78
Maaron ighamgham ŋgar popoia pa yes Israela. Eemon yes tizorzoor i aliiŋa.
Mbouŋ to Asap
1 Yam tamtamon tsiau, aghur taliŋamim pa saveeŋ tau naghe napaduduuŋ gham pani ne.
Saveeŋ tau naghe nasavia payam ne, yam asov alooŋ poghania.
2 Yau pale nakaak avog, ve nasavia saveeŋ palelaaŋ siriv payam.
Pale nasavia gabua siriv tau muuŋ tivot na. Gabua tawe, pughuzi iyooŋ.
3 Sinaiŋ tane, timbuunŋa tisavia payei gha nilooŋa, tauta niwataghi.
4 Muuŋ, Yoova itotoi tapiri ivot ighazooŋ.
I igham gabua ŋgeretazi ve uraat tintiina ivotvot.
Tauta tamtamon tipait eeza pa tapiri ve poia tooni.
Uraat tooni tawe, irau taŋgooza pa natuunŋa mako. Iit aat tasavia pazi.
Leso paaghu toit tau murei pale tivot na, tiwataghi paam.
5 Eez to itiŋa Maaron tavalupu ghiit tamin eemon, muuŋ i ivotia pa timbuunŋa tau Yakop paaghu tooni na.
I isavia tutuuŋ tooni pa yes Israela, ve isaav ariaaŋ pa timbuunŋa ighe tipaduduuŋ natuzŋa pani. * Igham 10:2, 12:26+
6 Leso yes paam tiwataghi,
ve anazi tisavia pa natuzŋa,
ve iseeŋga tauvene taghon taghon gha ila.
7 Tauvene paaghu toozi irau lolozi iveegh pa uraat tintiina tau Maaron igham zi ne mako.
Ve yes pale tinumeera, ve matazi iŋgal tutuuŋ tooni, ve titaghoni.
8 Leso tigham ŋgar imin timbuzŋa sov.
Pasaa timbuzŋa, ŋgar toozi iyaryaaŋ kat. Lolozi pa titoor ŋgar toozi mako. Monmon tighamgham taliiŋzizi ve tizorzoor Maaron aliiŋa.
Lolozi ikisi tuŋia mako.
Ve saveeŋ tau yesŋa Maaron timbua na, titaghoni mako.
9 Paaghu to Epraim, yes tirao pa vaneghuuŋ pa paneegh.
Eemon saawe tau malmal iburig, tiroi ve tighawaar.
10 Ve saveeŋ tau yesŋa Maaron timbua na, matazi kisini ve titaghoni mako.
Laghooŋ toozi, lolozi pa taghoniiŋ tutuuŋ tooni mako.
11 Ve uraat tintiina tomania gabua ŋgeretazi tau muuŋ Maaron igham zi ila matazi na, yes lolozi iveghaini kat.
12 Saawe tau timbuzŋa tileep izi Isip,
Maaron igham gabua ŋgeretazi tintiina izi taan raraate to Zoan, ve tighita pa tauzi matazi.
13 Ve saawe tau tila tivot Te Siŋsiŋai, i ivalagh te, le sirivu ila pa ŋas, ve sirivu ila pa tapir.
I igham te iyooz imin didiiŋ.
Tauta eez ivot pazi, ve titaghoni tila tivool pa ziige ite.
14 Mataaz, i igham taitai ivot, leso itotoi eez pazi.
Ve mboŋ, i igham yav ivot, leso imuuŋ pazi ve titaghoni. * Igham 13:21; Mbo 105:39
15 Saawe tau tileep izi nugh ŋginaaŋa, Maaron irav valaghin maet, ve igham yaa ivot pani.
I igham yaa ireer tiina, leso tighun. * Igham 17:6; 1Kor 10:4
16 Onoon kat, i igham yaa katini tivot ila maet,
ve tireer tizi le timin yaa tintiina.
