1 Musae tan hour Madiani imam sab Shuaibor sagol-meṛa raḳta. Eḳdin tan sagolor fal loia morubumir hesh galat Allar faṛ Turor ḳasat gela. 2 Hono eḳ zonglar maze Mabudor firistae agunir laḳan nuror maz taki tanre deḳa dila. Musae deḳla, zonglar maze aguin zoler otoso zongla zoler na. 3 Ou tain taijjub oia ḳoila, “Zongla ze zoler na er ḳaron kita? Te aro ḳasat gia deki sain.”

4 Mabude zebla deḳla ein deḳar lagi ḳasat zairagi, ou shomoe tain zonglar maz taki ḍakia ḳoila, “Musa, O Musa!” Musae ḳoila, “Ounu ami.” 5 Allae ḳoila, “Ar samne aguaio na. Tumar fao taki zuta kulilao. Zano ni, tumi oḳon ze zagat ubaiso ikan faḳ zaga. 6 Huno, ami tumar bafor Alla, Ibrahimor Alla, Isʼhakor Alla ar Iakubor Alla.” Ikan huniau Musae tan muḳ lukailla. Allar bae saite tan dilo ḍor hamaigelo.

7 Mabude formaila, “Ami Mishor desho amar bonda oḳolor duḳ-mosibot dekiar. Mishori shordar oḳolor lagi tarar ḳandon huniar. Tarar duk-koshṭo hoḳolta ami deḳsi. 8 Dekia Mishori oḳolor zulum taki tarare basaitam ḳori ami nize lamia aisi. Te ami tarare Mishor taki horaia nimugi. Nia roshail zomir bout boṛo shundor eḳ desh dimu. Ikan dud ar mour banḍarala desh. Ou desh oilo oḳonkur Kenani, Hiṭṭi, Amuri, Farizi, Hibbi ar Zibuzi oḳolor desh. 9 Boni Israilor foriad amar dorbaro aise, Mishori oḳole tarare zela sataira, ita ami dekiar. 10 Erlagi ami tumare Feraunor gese faṭaiar. Tumi zao, gia amar bonda Boni Israilre Mishor taki bar ḳoria ano.”

11 Musae zuaf dila, “Ami aroḳzon ḳe, zein Feraunor samne gia Mishor desh taki tarare horaitam farmu?”

12 Allae ḳoila, “Ami to tumar loge loge roimu. Tumi Mishor taki manshore horaia ania, tarare loia ou faṛo amar ebadot ḳorbae. Teu buzbae amiu tumare faṭaisi.”

13 Musae aroz ḳorla, “Deḳoukka, ami zebla Boni Israilre gia ḳoimu, tumrar baf-dadar Allae amare bezisoin, ou shomoe tara zudi zikain tan nam kita, te tarare kita zuaf ditam?”

14 Allae ḳoila, “Ami zein asi, asiu. Boni Israilre oula ḳoio, zen nam ‘ami asi’ tain amare tumrar gese bezisoin. 15 Tumi gia tarare ḳoio, ‘Mabud’ zein hor-hamesha asoin, ein tumrar baf-dadar Alla, Ibrahimor Alla, Isʼhak ar Iakubor Alla, einu amare tumrar gese bezisoin. Amar hor-hameshakur nam ‘Mabud, zein asoin’. Zuge zuge, purushe purushe ou nam ḳaim roibo. 16 Tumi zao, gia Boni Israilor murobbi oḳolre eḳano dola ḳoria ḳo, Mabud, zein tarar baf-dadar Alla, Ibrahimor Alla, Isʼhak ar Iakubor Alla, tain tumare didar dia ḳoisoin, ami tumrar bae kial ḳorsi, tumrar uforor zulum-mosibot deḳsi, Mishoro tumrar bae zeta ḳora or eota kial ḳorsi. 17 Ita dekia ami ḳoiar, ami Mishoror gulami taki tumrare basaia Kenani, Hiṭṭi, Amuri, Farizi, Hibbi ar Zibuzi oḳolor dud ar mour banḍarala desho nimugi.

18 “Israilor murobbi oḳole tumar ḳota hunba, tumi tarare loge loia Mishoror bashshar gese zaio. Gia ḳoio, ‘Mabud, zein Ibrani oḳolor Alla, tain amare doroshon disoin. Erlagi amra tan name eḳan kurbani ḳortam saiar, amra morubumir bae tin dinor fot gia kurbani dimu, te amrare zaoar onumoti deukka.’ 19 Oile ami zani Mishoror bashshae tumrare zaite dito nae, zur-zobordosti ḳorleo dito nae. 20 Teu ami amar kudroti at lagaimu ar oula asanoḳ gozob nazil ḳormu, zate he tumrare zaite dey. 21 Ar ami Mishori oḳolor dilor maze Boni Israilor bae emon eḳ doyar bab foeda ḳoraimu, era zanu Mishor taki ḳali ate na zain. 22 Hoḳol Israili beṭinte tarar ari-fori ba zerar baṛit tara roin, oula Mishori beṭintor ges taki tarar shuna-rufar goena-gaṭi ar bala ḳafoṛ-sufoṛ ḳuzia nio. Ota dia tumrar fua-fuṛinreo hazaio, ou nomunae tumra Mishorintor don-samana doḳol ḳorbae.”