1 Beju beta tsine hue beju anina pascua tsine epu puji. Tueda tsine su pan levadura mahue dia bahue putaina huecuana. Da su sacerdote aida, jacuatsasiati ebuetsuaji cuana ja cuaja Jesús basea putsu, eteriicha puji japibatitana. 2 Tuneda cama uja jaquisatitana:

—Be painatija Jesús pascua tsine su. Ahua daja ecuaneda ya su, cristiano cuana detse janimetipeitita cua.

3 Jesús beju Betania ejude su putiana. Dapia cuinati putsu, Simón sa ete su nubiana. Tueda da Simón Lepraji banime puina. Beju tuneda ediadiatani cama, piada epuna tuna ediadiatani su pueana. Tuahueda alabastro emeji chidi dusetana. Emeji chidi su chujeneda saida puida badeina. Tueda puida nardo banime. Tueda da chujeneda saida puina. Da su epuna ja emeji chidi cuatsad'iatana. Cuatsad'ia putsu, Jesús sa echua bia su puida d'uichatana. 4 Da su piada piada dapia yanita cuana epuna neje duininitana. Tuneda cama uja jaquisabatitana:

—¿Ai puji jia ye epuna ja yanacane d'uichataitia ye chujeneda puida? 5 Ye puida da piada mara pu cue mudu chuje tupu. Ahua ecuaneda iru cua su, dueji chipilu cuana ecuaneseda ani cua puri cuana etsahua puji.

6 Da su Jesús ja uja atana huecuana:

—Be ye epuna med'ayaji. ¿Jucuaja su jia micuaneda tu neje eduininiani? Tuahueda quema puji saida atana. 7 Beju puri cuana micuana neje pamapa hora su yanita. Ai hora papu micuaneseda tsada su saida tsahua cua huecuana. Beju ema mu aimue micuana neje daja yani uteuteti mahue. 8 Ye epuna ja mesa yani tupu ataitia. Puida quema equita bia su d'uichataitia ema papaji pu cua nime. 9 Ene putsu, yama micuana equisainia, quepia papu Diusu sa quisa saida cuana quisaquisa eputani su, ye epuna ja ataitia di quisa eputa tu jiahue quita ataitia pamapa cristiano cuana ja pashanapata puji.

10 Da su piada Jesús sa discípulo Judas Iscariote sacerdote aida cuana peje su putiana cuaja Jesús tuna peje su menajatiame ya equisa puji. 11 Sacerdote cuana ja Judas daja epuani id'aba putsu, beidaji putana huecuana. Da su chipilu etia jamitsuti tiatana huecuana. Da hora jenetia Judas japibapirutiana cuaja Jesús sacerdote cuana peje su emenajatia puji.

12 Beju pascua tsine cuinana. Equene tsine su pamapa cristiano cuana ja huisha janana pascua tsine puji manuametana. Tueda huisha janana irutsuatana huecuana Diusu peje su. Da su discípulo cuana ja quisabatana Jesús:

—¿Quepia mique tsada ecuanaju ebaseta pascua tsine su ediadia puji, pascua tsine yati puji?

13 Da su Jesús ja beitutana beta discípulo detse. Tuahueda uja quisatana tse:

—Meputique ejude su. Dapia piada deja yahui matu jadusuti metseda etsu. Tije meatique tueda. 14 Tueda enubiti ete su, ete emetse echacu. Mequisaque ete emetse uja: “Ebuetsuaji ja mi equisabametani uja: ‘¿Quepia d'eji yani pascua tsine jana edia puji quema discípulo cuana neje?’ ” 15 Da su tueda ete emetse ja diadia jude aida, basetajiji ete ebaque su ebameta. Dapia mebasetaque jana.

16 Da su ejude su putiana tse. Daja cuaja Jesús puana batame, pamapa ai cuana batana tse. Pamapa basetatana tse tsine su puji.