17 Eemon yes tinoknok ghamuuŋ sosor pa Maaron Tiina Tau Iliiv Zimaronŋa Tisov na.
Saawe tau tilaghlaagh izi nugh ŋginaaŋa, tizorzoor aliiŋa.
18 Yes titovtoov Maaron tapiri.
Tauta tisaav pani tighe igham lezi aniiŋ tau luazi itaŋtaŋ pani na. * Igham 16:3, 17:2; 1Kor 10:9; Hib 3:16
19-20 Ve tivelegh Maaron tighe:
“Laak, Maaron tapiri irau igham lemai aniiŋ izi nugh ŋginaaŋa tane?
Onoon, i irav valaghin maet, ve yaa tiina iyaat ivot toman tapiri ve ireer izi.
Eemon irau igham tamtamon tooni lezi aniiŋ toman ziigha?”
21 Yoova ilooŋ saveeŋ toozi tawe, le ipas aate.
Tauvene igham yav izi ighan Yakop paaghu tooni.
Aate yavyav kat pa yes Israela, ve ivaghamun zi.
22 Pasaa, yes tighur ila tooni mako.
Tinumeer tighe tapiri irau iuul zi ne mako. * Hib 3:19
23 Tauvene Maaron isaav ariaaŋ, ve ataman to sambam saamba ikaak,
24 ve igham aniiŋ manna izi pazi.
I igham aniiŋ to sambam pazi leso tighan. * Igham 16:4; Yo 6:31; 1Kor 10:3
25 Onoon kat, tamtamon tighan aniiŋ to yes aŋela.
Maaron igham lezi aniiŋ katini, ve tighan le isooŋ zi.
26 Ra ipaburigin yaghur kaaguragh ilam.
Tauu tapiri igham yaghur tiina izaa pa ragh puughu.
27 Ve igham man umbaal tiroov tilam, ve titaptap tizi nugh tau tilepleep pani na.
Man tawe, sorok mako kat. Yes timin sausau to nari. * Igham 16:13
28 Maaron igham zi titaptap tizi nugh tau tamtamon tooni tilepleep pani na, le tilivutin balbaal toozi.
29 Tauvene yes Israela tighan le isooŋ zi.
Pa gabua tau luazi itaŋ pani, tauta i igham pazi.
30-31 Yes Israela tighanghan man tawe le tipasovu soone
ve Maaron aatyavyav tooni izaa toozi, ve irav tamtamon toozi ariaŋazi gha timatmaat.
Geegeu toozi paghpaaghu tau popoiazi kat na, i ipasov zi.
32 Yes Israela tighita gabua naol isov tawe. Eemon tinoknok ghamuuŋ sosor soone.
Tikaria ghitooŋ gabua ŋgeretazi. Eemon tighur ila to Maaron mako.
33 Tauta i iŋgoor saawe toozi tuuku.
Lepoogh toozi isov rekia mon imin yaghuraan tau ivotvot ila avoon.
Mateegh ipateeŋ zi, le roiŋ tiina igham zi.
34 Onoon, saawe tau Maaron irav tamtamon toozi siriv, rekia mon ve eval tiina tighilaal, ve titoor ŋgar toozi imuul ila pani,
ve tisuŋ pani ariaaŋ tighe loolo isaghatin zi ve ireu sosor toozi.
35 Ve matazi iŋgal muul tighe: Maaron, i iponpoon zi imin maetaaz tau izala kat.
Maaron Tiina Tau Iliiv Zimaronŋa Tisov na, i ta Uleeŋa toozi.
36 Eemon tipaiti pa avozi uuli mon.
Saveeŋ tau ivotvot ila avozi na, tisavia toman lolozi mako. Tigham karom.
37 Lolozi ikis Maaron ariaaŋ mako.
Ve saveeŋ tau yesŋa Maaron timbua na, matazi kisini ve titaghoni mako.
