21
Sambam ve taan paghpaaghu
1 Ra matag ila le naghita sambam paaghu ve taan paaghu. Pasaa, sambam ve taan tau tivot imin maata na, tilalez wa. Ve te tauvene paam, igheen muul mako. * Is 65:17; 2Pe 3:13
2 Ve naghita nugh patabuyaaŋ to Maaron igheen tooni ta sambam we, ve izilam. Nugh tawe, ene Yerusalem paaghu. I igharaat ghi le paghuuna kat, imin livaa tau ighe ila pa vaiŋ tamoot tau tisiigho pani na. * Is 61:10; Ga 4:26; Hib 12:22; Syg 19:7
3 Ra nalooŋ bobaaŋ tiina ivot ila Maaron niia to ghamuuŋ pooz ve ilam ighe: “Aghita. Maaron ighur niia to lepoogh igheen ila tamtamon sosozi wa. Aazne ve ila, i pale ileep tomani zi ve imin Maaron toozi. Ve yes timin i le kat, ve tivalupu zi timin eemon. * Wkp 26:11+; Ezek 37:27; 2Kor 6:16; Syg 7:15+
4 I pale imus matazi suuru isov ilale. Ve mateegh, moŋiiŋ, taŋiiz, ma yavyavuuŋ irau tivot muul mako. Pasaa, lepoogh to muuŋ, ene isov wa.” * Is 25:8; 1Kor 15:26
5 Ve ŋeer tau ilepleep ila niia to ghamuuŋ pooz na isaav ighe: “Ulooŋ. Yau nagham gabua tisov timin paaghu.” Ve isaav payau muul ighe: “Saveeŋ tsiau tane, ene onoon. Tamtamon irau tighur ila kat. Tauvene uboode.” * Is 43:19; 2Kor 5:17
6 Ve isaav muul ighe: “Tauta ene. Isov wa! Yau naleep muŋgaaŋ, ve naleep murei geeg. Yau namin puughu pa gabua naol isov, ve yau ta napasov zi. Isaav ighe tamtamon eta murunu, ene yau aat nagham le yaa maata yaryaare tau bolokbolokia na. Yaa tane, le atuya mako. Pale nagham pani sorok. * Is 55:1; Yo 7:37; Syg 1:8, 16:17, 22:17
7 Tamtamon tau ighe iyooz ariaaŋ ve iliiv tovaaŋ, i aat eeza pa ghamuuŋ gabua popoia naol tau nasavi zi ne. Ve yau aat namin Maaron tooni, ve i imin natug. * 2Kor 6:18; Hib 8:10
8 Eemon yes tau tiroi ve tipul ghuruuŋ ila toozi, yes tau tighur ila mako, yes tau ŋgar toozi iŋgalaaŋ ila Maaron maata mako, yes tau tirav tamtamon timaat, yes tau tighur boog, yes mura, yes tau tibesbees pa maaron karomŋa, ve tamtamon tisov tau avozi karom na, zeran tauvene niazi, ene puura tiina tau yav ighanghan ve maet salfa vaazi saghati izazaa na. Ene mateegh imin ru.” * 1Kor 6:9+; Ga 5:19+; Ep 5:5; Syg 20:15
Yerusalem paaghu
9 Ra naghita aŋela ee ilam, ve isaav payau ighe: “Ulam ve ughita livaa tane. I ta pale ivai Sipsip to Maaron gha imin azaawa.” Muuŋ, naghita aŋela liim ve ru tikis oon eŋaeŋa le irau zi. Oon toozi tawe, tivon pa pataŋani liim ve ru to ipasov Maaron aatyavyav tooni. Aŋela tau isavsaav payau ne, i toozi ee. * Ep 5:25+; 2Kor 11:2; Syg 19:7+
10 Rekia mon ve Maaron Avuvu tapiri izaa tsiau, ve aŋela tawe iit ghau nazala loloz tiina ee tau izala kat, ve itotoi nugh patabuyaaŋ Yerusalem payau. Ene igheen to Maaron ta sambam we, ve izilam. * Hib 12:22+; Syg 3:12
11 Maaron mbonari igham nugh tawe isul. Ghitooŋa ite kat, imin maet milmilia tau atuya tiina, ve imin maet yaspa tau iŋgalaaŋ kat imin galas. * Is 60:1+; Syg 22:5
12 Ve didiiŋ ariaaŋa ilivuti. Didiiŋ tawe izala kat, ve le ataman tintiina irau saŋavul ve ru (12). Ataman tawe, aŋela saŋavul ve ru (12) tiŋgin zi, ve tibood rumei saŋavul ve ru to Israela ezazi ila. * Ezek 48:30+
13 Ataman tana, tol tigheen ila pa ragh, tol tigheen ila pa kaagu, tol tigheen ila pa daudau, ve tol tigheen ila pa yavaar. 14 Didiiŋ to nugh tawe iyooz izala maet tintiina saŋavul ve ru (12) tau timin puughu pani. Maet tawe, tibood Sipsip to Maaron mbaŋooŋa tooni saŋavul ve ru ezazi ila. * Ep 2:20
15 Aŋela tau isavsaav payau na, i le ai milmilia ee to tovaaŋ gabua, leso itoov nugh tawe tomania didiiŋ tau ilivuti na, ve atamana. 16 Aŋela itoov nugh tawe malaua tooni, le irau 12,000 stadia. * 12,000 stadia, ene irau 2,200 kilomita ma vene. Ŋgaari 144, ene irau roov 36 ma vene. Yes ŋgara siriv tighe 12,000 stadia tane, ene saveeŋ palelaaŋ. Izaa to Maaron tamtamon tooni tisov. Yes eval le eval kat. Tanin zi, tarao mako. Tauvene nugh tau yes pale tileep pani na, ene tiina le tiina kat.
