1 Za'a lau' Lue', Xran, chee̱ guxru' neda'.

Be̱n québedxa xedué'eda'.

2 Gúcale̱ neda', ne bselá neda' nen dute̱ da naca xrlátaje chiu'.

Bze̱ naga chi'a, ne bselá neda'.

3 Nacu' ca tu xiaj xre naga sua' chawe', na' waca xida'

Gunná be'enu' nu guselá neda', lawe' da nacu' Lue'

4 Dios chia', bselá neda' lu na' benne' ca' zaj nabéaj xíchaje̱' Lue',

ne lu na' benne' ca' dxelune̱' da cale̱la ne zaj naque̱' xichaj zra'a,

5 lawe' da dxebeza lazra' Lue', Xrana' Dios.

Nacu' Bénnea' dxuxúe̱' neda' gate nácatea' bídau'te̱.

6 Lue' núxruquezu' neda' gate gúlajtea'.

Lue' be̱nu' bdxuaja' lu le̱'e̱ xrna'a.

¡Tu güe lá'anazqueza' Lue'!

7 Belexebane benne' zante̱ ca naca chia',

ne ca naca chiu', dxuxúe xánniu' neda'.

8 Be̱n tu gul-lazqueza' da güe lá'ana' Lue',

ne gucá'ana szrena' Lue' du zra.

9 Quebe guzú' neda' chalá'ala gate ba guxrúa'.

Gate ba bedú lazra', quebe gusanu' neda'.

10 Benne' dxeledábague̱' neda' dxelenné̱' chia',

na' benne' ca' dxelezá lazre̱' xelútie̱' neda' belune̱' tuze dizra',

11 dxelenné̱': “Ba bsan Dios le̱'.

Chéajdxu cheajté̱ladxu le̱' lawe' da québedxa nu zua

12 ¡Dios, quebe su' zitu' naga zua'!

¡Dios chia', gudázega gácale̱nu' neda'!

13 ¡Be̱n xelexedué'ene̱'!

“Be̱n xelexenite benne' ca' dxeledábague̱' neda'.”

“Be̱n xelezúa xel-la' stu', ne xeleque zréaje benne' ca'

14 Neda' tu cueza lázrezqueza' Lue',

ne tu güe lá'anazqueza' Lue'.

15 Guzenda' bénneache nacu' xrlátaje,

ne tu guzénzquezda' le̱' ca da be̱nu' bseláu' neda',

láqueze quebe nezda' bal-la lasa bseláu' neda'.

16 Tu guchálajzqueza' chee̱ da zrente̱ da be̱nu' Lue',

ne gusá'a lazre' bénneache chee̱ da xrlátaje cheé̱quezu'.

17 Dios, Lue' bsé̱denu' neda' gate nácatea' bidau'te̱.

Dxulé'eda' bénneache ca naca da zrente̱ da be̱nu'.

18 Dios, quebe gusán lazru' neda' gate bache guxrúa',

Be̱' neda' lataj guzenda' zri'ine zre sua' ca naca

ne guzenda' bi za xelalaj ca naca xel-la' wal-la chiu',

19 ne ca naca da xrlátaje chiu', da naca na da zrente̱, Dios.

Lue' ba be̱nu' da zaj nácale̱'e̱ na zrente̱.

Dios, ¿Núzraqueze ca Lue'?

20 Lue' be̱nu' gudéa' lu da ste̱be zante̱, ne lu da cale̱la ca',

na' gunu' xexaca bana', na' da xula xechisu' neda' lu xe̱dxu ba.

21 ¡Gucá'ana szrendxu' neda',

ne xue zrénquezu' neda'!

22 ¡Cá'anqueze güe lá'anaqueza' Lue', quínnia' da gul-lale̱na'!

¡Dios chia', gúl-laqueza' chee̱ da li chiu', quínnia'

¡Nacu' Benne' Lá'azxa chee̱ benne' Israel ca'!

23 ¡Sua' lu da ba neza gate gúl-laqueza' chiu' Lue',

ne béqueze bénne'du xu'a, bénne'du' bexa'u!

24 ¡Tu guchálajzqueza' chee̱ da xrlátaje chiu' te zra chizrela,

lawe' da be̱nu' belexedué'e, ne guleque zréaje

benne' ca' belune̱' ba xuzre xelune̱' chia' da cale̱la!