27
Mbouŋ to tamtoghon to imatughez maau ve ighur ila to Maaron ariaŋa
Mbouŋ to David
1 Yoova inim ghazooŋa payou, ve ye Volaaŋa tiou.
Pale namatughez pa sei? Maau.
Pasa, you nanumeer Yoova. Ye inim ruum ariaŋa pa nayooŋ ila lolo. Tauto namatughez pa mbeb eta maau. Mbo 118:6; Yo 8:12; Ro 8:31
2 Ighaze ndiran samsamia tipamundigin malmal payou,
ve koiagŋa tighaze tiwaghamun ghou, nene pale Yoova igham aghedi ilot, ve titap.
3 Ighaze ndaaba katindi tinim tiluvut ghou pa tigham malmal, irau lolog imbumbu ve namatughez padi maau.
Ighaze malmal imundig, ve koiagŋa tiŋarua ghou tinim, you pale nanumeer Maaron ve nayoon ariaŋa.
4 Mbeb ee moghon to you lolog pani kat. Tauto naghaze naghason Yoova pani.
Sawa isob to naneep izi taan, you naghaze le naneep toman Yoova ila rumai toni lolo, ve naghita poia toni.
You naghaze naneep ila rumai toni lolo, leso naghasoni pa ipatooŋ tau ve ŋgar toni payou. Mbo 23:6; Pil 3:8
5 Ighaze pataŋani tiina eta ivot payou, ye pale iŋgin ghou naneep pooi ila nima samba.
Pale iŋgooz ghou ila rumai toni lolo.
Ve ye pale isur ghou nazala raŋ to sala we, leso koiagŋa tigham mbeb eta payou sob.
6 Onoon, aazne, koiagŋa tinim tiluvut ghou.
Eemoghon namatughez maau. Pasa, Yoova pale iuul ghou ve nalib padi.
Tovenen tinig iza, ve nalool ve napait iza.
Nagham watooŋrau pani ila rumai toni lolo, ve nambou ve narab gita pa napait iza.
7 Yoova, ighaze nataŋ roran ghom pa ulaaŋ, ulooŋ taŋiiz tiou.
Lolom isamin ghou ve uul ghou. Pasa, you mbesooŋa tiom.
8 Yom usaav payou ughaze: “Unum usuŋ payou, leso napatooŋ taug payom.” Tauto lolog naghaze nalat tiom, ve upatooŋ taum payou.
9 You mbesooŋa tiom. Uŋgooz matam payou malep.
Atem yabyab ve uzurun ghou malep.
Maaron, muuŋ ve inim, yom moghon to Volaaŋa tiou.
Tovenen upul ghou, ve upul murim payou malep.
10 Ighaze tamaŋ ve tinaŋ tipul muridi payou,
nene pale Yoova tau igham ghou ve iŋgin ghou.
11 Yoova, upaghazoŋan ghou pa ataam tiom.
Umuuŋ payou ve upatooŋ ghou pa ataam deŋia.
Pasa, koiagŋa katindi tisasaŋan ghou. Igham 33:13; Mbo 25:4+
12 Upul ghou nala nimadi malep!
Pasa, yes tiŋgal saveeŋ kaarom naol payou, ve tighamgham saveeŋ matughezaaŋ payou. Mt 26:59+; Mbaŋ 6:13
13 Eemoghon you naghur ila naghaze yes irau tiwaghamun ghou maau.
You pale naneep matag iyaryaar, ve naghita poia to Yoova.
14 Tovenen yom to ughur ila to Yoova, you nasaav payom naghaze: “Unumeer Yoova, ve ughur matam pani.
Umatughez malep. Lolom ee moghon, uyoon ariaŋa, ve usaŋan pa ulaaŋ toni.” Mbo 31:24, 62:5+; Ep 6:10