19
1 Da su beju yama id'abana dueji cristiano cuana cielo su mimi neje jubida etsiatsiatani uja:
¡Aleluya! Ecuana sa Diusu ja ecuana d'eji su atana.
Tueda da tucheda eni.
Pamitsutsuaenitija.
2 Tuahueda butsepi, ene quita neje ejuzgatani.
Epuna chuamadhada matsetana.
Tueda epuna ja pamapa cristiano cuana yahua su nimemadhatana mesa jucha cuana neje.
Diusu sa emebajaji cuana manuametana putsu, Diusu ja tueda jubida matsetana.
3 Neicha uja tsiatsia neje putana huecuana yama id'abana:
—¡Aleluya! Tueda ejude sa utsu judu etsuaenitiyu.
4 Beju tueda beta tunca pushi ejaitiana edhi, pushi ai eid'e cuana Diusu yani aniude butse su tururutana tu emitsutsua puji. Uja putana huecuana:
—Daja papu. ¡Aleluya!
5 Da su aniude jenetia da etsui uja puana:
Pamapa Diusu sa emebajaji cuana ja Diusu pamitsutsuata.
Daja huecha pamapa aida, chidi puji, Diusu iyubaji cuana ja Diusu pamitsutsuata.
Huisha Janana Nime sa jahuaneti tsine
6 Da su beju neicha dueji cristiano cuana etsiatsiatani yama id'abana. Tuna sa etsui cuana nai sa id'apadada nime id'abana. Tiri jubida nime tuna sa etsui id'abana. Uja putana huecuana:
¡Aleluya! Ecuana sa Diusu aida beju ecuatsasia pupiruitia.
7 Beju beidaji mepuja.
Diusu pamitsutsuatija, Huisha Janana Nime sa ehuaneti hora beju pueitia putsu.
Mesa ehuane epu basetajiji yani beju.
8 Da su ejud'uji pasane, cuarecuare, chujeneda mesa ehuane epu tiatana pajud'uti puji.
(Tueda ejud'uji pasane da Diusu sa dharejiji cuana sa ai saida atana cuana pu cua nime.)
9 Da su beju ángel ja ema neicha uja atana:
—Dereque ye yama mi ai equisa cuana: “Huisha Janana Nime sa jahuaneti tsine su ihuajiji cuana da beidaji paputa.”
Ema daja hue quisainiame atana uja:
—Ye Diusu sa quisa cuana yama mi butsepi equisainia.
10 Da su tu butse su ema tururuana tu emitsutsua puji. Beju tuahueda ema uja atana:
—Be tururuji ema butse su, ema mu da mi nime, mique edue cuana nime hue, Diusu sa emebajaji putsu. Diusu bahui mitsutsua taji.
Quebata ja Jesús jepuiti quisaquisa saida cuana equisanetiacuinata su, tueda da Diusu sa ene quita quisaquisa puji.
Caballo pasane bianiji
11 Da su beju cielo tsequed'iajiji yama bana. Piada caballo pasane bataji puana. Caballo bia su piada anina. Tueda banime Ene Quita Quisa Puji. Tuahueda butsepi neje ecuatsasiatani. Tu duininibaji cuana neje emajaiti. 12 Mesa etua detse cuati utsu nime. Mesa echua bia su jucuada corona cuana anitaina. Mesa emata su derejiji anina mesa etsia mimi ebani. Aimue pia cuana ja tueda ebani eshanapatani mahue. Tuahueda bahui eshanapatani. 13 Mesa ejud'uji ami su d'imiajiji puina. Mesa ebani da Diusu sa Mimi. 14 Diusu sa ángel soldado cuana ja caballo pasane bia je cama tije yatani bana. Mecuana sa ejud'uji pasane, chujeneda cama. 15 Mesa ecuatsa jenetia espada queuda cuinanana. Tueda espada neje pamapa ejude cuana nedaneda yatayu. Jubida ecuatsasiata huecuana. Diusu sa jubida duinini putsu, tuahueda tu jei aja mahue cuana jubida ematsetayu. 16 Mesa ejud'uji bia su daja huecha etidada yami su pia mesa ebani derejiji yani. Uja tueda ebani epuani: “Pamapa Echua Puji Cuana sa Echua Puji.”
17 Da su beju pia ángel yama bana id'eti su eneti. Tuahueda aicha diaji cuabetsaji cuana jubida tsiatsia neje ihuatana uja:
—Mepueque. Medhitatique. Diusu ja micuana ebia su emihuata. 18 Beju yahua su echua puji manujiji cuana sa yami micuana etiata mediaque puji. Capitán, deja tucheda, caballo bianiji, manujiji cuana sa yami micuana etiata mediaque puji. Pamapa d'eji su, esclavo, deja aida, deja chidi puji cuana sa yami micuana mediaque puji. Mecuana sa caballo cuana sa aicha di micuana etiata.
19 Da su beju ai senida madhada, yahua sa echua puji cuana yama bana. Tuneda pamapa mecuana sa soldado cuana neje dhitatana caballo pasane bianiji neje, tusa soldado cuana neje di eicheti puji. 20 Beju caballo pasane bianiji ja pishitiametana huecuana. Ai senida madhada inatana. Tusa profeta bid'umimi puji di inatana. Tueda profeta da ai nimetiuda cuana aji puina cristiano cuana ja ai senida madhada pamitsutsuata puji. Equene emata su ai senida madhada sa ebani derejiji cuana ebasea puji ai nimetiuda cuana ataina. Diusu ja ai senida madhada, tusa profeta bid'umimi neje bai azufre neje huarujiji eutsuneti su eid'e ichanubiatana. 21 Ai senida madhada sa soldado cuana pamapa manuametana mesa ecuatsa jenetia ecuinanani espada neje. Da su beju pamapa aicha diaji cuabetsaji cuana ja tueda manujiji soldado cuana sa equita cuana diapetana.