Ⅰ Pɔɔl, Silasɩ nɩ Timoti lɛ sɛɛrɛ a gãn nyã kʊrɔ Tɛsalonika pupuorbiir na be a Sãa Nãaŋmɩn nɩ a Soro Yesu Kɩrɩsɩto 'yɔ̃ɔ. Wãɛfʊ nɩ nyã'maar wʊ be a yɩ sɛ̃.

Ⅱ Sɩ ma puor Nãaŋmɩn yãan sɔ̃ɔ jaa kʊ yɩ, tɩ ma tara a yɩ tɩɛr a sɩ Nãaŋmɩn sʊɔrfʊ pɔ. Ⅲ Sɔ̃ɔ jaa lɛ sɩ ma tɩɛr a yɩ sɔɔfʊ tʊ̃mɔ̃, a yɩ nʊ̃fʊ tʊ̃mɔ̃ nɩ a kãnyir yɩn tara chɛlɛ a sɩ Soro Yesu Kɩrɩsɩto nɩ a sɩ Sãa Nãaŋmɩn.

Ⅳ Bojũu sɩ bɔ̃ɔn ɩka, n yɛɛr a yɩn a Nãaŋmɩn na nʊ̃, 'lɔ lɛ kaa ir yɩ. Ⅴ Bojũu a sɩ 'yɛr nʊ̃ɔ na wa a yɩ sɛ̃, ba ɩ 'yɛrbir tɛɛ ɛ, tɩchɛ wʊ tara na kpɛ̃ɔ na ɩ a Nãaŋmɩn Sɩɛ na ba ɩ baal ɛ. Yɩ mãɛ bɔ̃ɔn a lɛ sɩn be a sɔ̃ɔ 'lɔ sɩn dɔ̃ɔ kpɩɛrɛ nɩ yɩ a yɩ jũu. Ⅵ Yɩ ɩ naa a sɩn nɩ a Soro tɔtɔɔrbɔ, bojũu dɔɔyɛ kpɛ̃ɛ pɔ lɛ yɩ tu tɩ de a 'yɛrbie nɩ pʊpɛl a Nãaŋmɩn Sɩɛ na tɩr, Ⅶ lɛ lɛ, yɩn ɩ bʊ̃mansɩ kʊ a bala na sɔɔ de a 'yɛr nʊ̃ɔ be a Masedonɩya nɩ a Akaya tẽn pɔ.

Ⅷ Yɩn lɛ yaar a sɩ Soro 'yɛrbie, a ba ɩ a Masedonɩya nɩ a Akaya tẽn pɔ tɛɛ ɛ, tɩchɛ a yaar jie jaa. A lɛ yɩn sɔɔ a Nãaŋmɩn yaar jie jaa. Ⅸ Ba mãɛ lɛ man a lɛ yɩn tuor de sɩ, a sɔ̃ɔ 'lɔ sɩn wa a yɩ sɛ̃, nɩ a lɛ yɩn lɩɛb wa a Nãaŋmɩn sɛ̃, tɩ bar a tɩbɛ tɩ wa puoro a nyɛvʊr nɩ a yelmãɛ Nãaŋmɩn, Ⅹ tɩ chɛlɛ a wʊ Bie ka wʊ yi saaju wa, a 'lɔ wʊn vɛ̃ ka wʊ lɩɛb ir a kũu pɔ, Yesu a 'lɔ na faa sɩ yɩn a Nãaŋmɩn suur 'lɔ na waara pɔ.