38 Eemon Maaron loolo isasaghatin zi, ve ireureu sosor toozi. Tauta ivaghamun zi kat mako.
Onoon, saawe naol, i aate yavyav pazi kat.
Eemon iyai ghi, ve itatan aatyavyav tooni. * Igham 34:6
39 Pasaa, maata iŋgal ighe: Yes to taan mon. Tapirizi tiina mako.
Tileep rig, ve tilalez, imin yaghur tau talooŋ luutu ilam, ve isov.
40 Saawe tau tileep izi nugh ŋginaaŋa, tizoor Maaron aliiŋa pai katini.
Yes tilaghlaagh ila nugh tau sausau mon, ve tighamgham Maaron loolo ipataŋan.
41 Maaron Patabuyaaŋ to yes Israela, yes tinoknok tovaaŋni.
Tauta tipas aate, le aate yavyav kat. * Igham 17:2
42 Yes lolozi iveghveegh pa Maaron tapiri.
Matazi iŋgal saawe tau i igham mulin zi ila koiazŋa nimazi na mako.
43 Muuŋ, i igham gabua ŋgeretazi katini ivotvot izi Isip to itotoi tapiri pazi.
I ighamgham uraat tintiina izi taan raraate to Zoan. Uraat tawe, tamtamon tighita le ŋgar toozi imbool. * Igham 10:1
44 I itoor yaa tintiina to yes Isipa timin siŋ.
Tauvene yes Isipa lezi yaa eta to ghunuuŋ mako. * Igham 7:20
45 Ve igham nimnim tintiina tau tiŋutŋut tamtamon na tivot izi nugh toozi, ve tiŋut zi le tisaghat kat.
Ve igham gob katini tivot le tivaghamun zi paam. * Igham 8:2, 6
46 Ve igham siis tivot le titav nugh toozi, ve tighan aniiŋ toozi.
Uum tau tighun punitazi pani na, siis tighaniir gabua to uum tawe le isov. * Igham 10:13
47 Ve igham ais paatu paatu titaptap tizi, le ivaghamunia ai vaen toozi.
Ve uman tiina tomania ais izi le ivaghamunia ai fik toozi paam. * Igham 9:23+
48 I igham ais paatu paatu titaptap tizi, ve irav makau toozi timatmaat.
Ve igham lalaav iŋgalŋgal sipsip toozi.
49-50 Maaron aate yavyav le yavyav kat.
Loolo basbasuuŋ, ve irau aate izi muul mako.
Tauta ighur yes Isipa muul mako, ve aatyavyav tooni izaa toozi kat.
I imbaaŋ aŋela tooni eval tila tivaghamun zi pa moroghooŋ saghati. * Igham 15:7; 1Kor 10:10
51 I irav yes Isipa natuzŋa aidabazŋa, le tisov timataar.
Natuzŋa tau tipoop zi imin maata, tauta tisov. Eta ileep muul mako. * Igham 12:12
52 Ra igham tamtamon tooni tipul Isip.
I imuuŋ pazi imin ŋginiiŋ to sipsip, ve yesŋa tilaghlaagh izi nugh ŋginaaŋa.
53 I imuŋmuuŋ pazi ve iŋginŋgin zi. Tauvene tiroi pa gabua eta mako, ve tileep poia mon.
Eemon koiazŋa, te itav zi, le tisov timataar ila te loolo. * Igham 14:19, 28, 15:7
54 I igherev zi tila tigharau taan tooni patabuyaaŋ ziige,
ve loloz tau i iparav pani ve ighamu imin le na. * Igham 15:13, 17
55 Ve iziir nugh nugh tau tileep ila taan tawe na tighawaar,
leso tamtamon tooni tila tigham taan toozi imin lezi motot.
Ve irei taan tawe tomania ruum tau tighenaar ila na, le irau rumei rumei to yes Israela, ve tighamu imin lezi to tileep ila. * Mbaŋ 13:19
56-57 Eemon tizi ve titoov Maaron Tiina Tau Iliiv Zimaronŋa Tisov na muul.
