5
Emo libro equia aronea
1 Dios que libro quereco quia oo cuu ra. Uquiatocuti que enunuɨ trono tose ra. Libro mbesa ji. Equitera quiti abe que embesa ji ra. Siete sellos je que ematã ji ra. 2 Angel quirãcuã mo ngue ñee nda. —¿Aba ra sellos ndoso libro equia re? ɨ que ángel ñeemombo ra. 3 Mbia mo ngue sellos ndoso aroneate ra. Ibatenda. Ibi jenda. Ibiqui rɨɨnda. Ũquɨ̃ mo ngue sellos ndoso aroneate cuu ra. Nyebe mbia riqui nguiã mae aroneate libro rese. 4 Nyebe que acheseo tuchɨ cuu ra. Mbia ja libro equia aronea mose. Mbia ja mae aronea mose erese. 5 Ũquɨ̃ ameɨ mo ngue ñee seje ra. —Erecheseochɨ̃ nguiã. Jesucristo ra libro equia. Ae quia equirãcuãte re. Ae quia Dios chiirabo rerecua tuchɨ re. David riirĩ tuchɨ chõ ae re. Ae quiatu que mbae rasi saã tuchɨ mbia ɨcuã ndiquicharõ nda. Ae quia ra sellos ndoso. Ae quia ra libro equia, ɨ que ameɨ ñee seje cuu ra. 6 Jesucristo que chɨ̃ huee cuu ra. Oveja ɨquia ji rã ngue eñɨ seje huee cuu ra. Siete que erambashɨ̃ nda. Siete que eresa no nda. Siete eresa rei Espíritu Turã. Sã Espíritu Turã mae mbae ja rese no. Jesucristo que chɨ̃ Dios ruba quiti ra. Mbae reco cuatro joõ ngue eñɨ nda. Ameɨ abe joõ ngue eñɨ no nda. 7 Dios que libro mondo Jesucristo oo cote ra. Dios chɨ̃ mose trono tose. 8 Jesucristo libro isi mose que ũquɨ̃ mbae cuatro ngoi ngũíã ndese ejii ra. Ameɨ veinticuatro rese. Arpas que ameɨ quereco reco ja ra. Mbae riru oro ao ji abe no. Incienso resebe. Incienso, ɨ que mbae mbushɨmbusa oquieɨ mose ra. Dios quiato ñee mose Dios je, eɨ̃ sɨ́ chõ incienso ee re. 9 Ũquɨ̃ ameɨ ngue ɨraseɨ raseɨ canto yasu mo je ra. Ã ño ngue ɨraseɨ raseɨ nguiã:
Nd e que mbia ndeɨquia ra.
Nde que mbia mangue chooñoa jenda ereisi Dios mbaerã nda.
Mbia cheemo ja ja eriqui nae, ũquɨ̃ abe que ereisi ja Dios mbaerã no nda.
Mbia mbuae ja abe no.
Nyebe nde mɨɨ ño libro ereisi arõte nguiã co.
Nde mɨɨ ño sellos erendoso arõte nguiã co.
Libro rese mae sacuã.
10 Nde que uremɨɨ Dios rimbarã nda.
Ure mbae raã naa sacuã Dios je.
Mbia ibi jenda rerecuarã nda ureɨco cote,
ɨ que ameɨ ɨraseɨ raseɨ Jesucristo je ra. 11 Angeles cheẽ ngue achandu cot e ra. Angeles que chɨ ũquɨ̃ mama tuchɨ cuu ra. Dios mama. Mbae reco cuatro abe mama. Ameɨ veinticuatro abe mama no. Angeles tubɨrɨã tuchɨ que ra. Millones y millones tuchɨ que ángeles ra. 12 Ũquɨ̃ ngue ñee nyecuate Jesucristo je re:
Oveja riirĩ na ño ereɨco nguiã nde.
Mbia que ndeɨquia mbae ɨcuã ndiquicharõ nda.
Nyebe mbia riqui nguiã ñee turãte ndeje co cote.
Nyebe mbia riqui nguiã ñee turãte nderɨɨ̃ co cote no.
Ndequirãcuã nɨɨ. Ndeaquiatu rɨɨ̃ abe no,
ɨ que ángeles ñee turã Jesucristo je cuu ra. 13 Mbae que ñee turã jate quia Jesucristo rɨɨ̃ cuu ra. Ibatenda ñee turã ja erɨɨ̃. Ibi jenda abe no. Ibiqui rɨɨnda abe no. Ama ndɨsha rɨɨnda abe no. Eɨ̃ ngue ũquɨ̃ nguia ñee turã jate Jesucristo je ra. Dios abe je:
Jẽquirãcuã jẽɨngo beɨte ã.
Mbia rerecua jẽɨngo beɨte ã no.
Mbae jenyɨao ra ñee turã mbeɨte quia jẽje,
ɨ que Dios chɨao quia ñee jate ee cuu ra. 14 Ae beɨte, ɨ que mbae reco cuatro ra. Ameɨ veinticuatro abe que ngoi ja ngũíã ndese ñee turã Dios je ra. Ae ereco siqui beɨte quia co, aque je.