9
Diusu ja judío cuana dharetaidha
1 Edue cuana, Cristo bahue yama micuana butsepi equisainia. Daja huecha Espíritu Santo bahue aimue ema bid'umimi epuani mahue. 2 Pamapa hora su ebia su ema epibapibani judío cuana jepuiti. 3 Tsada quema pamapa tuneda Cristo peje su jei paputa puji. Ema quitaita detse jamenajatiati cua tuna sa eturuca matsejiji epu puji, d'eji su paputa huecuana puji. Daja ema epu, tuneda quema judío edue cuana putsu. 4 Beju tuneda da judío cuana. Biahua tiempo Diusu ja dharetaidha huecuana mesa dharejiji cristiano cuana paputa huecuana puji. Tuna peje su aida jabametidha. Tuna neje huamahuama jamitsuti jatiatitaidha huecuana. Mesa jacuatsasiati cuana tiataidha huecuana. Cuaja tu mitsutsuame buetsuataidha huecuana. Mesa jamitsuti saida tiataidha huecuana. 5 Abraham chenu sa ebacua cuana eputani huecuana. Cristo di judío deja bataji puina. Tueda da pamapa ai cuana sa huaraji aida, Diusu putsu. Pamapa cristiano cuana ja tueda pamitsutsuaenita. Daja papu.
6-7 ¿Ai da Diusu ja mesa jamitsuti mue ape atana bata? Mesa jamitsuti cuana da mesa dharejiji cuana sa puji bahui. Aimue pamapa israelita cuana Diusu sa ene quita dharejiji cuana mahue, Abraham chenu sa familia jenetia biame. Biahua tiempo Diusu ja Abraham chenu uja quisataidha: “Mique ebacua Isaac jepuiti bahui mique ene quita familia chenu bataji eputa.” 8 Isaac da Abraham chenu sa ebacua bataji puidha, Diusu ja mesa jamitsuti tiataidha jepuiti. Daja huecha Diusu sa jamitsuti cuana su jei eputani cuana da Diusu sa ebacua cuana eputani. 9 Uja Diusu ja Abraham chenu jamitsuti tiataidha: “Sara sa nedaji pu taji tsine cuana beju su, ema esiapati.”
10 Tueda ebacua Isaac banime puidha. Isaac Rebeca neje jahuanetidha su, pere mesa ebacua bataji puidha. Tuatseda Esaú, Jacob banime puidha. Esaú da equene bataji puidha. Tije puji Jacob. 11-13 Tuatseda bataji puji mahue su, Diusu ja Jacob dharetaidha tuseda puji. Aimue Esaú mu dhare tueda da edue edhi puji biame. ¿Jucuaja su jia Diusu ja daja dharetaidha? ¿Ai madhada Esaú ja ataidha bata? ¿Ai saida Jacob ja ataidha bata? Aimue detse daja pu cua mahue, ai mahue tsuhu puina tse putsu. Beju Diusu ja Jacob bahui dharetaidha, mesa tsada puidha putsu. Bataji puji mahue tse su, Diusu ja Rebeca uja ataidha: “Beju Jacob tije bataji epu biame, Esaú da tusa emebajaji epu.” Beju uja deremetaidha Diusu ja mesa quirica su: “Yama Jacob ibuneda bana. Esaú mu mahue.”
14 ¿Ai daja ataidha putsu, Diusu butsepi mahue bata? Beju tuahueda cuaja mesa tsada mahui yatani. 15 Moisés chenu uja ataidha: “Quebata quema tsada epuani, beju tueda yama eibunebata.” 16 Da su Diusu sa tsada bahui putsu, cristiano cuana eibunebata. Aimue tuna sa tsada, ai saida ajiji cuana jepuiti eibunebata huecuana mahue. 17 Uja Diusu ja Egipto yahua sa echua puji ataidha: “Quema tucheda cristiano cuana ebani puji, yama mi echua puji ichana. Ai nimetiuda cuana neje yama mi butsepiameana jepuiti, cristiano cuana ja quema tucheda ba putsu, quema ebani di eshanapata huecuana.” 18 Da putsu, bahue ecuaneda Diusu ja cuaja mesa tsada epuani batame cristiano cuana yatani. Piada piada cuana eibunebatani. Pia cuana mu muesumu tadada yametani.