Tizorzoor aliiŋa, ve eez tau i ighuru pazi na, titaghoni mako.
Yes tamtamon tooni. Eemon tighur murizi pani, ve tireu saveeŋ mbuaaŋ tau timbua tomania Maaron na raraate imin timbuzŋa.
Tauvene i irau inumeer zi mako. Yes timin paneegh tau ool ipas pani, ve le uraat mako.
58 Maaron iriu zi pasaa, tighagharaat maaron karomŋa anunuzi.
Yes tiluplup zi izala nugh mbua ta naol ne, ve tisuŋsuŋ pa maaron karomŋa. Tauta tipas Maaron aate.
59 Maaron ighita ŋgar toozi tawe,
le aate yavyav ve ighur muuri pazi kat.
60 Saawe tana, i ipul balbaal tooni patabuyaaŋ tau igheen izi nugh Silo na, izi ileple.
Niia to lepoogh tau igheen ila tamtamon tooni sosozi na, i ileep ila muul mako.
61 Ve Bokis to Saveeŋ Mbuaaŋ tau imin ilaal pa tapiri ve mbonari na, i ipuli ila yes Israela koiazŋa nimazi. * 1Sam 4:4+
62-63 Aate yavyav kat pa tamtamon tooni.
Tauvene ipul zi tila koiazŋa nimazi ve timbut zi pa mbuzaagh, le geegeu toozi paghpaaghu timataar.
Zilivaa toozi paghpaaghu irau timbou mbouŋ to vaiŋ muul mako. Pasaa, zitamoot tileep ve tivai zi muul mako.
64 Zeran to watooŋrau paam, mbuzaagh ighan zi gha timatmaat.
Ve azuwazŋa zilivaa tau tileep timin zinaara na, irau titaŋ pazi mako.
65 Ra Maaron igham ŋgar imin tamtamon tau igheen gha iburig.
I imin tamtamon ariaaŋa to malmal tau ighun le ivaghamgham. Mako maata pakia ve iburig ila igham malmal muul.
66 I itatan koiŋa, ve tighau tila toman mayazi.
Mayaŋa tawe pale ighengheen tauvene taghon taghon gha ila.
67 Maaron ighur muuri pa Yosep paaghu tooni. Ve niia to lepoogh paam, igheen tomani zi muul mako.
Irau igham yes Epraima pa uraat tiina eta muul mako.
68 Ve isiigh rumei to Yuda, leso tigham pooz pa tamtamon tooni.
Ve igham loloz Zion imin i le.
Loloz tawe, i loolo pani kat.
69 I irau rumei tooni patabuyaaŋ izala, leso imin niia to lepoogh.
Rumei tawe iyaryaaŋ kat imin sambam.
Pale iyooz tuŋia tauvene taghon taghon gha ila, imin taan tau i ighuru na.
70 Ve i isiigh besooŋa tooni David to imin kinik.
David iŋginŋgin sipsip ila olol loolo, ve Maaron ighuru pa uraat tooni. * 1Sam 16:11+
71 I maata pa sipsip tinazŋa tomania natuzŋa tau tighunghun tuz na,
ve Maaron ighamu imin ŋginiiŋ to yes Israela tau Yakop paaghu tooni na.
72 Tauvene David iŋgin zi itaghon ŋgar duduuŋa, ve igham pooz pazi poi. * Mt 2:6; Yo 10:11
*78:5: Igham 10:2, 12:26+
*78:14: Igham 13:21; Mbo 105:39
*78:18: Igham 16:3, 17:2; 1Kor 10:9; Hib 3:16
*78:24: Igham 16:4; Yo 6:31; 1Kor 10:3
*78:49-50: Igham 15:7; 1Kor 10:10
*78:61: 1Sam 4:4+
*78:70: 1Sam 16:11+