1 N badenmailu, ni ai ka mɔɔ do yen kojuu kɛla, ai mɛnilu ye taamala ka a bɛn Nin Seniman sawo ma, ai ye wo tii lali jususuma rɔ, ka a dɛmɛn a kɔseyila sila ɲuma kan. Kɔni i ye i janto i jɛrɛ rɔ, sa i fanan kana manɛɛn ka kojuu wo ɲɔɔn kɛ. 2 Ai ye i ɲɔɔn dɛmɛn ai la doninilu tala sa ai ri Ɲenematɔmɔnin na sariya labato a ɲa ma. 3 Ni mɔɔ mɛn ye a mirila ko ale ye mɔɔ ba ri, ka a tɛrɛn a tɛ foyi ri, wo tii ye a jɛrɛ le lafilila. 4 Mɔɔ kelen kelenna bɛɛ ye a jɛrɛ la kewalilu fɛsɛfɛsɛ a ni ka a jɛrɛ bonya. A mako tɛ a la ka a la kewalilu la mɔɔ gbɛrɛ ta ma. 5 Baa bɛɛ ka kan ka a jɛrɛ la kunko ta.

6 Karanden mɛn da Alla la kuma kan sɔrɔn ka a karan, wo tii ka kan ka a la karanmɔɔ sɔ a la bolofen ɲumailu rɔ.

7 Ai kana ai jɛrɛ lafili. Mɔɔ ti se mɔnɛdona Alla rɔ wala ka a mayɛlɛ. Baa mɔɔilu wa si suu suu foyi sɛnɛ rɔ, alu ri suman suu wo sɔrɔn. 8 Ɔɔn, mɔɔ mɛn wa sɔn a jɛrɛ farikolo nata juuilu ma ka kojuu kɛ, wo tii ri saya sɔrɔn. Kɔni mɔɔ mɛn wa sɔn Nin Seniman diyana koilu ma ka koɲuma kɛ, wo tii ri ɲenemaya banbali sɔrɔn. 9 An kana kori koɲuma kɛ rɔ, baa ni an ma jiitɛɛ ka a boloka, an di a tɔnɔ sɔrɔn a waati la. 10 Wo le kosɔn, an wa fɛrɛ sɔrɔn tuma mɛn na, an ka kan ka koɲuma kɛ mɔɔilu bɛɛ yɛ, ka tɛrɛ tɛ an badenma lemɛniyamɔɔilu ma.

11 Nba, ai ye sɛbɛden kunba ɲinilu ragbɛ. Nde ye woilu sɛbɛla n jɛrɛ bolo le la ka a lawa ai ma. 12 Mɔɔ mɛnilu ye a fɛ ka ai diyagboya ko ai ye kojiikɛ, alu bɛɛ ye a ɲininna ka diya mɔɔilu yɛ tuun, baa alu tɛ a fɛ mɔɔilu ye ie tɔrɔ Ɲenematɔmɔnin faa gbɔngbɔn jiri kan wo kosɔn. 13 Baa mɔɔ mɛnilu kojiikɛ la, woilu jɛrɛ tɛ Nabi Musa la sariya labatola. Kɔni alu ye a fɛ ai ye kojiikɛ sa alu ri se alu jɛrɛbonyala ko alu ka a kɛ kojiikɛ nɔ ra kɛ ai fari ma. 14 Nde kɔni, n tɛna n jɛrɛbonyala ko si ma, fo an na Maari Isa Ɲenematɔmɔnin faa ko gbɔngbɔn jiri kan. A la saya kosɔn gbɔngbɔn jiri wo kan, dunuɲa koilu ye n ɲana ikomin fen mɛnilu faani. N fanan ye dunuɲa ɲana ikomin fen mɛn faani. 15 Kojiikɛ tɛ foyi ri. Kojiikɛbaliya fanan tɛ foyi ri, foo a kɛ danfen kura ri.

16 Mɛnilu ye sila wo taamala a ni Isirayɛli mɔɔilu* a la Isirayɛli mɔɔilu wo kɔrɔ ye le mɔɔ mɛnilu lemɛniyani Maari Isa ma ko ale le ye an kisiba ri. fanan, Alla ye jususuma di wo bɛɛ ma, ka hina ie la.

17 Nba, sisen mɔɔ si kana n tɔrɔ butun, baa tɔrɔya nɔ mɛnilu ye n fari ma, n ka woilu sɔrɔn Isa le kosɔn.

18 N badenmailu, an Maari Isa Ɲenematɔmɔnin na ɲumaya ye to ai fɛ. Amina.