17 Apuda puana su, Jesús, mesa discípulo cuana neje putiana tueda ete su. Beju diadiapirutana huecuana. 18 Ediadiatani cama, Jesús ja quisatana huecuana uja:

—Ene putsu, yama micuana equisainia, micuana duju su piada ja ema emenajatiata sacerdote cuana peje su. Tueda da ema neje upia ediadiani jiahue quita.

19 Da su ebia su jatacuamadhatitana huecuana. Piada piada tuneda Jesús quisabatana:

—¿Yama jia? ¿Ahua yama?

20 Jesús ja jeutsutana huecuana:

—Micuana duju su yani beju. Ema neje dhepe su ediadiani ja da ema emenajatiata. 21 Beju ema sufri yameta huecuana, cuaja Diusu sa quirica su derejiji yani batame. ¡Aba, ema menajatiaji epu deja! Ebia su saida quita tuseda puji, bataji epu mahue puji puina.

22 Da su beju tuneda ediadiatani cama, Jesús ja pan jemitsua putsu, diusulupai Diusu atana. Pan ped'uped'ua putsu, berereatiatana huecuana. Daja ape putsu, atana huecuana uja:

—Mediaque ye pan chidi. Ye da quema equita pu cua nime.

23 Daja mimipe putsu, vinoje emeji jemitsuatana. Diusulupai Diusu a putsu, emeji berereatiatana huecuana. Beju pamapa su jaid'ititana. 24 Da su Jesús ja atana huecuana uja:

—Ye vino da quema ami pu cua nime. Quema ami ed'uichati neje Diusu ja mesa jamitsuti eichacua cristiano cuana etiata. Diusu ja dueji cristiano cuana eperdonatayu, quema ami ed'uichati putsu. 25 Ene putsu, yama micuana equisainia, aimue yama eid'iicha ye vino mahue Diusu ecuatsasiati su eid'i teje.

26 Da su beju tuneda diadiape putsu, Diusu sa puji satsutana huecuana. Satsupe putsu, Olivo murucu aida su putitana huecuana. 27 Dapia cuinati putsu, Jesús ja atana huecuana uja:

—Pamapa micuaneda ema mehua ejusianetia ye dhida su. Daja micuaneda ya, cuaja Diusu sa quirica su epuani batame. Beju uja epuani, “Yama huisha quinaji emanuame su, huisha cuana eberebereatita.” Ema emanu biame, beju eid'eyu. 28 Id'eyu putsu, ema micuana equene Galilea yahua su eputi dapia micuana emitsu puji.

29 Da su Pedro ja Jesús uja atana:

—Echua Puji, pia cuana ja mi ejusianetiata biame, aimue mi yama mu daja ya mahue.

30 Da su Jesús ja tueda jeutsutana:

—Pedro, ene putsu, mi yama yainia, ye dhidha su quitaita da quimisha nuati mida uja emimi: “Mue yama Jesús shanapa.” Huaripa deja queiji mahue su, daja mida epu quimisha nuati.

31 Da su Pedro ja uja jubida atana Jesús:

—Mi neje quema manu taji biame, aimue mi yama ejusianetia mahue. Beju pamapa pia discípulo cuana di dajaputa putana.

32 Da su tuneda putitana pia ania eti jude chidi Getsemaní banime su. Dapia Jesús ja uja quisatana discípulo cuana:

—Meaniuteque upia, ema da Diusu neje emitsutiani tupu.

33 Da su Jesús ja Pedro, Jacobo, Juan cuana tu neje chuadera pad'i dusutana. Beju Jesús ebia su jatacuamadhapirutiana. Ebia su iyuame pupiruana mesa enime su. 34 Uja quisatana huecuana:

—Ebia su da ema etajiatiani. Emanu nime ema ebatiani. Meanique upia. Meid'enique.

35 Da su chuadera pad'i Jesús putiana. Beju yahua su d'epesatiana Diusu emitsupiru puji. Bajatana Diusu curusu su sufri pu taji jenetia d'eji su paata puji. 36 Beju uja Diusu atana:

—Quema Tata, miqueda puji mu pamapa ai cuana atasaida. D'eji su aque ema curusu su sufrimiento epusiu jenetia. Daja biame, mique tsada bahui papu. Be quema tsada mu papu.

