61
Suŋuuŋ to ŋeer ee tau ileep malau pa nugh tooni
Mbouŋ to David
Ŋeer tau imuuŋ pa mbouŋ na, aat isaav pa tamtamon to tirav gita ve timbou mbouŋ tane
1 O Maaron, ulooŋ taŋiiz tsiau.
Ughur taliŋam pa suŋuuŋ tsiau tane, ve uul ghau.
2 Pa aazne, yau naleep malau kat pa nugh tsiau,
ve roiŋ tiina igham ghau le tapirig isov.
Tauvene napoi ghom naghe uul ghau.
Ugham ghau nazala maetaaz ta saaŋa we. * Ŋgara siriv tighe maetaaz tau ŋeer tane isavia, ene loloz Zion tau rumei to Maaron iyooz izala na. Ve siriv tighe maetaaz tawe izaa to Maaron tauu.
Leso gabua eta ivaghamun ghau sov, ve naleep poia.
3 Pa yo ta umin niag to yoŋgaaŋ.
Yo uponpoon ghau pa koiagŋa imin ruum ariaaŋa tau daaba malaua na.
4 Yau naŋuzuuv naghe le naleep ila balbaal tsio loolo, ve namin loom payo irau saawe.
Yau naghe nalat tsio ve upoon ghau imin tatareek ipagud natŋa ila baage saamba.
5 Maaron, saveeŋ tau nambua tomani ghom na, yo ulooŋa wa.
Yes tau tiroi payo ve titaghon ŋgar tsio na, yo ughamgham gabua popoia pazi imin lezi motot. Gabua tawe, yo ugham payau paam.
6 O Maaron, useeŋ saawe to kinik tsiei.
Nighe i ileep tauvene taghon taghon gha ila.
7 Nighe i ileep ila niia to ghamuuŋ pooz ila naghom, ve igham pooz irau saawe.
Yo lolom isaghav tamtamon tsio ariaaŋ ve uluul zi. Ve saawe isov, utataghon saveeŋ mbuaaŋ tsio.
Tauvene matam pa kinik tsiei, ve uŋgini ileep poi. * Lu 22:69; Ep 1:20
8 Isaav ighe yo ugham tauvene, yau aat nambou to napait ezam irau saawe.
Ve mataaz ta naol ne, yau pale nagham uratoi saveeŋ tau nambua tomani ghom na, leso anooŋa ivot.
*61:2: Ŋgara siriv tighe maetaaz tau ŋeer tane isavia, ene loloz Zion tau rumei to Maaron iyooz izala na. Ve siriv tighe maetaaz tawe izaa to Maaron tauu.