1 Dxulé'e lau zran xabáa ca naca xel-la' szren chee̱ Dios.

Dxuchálajqueze na ca zaj naca da nune̱'.

2 Tu zra tu zra dxuzén na zra xula da nigá,

na' tu zre' tu zre' dxe̱ na zre' xula da ná'queze.

3 Quebe dxuluchine na xrtizra' bénneache,

ne quebe nu dxen chi'i na,

4 san dxezriluj da dxelenná na du gabí'i xe̱zr la xu,

ne dxelezrín xrtizra' na dapa saca chee̱ xe̱zr la xu.

Dios be̱ne̱' xabáa ca tu xu'u naga zua gubizra.

5 Che zílala dxalaj na ca tu benne' wechaga na'.

Dxebé na ca tu benne' dxezá chégüe̱' lu witja.

6 Dxedxuaj na chalá'a naga dxalaj na,

na' dxezrín na chalá'a naga dxebía na.

Dxuchá'a na xúgute̱ da zaj de̱.

7 Du lazre' naca da nadxixruj bea Xránadxu,

ne dxuzé̱ chacha na bénne'du xú'udxu.

Li lazre' naca da dxexeche̱be Xránadxu,

ne dxunezruj na xel-la' sina chee̱ benne' ca'

8 Da líqueze zaj naca da nadxixruj bea Xránadxu,

na' dxelebéle̱'e̱ benne' ca' dxelune̱' ca zaj naca na.

Du lazre' zaj naca da dxuzéajni'i Xránadxu dxi'u,

da dxuluzúa na dxi'u lu xel-la' naxaní'.

9 Cháwedau' naca zrébedxu Xránadxu,

da gun na súadxu chadía chacanna.

Da líqueze zaj naca da dxuchi'a Xránadxu chee̱dxu,

ne zaj naca na chawe'.

10 Zaj naca na da dxezá lázredxadxu ca oro,

Zaj naca na zíxredxa ca bzrína'dau', da nácale̱'e̱ na zixre.

11 Dxulusizre na neda', we̱n zrin chiu'.

Lawe' da dxuna' ca zaj naca na, da zrente̱ dxezi'a.

12 Netú benne' quebe gaca lé'ene̱' da cale̱la da dxune̱'.

Bselá neda', Xran, lu da cale̱la da quebe dxéquebe'eda' dxuna'.

13 Bucache chawe' neda', we̱n zrin chiu',

chee̱ quebe bi dul-la guna' du lazra'.

Quebe gu'u lataj nna be'e dul-la neda'.

Nadxa gaca' du lazra', ne quebe baga' zria chee̱ dul-la na'.

14 Gaca da dxuchálaja', ne da dxulaba lazra'

da dxezaca ba lazru' Lue', Xran

Nacu' Benne' dxuxúe̱' neda', ne Benne' dxexá'ue̱' neda'.