1 Be̱ lá'ana Xránadxu Dios, lue', bénne'du xu'a.

¡Xrana' Dios, szrente̱ nacu' Lue'!

Nacu' zra lanu' da xabáa, ne da xrtante̱.

2 Dxugacu cuinu' xel-la' naxaní' ca zra lanu'.

Dxechilju' xabáa ca tu xu'u ladxe' chiu'.

3 Nunu' lizru' lawe' nisa da ze̱ ná'ala.

Dxuchínenu' beuj ca' ca tu da dxudé xua naga dxe'u Lue',

4 Dxuchínenu' be' ca' ca gubáz chiu' ca',

ne xesa ca' ca we̱n zrin chiu' ca'.

5 Bzua chuchu' xe̱zr la xu nigá lu lane na,

na' quebe nu gaca gutá le̱ na.

6 Bgacu' xe̱zr la xu nigá nen nísadau' ca dxun tu benne'

na' nisa na' bgacu na xi'a ca'.

7 Gate gudil-lu' nisa na', na' bzrunnuj na.

Bebiga na gate ben na chi'u zizraj.

8 Nisa na' bgacu na xi'a ca' xajxedxé na dxu'a xe̱gu ca',

lataj ca' ba nunu' chee̱ nisa na'.

9 Bzu' naga ze lau cheajsé̱ na, naga québedxa gaca te na,

chee̱ québedxa gacu na xe̱zr la xu bizre na'.

10 Dxunu' beaj ca' dxelalaj na dxu'a xé̱gudu ca',

ne xe̱gu ca' dxeledé na ládujla xi'a ca'.

11 Lu xe̱gu ca' dxelé'aj be̱ xixre' ca' nisa,

na' dxegúa na xel-la' dxelebile chee̱ burro xixre' ca'.

12 Lu xaga zaj nnita dxu'a xe̱gu ca' zaj zra' béadu ca'

Dxelúl-laba' ládujla zruze na ca'.

13 Zran xabáa dxesel-lu' xiuj da dxaca na lu xi'a ca',

na' dxezrate̱ xe̱zr la xu na' ca naca da xrlátaje da dxunu'.

14 Dxusegulu' xixre' da dxelagu be̱zre ca',

ne xíxre'du ca' da dxelagu bénneache,

ne da ca' dxuluchine bénneache dxelune̱' xel-la' wagu,

15 ne uva ca' da dxelune̱' xrise uva wal-la da dxuzúa na

ne olivo ca' da dxelune̱' da za da dxelegú'e̱ xíchaje̱',

ne zrua' da dxelune̱' xeta chee̱ xelaca bane̱'.

16 Xaga cedro ca' da zaj zua na xi'a Líbano dxelezíle̱'e̱ na nisa xiuj.

Zaj naca na xaga chee̱ Xránadxu Dios, da ca' guza Le̱'.

17 Lu xaga ca' dxuluzría bxínnedu ca' xrú'uneba',

na' lu zruze na ca' zaj zua lizre bxuze' ca'.

18 Zaj zua chivo xi'a ca' lu xi'a zri'a ca',

na' lu bluaj ca' chee̱ xi'a ca' zaj zua bzrizru' ca'.

19 Be̱nu' beu' da dxulé'e na tu beu' tu beu' chee̱ iza,

na' gubizra núnbea na gate dxal-la' cuía na.

20 Be̱nu' dxe̱la, na' gate bache nachul-la,

na' dxeledxúaj be̱ dxe̱la ca'.

21 Dxelebezre xa'a be̱zre xixre' ca', zaj nauba' be̱ xeláguba'.

Dxelílajba' da nun Dios xeláguba'.

22 Gate dxalaj gubizra, na' dxelexezrinba' lu bluaj chee̱ba',

23 Nadxa dxeledxúaj bénneache dxelune̱' zrin,

na' dxelúnqueze̱' zrin ca dxebía gubizra.

24 Xran, da zante̱ zaj naca da be̱nu'.

Dute̱ xel-la' sina chiu' be̱nu' da ca'.

Nazrate̱ xe̱zr la xu nigá da ca' be̱nu'.

25 Na' zua nísadau', da zri'a, ne da laga,

naga zaj xu'u zánete̱ bea ca', béadu ca', ne be̱ zri'a ca'.

26 Lu nísadau' na' zaj zra' da dxeledá lawe' nísadau' ca'.

Zua be̱ zri'a na' be̱nu' Lue', nazí' laba' leviatán.

27 Xúgute̱ bea ca' dxuluxrén lázreba' Lue',

chee̱ gunézruju' da xeláguba' ca zrin chee̱ na.

28 Dxunézruju' le̱ba', na' dxelecá'aba' na.

Dxunézruju' da dxeláguba', na' dxeléljeba'.

29 Gate quebe dxenná'u-ba', na' dxelezrébeba'.

Gate dxucuasu' be' dxelecá'aba', na' dxeláteba',

30 Gate dxesel-lu' be' chiu', na' xelexaca banba'.

Dxunézruju' xel-la' nabán cube chee̱ da ca' zaj zua

31 ¡Chadía chacanna gaca ba Xránadxu Dios!

Dxezaca ba lazre' Xránadxu chee̱ da ca' ba núnqueze̱'.

32 Dxenné̱'e̱ xe̱zr la xu nigá, na' dxezrú' na.

Dxuté̱' xi'a ca', na' dxeledxúaj na zren.

33 Gúl-laqueza' chee̱ Xránadxu dxácate̱ na' naca bana'.

Xúgute̱ zra zúaqueza' neda' gul-la' da güe lá'ana' Dios chia'.

34 Chawe' naca chia' da ca' dxulaba lazra' ca naca chee̱',

na' dxebéle̱'e̱da' ne̱ chee̱ Xrana' Dios.

35 Welebía xi' benne' dul-la ca' zaj zre̱'e̱ lu xe̱zr la xu nigá,

Na' québedxa cha benne' ca' dxelebéaj xíchaje̱' Dios.

¡Be̱ lá'ana Xránadxu Dios, lue', bénne'du xu'a!

¡Le güe lá'ana Xránadxu!