25
1 Xran, dxennía' Lue' dute̱ lázrdawa'.
2 Dxuxrén lazra' Lue', Dios chia'.
Quebe gu'u lataj xedué'eda'.
Quebe gu'u lataj benne' dxeledábague̱' neda' xuluzétaje̱' neda'.
3 Da líqueze, benne' ca' dxelebeza lazre̱' Lue'
quebe xeleque zréajene̱'.
Xeledué'e benne' ca' dxeledábague̱' xrtizru'.
4 Xran, ble'e neda' da dxaca lazru' guna'.
Ble'e neda' da dxezaca ba lazru' guna'.
5 Bse̱de neda' guna' ca naca da li chiu'
lawe' da nacu' Dios dxuseláu' neda'.
Tu dxebeza lázrezqueza' Lue'.
6 Bsa lazre', Xran, gacu' zri'i lazre',
ne xexache lazru' chia' cáte̱ze da dxúntequezu'.
7 Quebe chajsá lazru' dul-la da be̱na' gate ne naca'
benne' cuide', ne ca gudábaga' xrtizru'.
Nen dute̱ xel-la' dxexache lazre' chiu', bsa lazre' neda',
ne nen dute̱ xel-la' zri'i lazre' chiu', Xran.
8 Xrlátaje, ne li lazre' naca Xránadxu Dios.
Chee̱ le̱ na' gusé̱dene̱' benne' dul-la ca' da dxal-la' xelune̱'.
9 Gulé'ene̱' benne' dxexruj lazre' ca' da xrlátaje da xelune̱',
ne gusé̱dene̱' benne' zren lazre' ca' da xelune̱'.
10 Lu xel-la' dxexache lazre',
ne lu da li dxeché̱ Xránadxu benne' ca' dxelune̱'
ca naca xel-la' wezría chee̱', ne ca da dxuse̱de Le̱'.
11 Lawe' da dxunu' ca da ba gunníu', Xran,
gunite lau' ca naca dul-la nuna', da naca na zren.
12 ¿Nu benne' dxezrebe̱' Xránadxu Dios?
Le̱' gusé̱dene̱' benne' nigá da dxal-la' gune̱'.
13 Gaca chee̱' tu da ba neza zrente̱,
na' zri'ine zre sue̱' gaca chee̱be' xe̱zr la xu.
14 Xránadxu Dios naque̱' tuze nen benne' ca' dxelezrebe̱' Le̱',
na' gune̱' xelúnbe'e̱ xel-la' wezría chee̱'.
15 Tu dxennázqueza' Xránadxu Dios
lawe' da guselé̱' neda' lu na' benne' ca' dxelaca lazre̱' xele̱l-le̱' neda'.
16 Gunná' neda', ne bexache lazre' neda'
lawe' da zua' tuza', ne dxezaca zi'a.
17 Naxánle̱'e̱ da ste̱be da zaj zua lázrdawa'.
Bselá neda' lu da ste̱be zua'.
18 Gunná' ca dxezaca zi'a, ne ca dxunle̱'a zrin,
na' bnite lau xúgute̱ dul-la da nabaga'.
19 Gunná' benne' ca' dxeledábague̱' neda' ca naxánle̱'e̱ne̱',
ne ca dxelecuídele̱'e̱ne̱' neda'.
20 Bxue bénne'du xu'a, ne bselá neda'.
Quebe gu'u lataj xedué'eda' lawe' da dxuxrén lazra' Lue'.
21 Zaj nuxru da xrlátaje, ne xel-la' li lazre' neda'
lawe' da dxebeza lazra' Lue'.
22 Dios, bselá benne' Israel ca'
lu xúgute̱ da dxelezaca zi'e̱.