞌni Ni nde chalyuu, tsoꞌo tsa jlo tiꞌ na chaꞌ biꞌ xquiꞌya Xtyiꞌi ycuiꞌ Ni.
11 Nu ñati̱ chalyuu na ni, hique ti na ntsuꞌu coꞌo lcaa chaꞌ nu ntsuꞌu tyiquee na; sca ti ycuiꞌ na loꞌo ycuiꞌ Ndyosi caca jlo tiꞌ na lcaa chaꞌ nu nclyacua tiꞌ na. Loꞌo juaꞌa̱ laca ycuiꞌ Ndyosi, sca ti Xtyiꞌi ycuiꞌ Ni jlo tiꞌ lcaa chaꞌ nu ntsuꞌu tyiquee Ni. 12 Siꞌi sca cuiꞌi̱ cuxi nu ntsuꞌu nde chalyuu ti laca Xtyiꞌi nu cua nda Ni chaꞌ tyanu neꞌ cresiya jiꞌna juani; na cua nda Ni Xtyiꞌi ycuiꞌ Ni jiꞌna, chaꞌ cua ngusñi na chaꞌ jiꞌi̱ Ni. Loꞌo juaꞌa̱ xquiꞌya Xtyiꞌi ycuiꞌ Ni caca cuayáꞌ tiꞌ na lcaa cña tsoꞌo nu nduꞌni Ni neꞌ cresiya jiꞌna. 13 Nu loꞌo cachaꞌ na chaꞌ tsoꞌo nu jiꞌi̱ ycuiꞌ Ndyosi biꞌ jiꞌi̱ ñati̱ jiꞌi̱ ycuiꞌ Ni, nu nguꞌ nu ntsuꞌu Xtyiꞌi ycuiꞌ Ni neꞌ cresiya jiꞌi̱, liꞌ clyana na sca chaꞌ nu chcuiꞌ na, sca chaꞌ nu ta Xtyiꞌi ycuiꞌ Ni loꞌo na; ná clyana na quiñaꞌa̱ tsa chaꞌ chcuiꞌ na ñiꞌya̱ nu nduꞌni ñati̱ nu nchca tsa jiꞌi̱ ycuiꞌ ca nguꞌ.
14 Pana ñati̱ nu ná stuꞌba chaꞌ jiꞌi̱ loꞌo ycuiꞌ Ndyosi ni, ná taca ca cuayáꞌ tiꞌ nguꞌ biꞌ ni sca cña nu nduꞌni ycuiꞌ Ndyosi cuentya jiꞌi̱ Xtyiꞌi ycuiꞌ Ni; ná nchca ca cuayáꞌ tiꞌ nguꞌ biꞌ jiꞌi̱ chaꞌ biꞌ tsiyaꞌ ti. Sca ti si ntsuꞌu Xtyiꞌi ycuiꞌ Ndyosi neꞌ cresiya jiꞌna, liꞌ caca cuayáꞌ tiꞌ na ni chaꞌ laca biꞌ, biꞌ chaꞌ ná sca chaꞌ laca ntiꞌ nguꞌ biꞌ. 15 Taca ca cuayáꞌ tiꞌ na ñiꞌya̱ ndyuꞌu lcaa chaꞌ si cua ntsuꞌu Xtyiꞌi ycuiꞌ Ndyosi neꞌ cresiya jiꞌna, loꞌo liꞌ ná taca xacui̱ nguꞌ xi xaꞌ la chaꞌ jiꞌna. 16 Ndiꞌya̱ nscua lo quityi jiꞌi̱ ycuiꞌ Ndyosi: “¿Tilaca nchca cuayáꞌ tiꞌ ni chaꞌ laca nu ndaꞌya hique ycuiꞌ Ndyosi? ¿Ha caca jiꞌna ta na sca cui̱i̱ loꞌo Ni?” nacui̱ quityi. Pana nu na ni, xquiꞌya Xtyiꞌi ycuiꞌ Ndyosi cua ngujui chaꞌ jiꞌna ni chaꞌ laca nu nclyacua tiꞌ ycuiꞌ Cristo.