37 Da su Jesús jasiapatibana discípulo cuana yanita su. Etahuitasa beju batana huecuana. Da su quisabatana Pedro:

—Simón, ¿a mi etahuisa? ¿Aimue mique tucheda anitia mahue, piada hora dhucuana eid'eni puji? Ene putsu, micuaneda ema buqueja biame, nimepishihue. 38 Beju meid'enique. Janimepitijiji meanique. Diusu memitsuniaque Ishahua ja micuana epirubata mahue puji.

39 Neicha Jesús chuadera pad'i putiana Diusu neje emitsuti puji. Equene Diusu bajatana nime, neicha hue Diusu bajatana. 40 Diusu mitsupe putsu, Jesús jasiapatibana. Neicha etahuitasa huecuana batana. Tahui mecuana sa a taji mahue putsu, beju tahuitana huecuana. Da su cuaja jeutsu taji mahue Jesús batana huecuana, bidhu putsu. Neicha quimisha nuati puji Jesús chuadera puderatiana Diusu neje emitsuti puji. 41 Mitsupe putsu, jasiapatiichana discípulo cuana peje su. Uja quisabatana huecuana:

—¿Ahua micuana etahuisa tsuhu? Beju mejanahuasaque hue. Beju tupu saida, juchaji deja cuana sa eme su ema emenajatiata hora cuinaitia putsu. 42 Menetianaque. Meputija beju. Mechamaque, ema menajatiaji epu deja beju epusiu.

43 Jesús, discípulo cuana neje daja emimiani cama, Judas dueji deja cuana neje puetana. Espadaji, aquiriji metse cama puetana huecuana. Sacerdote, huaraji aida, jacuatsasiati ebuesuaji, tata edhi ehuidusuji cuana ja tueda deja cuana beitutana Jesús painata huecuana puji. 44 Judas ja deja cuana Jesús einati puji uja equene quisatana huecuana:

—Quebata yama ebudhi, beju tueda da Jesús. Meinaque tueda. Saida risieni putsu, medusuenique.

45 Da su Judas ja tipeida nariatana Jesús. “Ebuetsuaji”, yainia je, budhitana. 46 Da su beju deja cuana ja Jesús inatana.

47 Piada discípulo ja mesa espada jemitana. Da neje sacerdote sa emebajaji sa eid'aja siquijusiatana. 48 Da su Jesús ja quisabatana huecuana:

—¿A da micuaneda pueitia ema eina puji espada, aquiriji metse cama? 49 ¿Ai ema tsi puji bata? Pamapa tsine micuana duju su templo su yama buetsuaina biame, aimue micuaneda ema inana mahue. Beju daja epuani ye ai cuana, cuaja Diusu sa quirica su derejiji yani batame.

50 Da su pamapa mesa discípulo cuana jududutana. Jesús jusianetiatana huecuana. 51 Beju piada edeahue ja Jesús tije atana ed'amaji neje bahui babujiji. Tueda di da deja cuana ja inadhaatana. 52 Inadhaatana huecuana su, edeahue jududuana, ebabuji jusiaicha putsu. Beju jahuijati jududuana.

53 Jesús dusutana huecuana sacerdote aida cuana peje su. Dapia da pamapa sacerdote huaraji aida, tata edhi, ehuidusuji jacuatsasiati ebuetsuaji cuana beju jadhitatitana. 54 Pedro uqueda uqueda tije atana Jesús, sacerdote sa echua puji aida sa ete etseque teje. Dapia soldado cuana naja su aniuteana. Tuna neje jayutianina cuati naja su.

