1 Janhan Pablo tsíkjeyána Jesucristo kíxin xi̱kaha tjinkaon Dios tsjàkua itén chꞌán. Janhan mé ikjian tí xroon chrꞌanhánrá tí jahará tjejorá chjasin Éfeso tinkachónkirá Dios la ko títekáonrá Cristo Jesús. 2 Tjétjáncháha̱ Itꞌéni Dios la ko Ìnchéni Jesucristo kíxin kjuasáyé chꞌán chrókjuintayaonrá chꞌán la ko chrótjáhará chꞌán kjuaxróxin.

3 Chjéheni kjuasáya Dios mé Itꞌé Ìnchéni Jesucristo. Jeheni mé tinkáchónkini Jesucristo la mé xi̱kaha jehe chꞌán mé kjuíncheyaonni chꞌán kíxin kaín nkehe jína ti̱xi̱n nkaya nka̱jní kjuanjon chꞌán. 4 Dios mé kjueyá chꞌán tí jeheni kíxin chrókuinkáchónkini Cristo tí na̱xa̱ tꞌónahya chjasintajni. Tjinkaon chꞌán kíxin chrókꞌuejóni tí tjen chꞌán ntá kjuínchetjóáni chꞌán kíxin kaín jie̱ kjua̱tse̱nhenni chꞌán. 5 Imá tjuèhe Dios tí jeheni ntá tsíkjeyáni chꞌán kíxin tsꞌónani xje̱en chꞌán kíxin kuinkáchónkini Jesucristo. Mé xi̱kaha tsíkjenka̱yáxin chꞌán kíxin xi̱kaha kóxrjínhi̱n chꞌán. 6 Méxra̱ imá tjancheheni kjuasáya Dios kíxin kjuíncheyaonni chꞌán kíxin ó tinkáchónkini tí Xje̱en chꞌán, imá tjuèhe chꞌán. 7 Imá tjuèhe Dios tí jeheni la xi̱kaha kuaáxinni ijni̱é tí Xje̱en chꞌán kꞌuítji la xi̱kaha tsjìixín kaín iji̱éni. 8 Dios kjua̱ko̱xi̱n chꞌán kíxin imá tjuèheni chꞌán. Kjuanjon chꞌán kaín kjuachaxin kíxin chrókuienxínni jína la ko kjuanjon chꞌán kjuaxrexinkaon jína. 9 Dios kjuínchenoheni tí nkehe jehó chꞌán tjenka̱yáxin chꞌán, mé tí nkehe tóxrjínhi̱n chꞌán tsoxiteyá. 10 Tí nkehe tsíkjenka̱yáxin chꞌán la tsoxiteyá tí ya̱on tsíchrónka chꞌán. La ntá jehe chꞌán tsjanjon kjuachaxin kíxin Jesucristo tsꞌe̱tue̱nhen chꞌán kaín xín nkehe siín nkaya nka̱jní la ko chjasintajni.

11 Dios kjueyáni kíxin chrókuinkáchónkini Cristo la ntá xi̱kaha chrókꞌuáyéhe̱ni tí nkehe tsíkꞌáyéhe̱ chꞌán. Kaín tíha la mé xi̱kaha tso̱nhen éxí tóxrjínhi̱n Dios. 12 Mé xi̱kaha kjuíchꞌe chꞌán kíxin ntá jeheni kuítekaonni Cristo sa̱oxín chrókꞌuejóni chrókjuancheheni kjuasáya Dios kíxin tí kjuachaxin jié chónta chꞌán. 13 A̱ ntá kja̱xin jahará ó kuinhínrá tí tan jína ntoá chrónka nkexrí tsaáxinni, a̱ ntá ó kuinkachónkirá Cristo. La ntá jnkoko̱á kꞌuáyéhe̱ni Ncha̱kuen Dios kꞌónani xje̱en chꞌán kíxin tinkáchónkini chꞌán. Mé xi̱kaha ó xiteyá tí nkehe tsíntáchro chꞌán. 14 Tí Ncha̱kuen Dios kui̱to̱nhe̱nni mé kjuínchenoexínni Dios kíxin tsakjani kaín nkehe tsjanjon chꞌán tió tsaáxin kaín ni tinkáchónkini chꞌán. Ntá xi̱kaha kaín ni tsjancheheni kjuasáyé chꞌán kíxin tí kjuachaxin jié chónta chꞌán.

15 Méxra̱ ó kui̱nha̱n kíxin imá tinkachónkirá Ìnchéni Jesús la ko imá tjuèhérá kaín tí í so sín tinkáchónki Dios. 16 Ntá janhan nunca ti̱tua̱hya nixja̱ha̱ Dios tjáncháha̱ kjuasáya kíxin ó tinkachónkirá chꞌán. 17 Tjéníxja̱ha̱ Dios, mé jehe chꞌán mé ichrꞌán Ìnchéni Jesucristo, mé Itꞌéni imá tjetoan la tjétjáncháha̱ chꞌán kíxin tsotjáhará chꞌán kjuaxrexinkaon jína kuènte Ncha̱kuen chꞌán kíxin ntá a̱ntsí chrókuiénxinrá jína tí nkehe kuènte chꞌán kíxin ntá a̱ntsí má chróchoxínrá chꞌán. 18 Kja̱xin tjétjáncháha̱ Dios kíxin tsjinki̱tsa chꞌán tsjanjon chꞌán ijnko kjuaxrexinkaon jína kíxin ntá tso̱nohará tsꞌejochonhénrá kíxin xi̱kaha kjueyárá chꞌán. La ko tso̱nohará kíxin imá tjetoan tí nkehe sincheki̱to̱nhe̱nni chꞌán kíxin jeheni mé tinkáchónkini chꞌán. 19 La ko kja̱xin tjétjáncháha̱ Dios tsjinki̱tsará chꞌán tso̱nohará kíxin tí kjuachaxin kuènte chꞌán mé ijnko nkehe imá jié noehyani nketí kjuèxín. Tí kjua̱cha̱xién chꞌán mé nchexraxinkaon tí sín tinkáchónki chꞌán. Jnkokón tí kjuachaxin chóntani la ko tí kjuachaxin imá jié kjua̱ko̱xi̱n chꞌán 20 tió kjuínchexechón chꞌán Cristo. Ntá Cristo sákjui̱ kjuákꞌetja̱xi̱n chꞌán tja chjina tí Itꞌé chꞌán itjen nkaya nka̱jní. 21 Mé xi̱kaha kjuanjon Dios kjuachaxin kíxin Cristo tsꞌe̱tue̱nhen chꞌán kaín xín gobierno la ko kaín tí sín tꞌe̱to̱an. Ijie tjetꞌe̱tue̱nhen chꞌán kaín xín nkehe siín chjasintajni la ko chrꞌéxi̱n tsꞌe̱to̱an chꞌán kja̱xin. 22 Cristo kꞌuáyéhe̱ chꞌán kjuachaxin tsꞌe̱tue̱nhen kaín xín nkehe siín. Jehe chꞌán mé tsꞌe̱tue̱nhen kaín tí sín kꞌóna ni̱nko̱é chꞌán. 23 Tí ni̱nko mé éxí tí cuerpo kuènte chꞌán la jehó chꞌán mé tꞌe̱tue̱nhen chꞌán. Jehó chꞌán mé kuènte chꞌán kaín xín nkehe siín.