8
Jesupi Maijaꞌquë Huajë Ca Nëoseꞌeja̱ꞌa Cacaiquë Api, Maire
1 Siꞌaye yëquë caseꞌe ëjarepa iye aꞌë. Payë, Maijaꞌquë huëꞌe ñacai Ëjaëre pare, Maijaꞌquë ñuꞌico ëja te̱ꞌtere ñuꞌina, jeto maꞌtëmore. 2 Pa̱i nemaꞌ huëꞌere paꞌiji, i̱ore pani, Maijaꞌquë nesi huëꞌere, ja̱rote paꞌi Maijaꞌquë huëꞌe ñacai Ëjaë sëte, Maijaꞌquë huëꞌe ñacai paꞌiji. 3 Maijaꞌquë huëꞌe ñacai ëjaohuaꞌi cato, Maijaꞌquëna i̱siseꞌere i̱sijë, cuiꞌne nëicohuaꞌire huani ëojë se̱jaꞌcohuaꞌini nesicohuaꞌipi paꞌiyë. Ja̱je paꞌina, Jesucristoje̱ i̱ i̱si ja̱ꞌñe paye paꞌiji. 4 Ja̱je paꞌina, i̱pi iye yejare paꞌiquë pani Maijaꞌquë huëꞌe ñacai Ëjaë deꞌoye pa̱raꞌpi, tsoe Moisés cua̱ñeseꞌeje̱ paꞌye yoꞌojë i̱sicohuaꞌipi Maijaꞌquë huëꞌe ñacaicohuaꞌi jai pa̱i paꞌito me paꞌiquëꞌni. 5 I̱ohuaꞌi cato ca̱ꞌnipi nesi huëꞌena Maijaꞌquë ayere necaicohuaꞌi aꞌë, maꞌtëmo paꞌiye ayere cuasajë yoꞌo coꞌamañapi, pa̱i toꞌouje̱ paꞌyepi. Ja̱je paꞌina, Moisés huëꞌere ne huëo maca Maijaꞌquëpi capi, i̱te: “Yëꞌë mëꞌëre jeto ai cu̱tihuë i̱ñoseꞌeje̱ paꞌiore nejëꞌë.” 6 Ja̱je paꞌiquëtaꞌare mai Ëjaë Jesucristo Maijaꞌquë huëꞌe ñacai Ëjaërepa cato, ja̱ohuaꞌi yoꞌoseꞌe se̱ña maca deꞌoyere pare yoꞌoquë paꞌiji, huajë cuasa nëoseꞌere. Ja̱ huajë ca nëoseꞌe cato, deꞌoyere pare i̱sija̱ꞌa coꞌamaña quëꞌye aꞌë. Ja̱ꞌnë ca nëoseꞌe se̱ña maca paꞌye aꞌë.
7 Duꞌru macarepa ca nëoseꞌepi nuñerepa yoꞌoye paꞌito ti̱jupë yeque ca nëoñe peoraꞌpi. 8 Ja̱je paꞌina, Maijaꞌquëpi nuñe yoꞌomaꞌcohuaꞌire pa̱ire ñani capi:
Yequë muꞌseña Israel pa̱ire,
cuiꞌne Judá tsëcapëre huajëye yoꞌo ja̱ꞌñe ca nëoñe paꞌija̱ꞌcoa.
9 Jeto Egípto yejapi mësaru aipëre jë̱tëna tse̱ani etoni sa maca,
ca nëoseꞌeje̱ paꞌye ca nëoñe peosipi:
ja̱ohuaꞌire cato yëꞌë ca nëoseꞌe deꞌoye sehuocaiye pa̱si doꞌire je̱ocohuë, caji, Ëjaëre papi.
10 Ja̱ muꞌseña tëto sai maca Israel pa̱ire yëꞌë ca nëo ja̱ꞌñe iye aꞌë caji, Ëjaërepa.
I̱ohuaꞌi cuasa hue̱ꞌñana yëꞌë cua̱ñeñere tëocasiꞌi,
cuiꞌne i̱ohuaꞌi joñoana toyasiꞌi,
ja̱ maca yëꞌë paꞌija̱ꞌquë aꞌë, i̱ohuaꞌi Diusu
cuiꞌne i̱ohuaꞌi paꞌija̱ꞌcohuaꞌi aꞌë, yëꞌë pa̱i.
11 Ja̱ maca cato tsi̱ mañaje cuiꞌne aiohuaꞌije̱ siꞌaohuaꞌi yëꞌë coca asacohuaꞌiseꞌe paꞌija̱ꞌcohuaꞌi aꞌë.
Ja̱je paꞌijëna, mai Ëjaë cocare asajë̱ꞌë, cajë yecohuaꞌipi cajeohuaꞌipi,
pa̱nitaꞌa teꞌe tsëcapë acohuaꞌipi yeꞌyañuꞌu cajë yoꞌoye peosipi,
tsoe yëꞌëre i̱re pani pa̱i ñape asa doꞌire.
12 Cuiꞌne yëꞌëpi i̱ohuaꞌi coꞌaye yoꞌoseꞌere oni yejecani ti hua̱nëyeja̱ꞌquë aꞌë,
cuiꞌnare cuasa co̱ñe peoyerepa.
13 Ja̱je paꞌina, huajëyere Maijaꞌquëpi ca nëoni, duꞌru ca nëoseꞌere ai coꞌamañaꞌë caji. Ja̱je paꞌina, ai coꞌamaña cato peo hue̱ꞌña esa caraja̱ni huesë ja̱ꞌñe aꞌë.