55 Pamapa sacerdote huaraji aida, ejude sa ehuidusuji edhi cuana dhitatana. Tuneda cama jaquisabatitana cuaja Jesús tuaquisa putsu, emanuame puji. 56 Piada piada deja cuana ja Jesús tuaquisatana tsapiapiati bid'umimi cuana neje. 57 Tuneda netianatana etuaquisa puji bid'umimi neje. Uja putana huecuana:

58 —Ecuanaju da id'abana Jesús puana uja: “Ye deja cuana sa jamuduti templo yama ejusiautepe. Quimisha tsine su pia templo yama enetianameyu. Tueda aimue deja cuana sa jamuduti mahue.”

59 Beju daja etuaquisatani huecuana biame, aimue mecuana sa jatuaquisati cuana tupupai puana mahue. Beju huaruhuaru mimitana huecuana.

60 Da su sacerdote sa echua puji aida netianana pamapa cristiano cuana butse su. Uja quisabatana Jesús:

—¿Jucuaja su ni miada ye jatuaquisatiji cuana aimue ejeutsuinia mahue?

61 Beju Jesús aimue jajeutsutiana mahue. Da su neicha sacerdote sa echua puji aida ja quisabatana:

—¿A da mida Diusu sa Jabeituti Deja? ¿A da mida Diusu sa Ebacua?

62 Da su Jesús ja jeutsutana uja:

—Ehe, ema da. Diusu aida, tucheda eni sa bai eni bene yani micuaneda ema eba. Buepa su judu duju su ema epusiu micuaneda eba.

63 Da su sacerdote aida ja daja id'aba putsu, mesa ejud'uji d'iud'iujatana, ebia su duinini putsu. Uja quisabatana pia cuana:

—¿Ai puji ni da ecuaneseda pia jatuaquisatiji tsada pu cua? 64 Beju micuaneda quitaita id'abaitia tusa mimi madhada cuana. Tuahueda Diusu madhabatana tusa mimi neje, tueda da Diusu sa Ebacua puana putsu. ¿Cuaja micuaneda epibatiani?

Da hora su Jesús matsetana huecuana pamanu puji.

65 Da su beju Jesús quinaji soldado cuana ja tueda quid'uapirutana equedi neje. Jesús tuarisitana huecuana. Ichepirutana huecuana eme neje. Daja a putsu, quisabatana huecuana uja:

—Shanapaque aiya mi ichetaitia. Quisaque ecuanaju.

Beju daja atana huecuana Jesús.

66 Beju daja ete dume su Jesús yatani huecuana cama, Pedro etseque su aniana. Dapia piada epuneje tu naja su pueana. Tueda epuneje da sacerdote aida sa emebajaji puina. 67 Epuneje ja Pedro eyutiani ba putsu, chamaenitana. Da su epuneje ja Pedro uja atana:

—Mida di Jesús neje puniunetiana. Ema bahue.

68 Beju Pedro ja jeutsutana:

—Yama mue shanapa tueda. Bue mahue ema ai jepuiti mida emimiani.

Da su Pedro taraca etsequeini su netiderana. Da hora quitaita su huaripa deja queiana. 69 Neicha hue epuneje ja Pedro chamaenitana. Chama putsu, quisapirutana pia enetita cuana uja:

—Ye deja da Jesús sa ebuqueji.

70 Neicha hue Pedro uja bid'umimi neje jajeutsutiana:

—Yama mue shanapa tueda.

Da su pad'i dapia echamachamataneti cuana ja quisatana Pedro:

—Enei hue, mida di Jesús sa ebuqueji. Mida da Galilea yahua jenetia ecuanaju mique mimi cuana jepuiti eshanapainia.

71 Da su Pedro jubida mimi madhada neje Diusu bahue puana. Uja atana:

—Yama mue shanapa tueda.

72 Da hora quitaita su beju neicha huaripa deja queiana. Huaripa deja queiana putsu. Jesús sa equene mimi cuana su Pedro japibatiana uja: “Qimisha nuati mida, ‘Yama mue shanapa Jesús’, epu, beta nuati huaripa deja queiji mahue su.” Da su Pedro Jesús sa equene mimi cuana piba putsu, jubida papiruana.