19 Da su cuapuitime piada piada micuaneda uja pu cua: “¿Jucuaja su Diusu ja cristiano cuana ematsetani, tuahueda quitaita daja yametani huecuana putsu? Aimue detse aiya biame Diusu mimijeutsuta cua mahue.” 20 Be daja mepibatiji. Micuaneda cristiano cuana bahui putsu, aimue micuaneseda Diusu mimijeutsu taji mahue. ¿Ai eicha jutu ja tu muduji, “¿Jucuaja su miada ema uja aitia?” yata bata? 21 Cuaja eicha jutu muduji sa tsada batame daja yatani. Ahua tuahueda rutu jenetia dhepe ania chidi misha bia su eicha puji aja su, daja da yata. Daja huecha ahua tueda rutu quitaita jenetia jutu ania chidi mahue cuati su eicha puji aja su, daja da yata. Cuaja mesa tsada batame, daja da yata.
22 Diusu ja ai madhada yatani cuana paciencia aida neje tucheda putsu, ahua castigaja huecuana su, daja tucheda neje mesa castiga taji. 23 Equene jenetia ecuana dharetaidha mesa jaibunebati aida cuana ebameti puji. Ecuaneda da rutu jenetia dhepe ania ajiji nime. Diusu sa tsada tu neje cielo su yanieniti puji. 24 Edue cuana, ecuaneda da Diusu sa jadhareti cuana. Ecuana dharetana judío, judío mahue cuana duju jenetia tuseda puji. 25 Uja Diusu ja profeta Oseas chenu deremetaidha mesa quirica su:
Edhare yama pia cristiano cuana judío mahue cuana.
Quema dharejiji cuana putaina huecuana mahue biame, beju quema dharejiji cuana eputa.
Quema ibuneda putaina huecuana mahue biame, quema ibuneda cuana eputa.
26 Judío eputani mahue huecuana biame, quema dharejiji cuana eputa.
27-28 Beju profeta Isaías chenu ja uja deretaidha judío cuana jepuiti: “Judío cuana da ebia su dueji jutujutuji nime biame, quejucua chidi hue tuneda d'eji su eputa, Diusu ja jubida neje tipeida ecastigatayu huecuana putsu.” 29 Neicha uja Isaías chenu quitaita ja deretaidha judío cuana jepuiti:
Diusu tucheda ja aimue judío cuana manuamepetaidha mahue, cuaja Sodoma, Gomorra ejude detse su aniji cuana ataidha nime.
Mesa jaibunebati jepuiti piada piada judío cuana d'eji su ataidha.
Judío cuana ja Cristo jepuiti quisa saida cuana tsada mahue batana
30 Edue cuana, bahue mepuenique, judío mahue cuana ja aimue Diusu chacutaina mahue biame, Diusu ja enimebutsepiata huecuana, ahua tu peje su enimetucheatita huecuana su. 31 Judío cuana mu nimebutsepi puja putana biame, mue teje atana huecuana, Diusu sa jacuatsasiati cuana bahui aja ataina huecuana putsu. Tueda jacuatsasiati cuana mue ape atana huecuana putsu, aimue nimebutsepi putana huecuana mahue. 32 Diusu peje su janimetucheatija mahue nimebutsepi epu puji. Jacuatsasiati cuana bahui a putsu, nimebutsepi puja epudhaatani huecuana. Da su epitsatitani huecuana. 33 Uja derejiji yani tuna jepuiti Diusu sa quirica su:
Yama Jerusalén ejude su Cristo huaraji eichati.
Tu jei aja mahue yatani cuana da deja yaseneti je, tumu su jahuatsitud'iti putsu, eduininiani nime.
Daja Cristo neje eduininita huecuana, tu jei aja mahue putsu.
Daja biame, tu jei yatani cuana mu tuahueda ene quita d'eji su yaenitayu.