3
(5) Sardi zomator gese
1 “Sardi ṭaunor zomator firistar gese leḳo: Allar shat nomunar ruh ar shatṭa tera zein doria raḳsoin, tain oḳan ḳoira,
“Tumrar ḳam-ḳaz to ami zani. Tumra zinda aso ḳoria tumrar bout shunam ase, oile ashole to tumra murda. 2 Tumra hozag oia uṭo, ar bad-baki zotota morar foti oigese, itare bol zugao. Huno, amar Allar samne tumrar eḳan ḳamo ami shoṭik deḳsi na. 3 Erlagi tumra zeta faiso ar zeta huncho, ota iad raḳo ar amol ḳoro. Tumrar oḳonkur halot taki dil bodlao. Tumra zudi hozag na o, te ami suror laḳan lukaia aimu, kun bala tumrar gese aimu, tumra ṭeru faitae nae. 4 Te ou Sardi zomato tumrar ola ḳoezon manush asoin zerar lebaso kunu kut nai, mani tarar sal-cholon ḳarafir bae gese na. Tara forezgar bonda, erlagi tara forishkar dola lebas findia amar loge sola-fira ḳorba. 5 Ze zon zoei oibo, he ola dola lebas finbo. Aḳerator zindegi ḳata taki tar nam ami kunudino fustam nae. Borong amar gaibi baf ar tan firista oḳolor samne ami tare amar ḳoia shikar ḳormu.
6 “Zar ḳan ase he hunouk, Pak Ruhe zomat oḳolre kita bataira.
(6) Filadelfia zomator gese
7 “Filadelfia ṭaunor zomator firistar gese leḳo: Zein hok ar fak-fobitro, zen ato Bashsha Daud nobir sabi ase, zein kulle ar ḳeu bond ḳorto fare na, ar bond ḳorle ḳeu kulto fare na, tain oḳan ḳoira,
8 “Ami to tumrar ḳam-ḳaz zani. Huno, ami tumrar samne eḳan duar kula raḳlam, ikan bond ḳorar ḳemota ḳeuror nai. Ami to zani, tumra kub ḳomzur, erbadeo tumra amar hukum amol ḳorso ar amare oshikar ḳorso na. 9 Zera Ihudi ḳoia nizor forisoe dey otoso ashol Ihudi nae, Iblis-shoetanor dolor hou beiman oḳolre ami tumrar gese anaimu, tumrar fao-o dorai ḳodombusi ḳoraimu, ar tarare zanai dimu ami tumrare mohobbot ḳori. 10 Tumrare sobor ḳorar lagi ami ze hukum dislam ita tumra mancho; erlagi i duniar ufre mosibotor ze shomoe aia azer, hou shomoe taki ami tumrare hefazot ḳormu. Duniar manshore forikka ḳorar lagi ou mosibotor shomoe aibo.
11 “Huno, ami kub zoldi airam. Tumrar zeta ase otare mozbut ḳori doria raḳo, zate tumrar zoeor mala ḳeu ḳaṛia nito na fare. 12 Ze zon zoei oibo, tare ami amar Allar goror eḳṭa kuṭi banaimu, he ar kunudin baroia zaito nae. Ami tar ufre amar Allar nam ar Allar ṭaunor namo leḳmu. Hou ṭaun oilogi noea Zeruzalem. Behestor maz taki, amar Allar daro taki hou ṭaun lamia aibo. Ar ze zon zoei oibo, tar ufre ami amar noea namḳano leḳmu.
13 “Zar ḳan ase he hunouk, Pak Ruhe zomat oḳolre kita bataira.
(7) Laodikea zomator gese
14 “Laodikea ṭaunor zomator firistar gese leḳo: Zen nam amin, zein hok-halal shakki, zein Allar foeda ḳora hokkoltar mul kuṭi, tain oḳan ḳoira,
15 “Tumrar ḳam-ḳazor ḳota to ami zani. Tumra oilae na ṭanḍa, na gorom. Tumra hoe ṭanḍa na oe gorom oile bala oilo one. 16 Oile tumra to umli gorom, na ṭanḍa, na gorom, erlagi ami amar mukor sefor laḳan tu ḳori tumrare falai dimu. 17 Tumra to ḳoirae, tumra bout doni, tumra boṛoluk oigeso, erlagi tumrar kuntar obab nai. Ita kub bala ḳota, oile ashole to tumra buzrae na, tumra kub duki, ḳangal, gorib, anda ar lemṭa aso. 18 Erlagi ami tumrare ou ufodesh diram, aguindi zalail ḳaṭi shuna tumra amar ges taki loia neo, zate tumra hasaror doni oitae faro. Amar ges taki dola lebas loia nia findo, teu tumrare ar lemṭa deḳa zaito nae. Amar ges taki sokut laganir shurma loia neo, teu tumra hasaror souke deḳbae.
19 “Huno, ami zerare maea ḳori, tarar dush-tiruti deḳai dei ar shashono ḳori. Erlagi tumra umli gorom taki fura gorom oia touba ḳoro. 20 Zano ni, ami duaror gese ubaia duaro ṭukairam. Amar golar aoaz hunia zudi ḳeu tar duar kulia dey, te ami tar bitre hamaimu, tar loge ḳana-dana ḳaimu ar he-o amar loge ḳana-dana ḳaibo. 21 Ami zela zoei oia amar gaibi bafor loge tan fobitro aroshor kursit boisi, ṭik ou laḳan ze zon zoei oibo, tareo ami amar loge amar kursit boar odikar dimu.
22 “Zar ḳan ase he hunouk, Pak Ruhe zomat oḳolre kita bataira.”