1 Le da, güe lá'anadxu Xránadxu Dios dute̱ xel-la' dxebé.

Dute̱ xel-la' dxebé gúl-ladxu chee̱ Bénnea' nuzúa chúchue̱'

2 Cheajdxu lau Le̱', ne xe̱dxu Le̱': Xcalenu'.

Dute̱ xel-la' dxebé gúl-ladxu da güe lá'anadxu Le̱'.

3 Naca Xránadxu tu Dios szrente̱,

ne naque̱' Wenná Bea szrente̱ lawe' dios ca' chee̱ bénneache.

4 Dxenná bé'ene̱' du gabí'i xe̱zr la xu,

naga naca situj, ne naga naca sibe chee̱ xi'a ca'.

5 Dxenná bé'ene̱' nísadau' da núnqueze Le̱',

ne cá'anqueze xe̱zr la xu da be̱ne̱'.

6 Le da, gucá'ana szrendxu Le̱', gátadxu sudxú'ala.

Guzú zríbedxu lau Xránadxu, Bénnea' nune̱' dxi'u.

7 Le̱' naque̱' Dios chee̱dxu.

Nácadxu benne' ca' dxuxúequeze̱', ne nácadxu ca zríla'du ca'

8 Che dxenle chi'e̱ na'a zra, quebe gun zide' lázrdaule

ca belún xra xrtáule ca' naga nazí le na Meriba,

ne ca belune̱' lu zra na' le̱'e̱ xixre' lawe' lataj naga

9 naga buluchá'a xra xrtáule neda', ne belune̱' neda' da ste̱be

lácala belelé'ene̱' xúgute̱ da be̱na'.

10 Lawe' chua iza beditaj lazra' chee̱ benne' ca',

na' gunnía': Zaj naque̱' benne' dxelebéaj xíchaje̱' neda',

ne quebe dxelune̱' ca da dxulé'eda' le̱'.

11 Chee̱ le̱ na', dute̱ xel-la' dxezrá'a chia' bzetaj cuina' gunnía':

Quebe xelexú'uqueze̱' naga xelexezí' lazre̱' nen neda'.