Ve tuuku tooni tomania loolo saaŋa ve izilam, ene raraate mon. 17 Ve itoov didiiŋ le irau ŋgaari 144. Tovaaŋ tane, ene aŋela itaghon tovaaŋ to tamtamon. 18 Didiiŋ tana, tigharaata pa maet yaspa. Ve nugh tiina, ene tigharaata pa gol tau milmilia ve ŋgalaaŋa kat imin galas. 19 Maet tintiina tau didiiŋ ariaaŋa to nugh tawe iyooz izala pavozi na, tipabood zi pa maet popoiazi saŋavul ve ru tau atuyazi tintiina ve ŋgeretazi ite ite. † Muuŋ, daaba to watooŋrau le gabua imin lugluug tau ituuk ila gargari, ve maet saŋavul ve ru tane tigheen ila. Saveeŋ tane aat puughu tauvene: Tamtamon to nugh sambam (o lupuuŋ to Krisi aazne paam) irau tileep tigharau Maaron ve tibees pani imin muuŋ daaba to watooŋrau ighamghamu na.
Maet tauvene: Yaspa, ene imin maata. Mako sapaia, aget, emeral, 20 oniks, karnelian, krisolit, beril, topaz, krisopres, haiasin, ve amatis. * Igham 28:17+; Is 54:11+
21 Didiiŋ atamana saŋavul ve ru, ene tigharaat zi pa gabua saŋavul ve ru imin ŋgool maata tau milmilia kat ve atuyazi tintiina. Ve eez tau itaghon nugh loolo, ene tigharaata pa gol tau poia kat ve ŋgalaaŋa imin galas.
22 Naghita rumei eta igheen ta sewe mako. Pasaa, Maaron tauu, ta saksaki ve iŋgin gabua naol isov na, yesuru Sipsip tooni tileep ta sewe. Tauvene yes tauzi ta timin rumei pa nugh tawe. 23 Nugh tawe le uraat eta pa aaz ma kaiyo muul mako. Pasaa, Maaron tauu mbonari, tauta isul nugh ve ighamu ighazooŋ. Ve Sipsip to Maaron ta imin lam pani. * Is 60:19+; Yo 1:4-5, 8:12; Syg 22:5
24 Nughmariŋ pale tilaagh ila ghazooŋa to nugh tawe. Ve yes kinik to taan pale tiloŋ tila toman paitooŋ toozi, ve tipakur Maaron. * Mbo 72:10+; Is 60:3, 11
25 Didiiŋ ariaaŋa tau ilivut nugh na, atamana tivolvool mako. Tikakaak irau saawe. Pasaa, nugh tawe, ndoroom mako. 26 Nugh nugh pale tiloŋ tila nugh tawe toman paitooŋ toozi, ve tipakur Maaron. 27 Eemon gabua tau tiŋgalaaŋ mako na, eta irau iloŋ ila mako. Ve isaav ighe tamtamon eta ighamgham ŋgar sasaghati, ma ighamgham karom, i paam irau iloŋ ila mako. Zeran tau ezazi igheen ila rau to lepoogh maata yaryaare tau Sipsip to Maaron iŋgini na, yes mon ta irau tiloŋ tila nugh tawe. * Is 52:1; Lu 10:20; Syg 3:5, 22:14+
*21:2: Is 61:10; Ga 4:26; Hib 12:22; Syg 19:7
*21:3: Wkp 26:11+; Ezek 37:27; 2Kor 6:16; Syg 7:15+
*21:4: Is 25:8; 1Kor 15:26
*21:6: Is 55:1; Yo 7:37; Syg 1:8, 16:17, 22:17
*21:8: 1Kor 6:9+; Ga 5:19+; Ep 5:5; Syg 20:15
*21:9: Ep 5:25+; 2Kor 11:2; Syg 19:7+
*21:12: Ezek 48:30+
*21:16: 12,000 stadia, ene irau 2,200 kilomita ma vene. Ŋgaari 144, ene irau roov 36 ma vene. Yes ŋgara siriv tighe 12,000 stadia tane, ene saveeŋ palelaaŋ. Izaa to Maaron tamtamon tooni tisov. Yes eval le eval kat. Tanin zi, tarao mako. Tauvene nugh tau yes pale tileep pani na, ene tiina le tiina kat.
†21:19: Muuŋ, daaba to watooŋrau le gabua imin lugluug tau ituuk ila gargari, ve maet saŋavul ve ru tane tigheen ila. Saveeŋ tane aat puughu tauvene: Tamtamon to nugh sambam (o lupuuŋ to Krisi aazne paam) irau tileep tigharau Maaron ve tibees pani imin muuŋ daaba to watooŋrau ighamghamu na.
*21:20: Igham 28:17+; Is 54:11+
*21:23: Is 60:19+; Yo 1:4-5, 8:12; Syg 22:5
*21:24: Mbo 72:10+; Is 60:3, 11
*21:27: Is 52:1; Lu 10:20; Syg 3:5, 22:14+