Xotei ido Sam Mak ana Inggrengalox
Xelesam
Kulu xax Mak sam wa inggrengalox.
Mak Yesus xasi mendelxo, adu Xotei ido ngidibi toto. Sis adu mendelxo, Yesus adu Xotei ido bail dili. Kristen kulig pes soubx ne Mak xoxnjulxo. Nenxasi adu Kristen bail dinjisne inggrengalox. Adu Kristen munjurulxo, “Bail asi sax.” Adu inggrengalox ne, Rom kauntri lambeiyai jagar ubersine adu gavman palxo. Nedine Mak adu xele Rom xo Satan isxo bail ne Yesus ana yelui yixo. Nenxa Mak ana Kristen Rom xabe soubx nenx xasi inggrengalox.
Suma yena inggrengalox.
Mak ido donyam beli Jon Mak silxo. Nal nenx Yesus Xotei ido kinggal yisilxo ne Mak xelagu silxo. Nenxa adu Yesus jagar olajal. Nedine Mak adu Jerusalem taun si dalxo. Sisne sumaxangglixja Yesus xasi sam munjurisoubxo, ne Mak indo sam ne xiyalxo. Bunge Pol xo Banabasx ana Mak pes mox Xotei ido sam sumaxangglixja publabdis munjurisoubxo. Bunge Mak Pita jagar Rom si soubxo. Pita adu Yesus ido kinggal ne xoxlox, ne Mak wasayi huyulxo. Mak adu sam wa inggrengalox ne nal AD 55 ko AD 65 mbelem nenxabe.
Mak sam ngisili tadaiyixo.
1. Yesus Xotei ido kinggal kuluilox (1.1-13)
2. Yesus Galilis kinggal kuluisi sumaxangglixja sam munjurulxo (1.14—6.29)
3. Yesus Galili udisne kauntri dagi xabe mos sumaxangglixja sam munjurisilxo (6.30—9.32)
4. Yesus Galili aib mos sumaxangglixja sam munjurisilxo (9.30-50)
5. Yesus Judia xo Pereax sumaxangglixja sam munjurisilxo (10)
6. Yesus ido miyax nal kulubalox, nenxasi adu sumaxangglixja adu mangau yisilxo ne munjurisilxo (11—15)
7. Yesus adu mesne aib tingalox (16)
1
Jon Baptais ana gaman gerei yixu.
1 Sam wa Xotei ido ngidibi ido sam beli kului. Ido donyam Yesus Kristus.
2 Propet Aisaian inggrengalox,
“San hajo mob suma so ada nyi udumbin nomi ana kulodxo.
Adun ino gaman gereidox.* Malakai 3:1 sam kulu sux nedi.
3 Suma be ido ma angi so rauxbe sam des ne mendelxo,
‘Xiliyai ido gaman gereisine,
so tenemdax.’ ”
4 Silane Jon Baptais desne so raurxbe nenxa sumaxangglixja yag kunggu dinjisilxo. Ido sam ne publab disne sumaxangglixja une yi soubxo ne udisne aib bulbane Xotei ana une xendei hunjax munjurulxo. 5 Judia distrik xo Jerusalem taunx isxo sumaxangglixjax kumogxo adu sib mo soubxo. Andug indo une babdubane Jon ana Jodan yag kunggu dinjisilxo. 6 Jon kamel ido uli ne bugax tag sine let kalembe xerix disilxo. Sisne adu habu xo bisin gagx ya hesilxo. 7 Wa ido sam, “Sa bungex be suma be bail ana maxdixo. Adun sa yelubixone yoglodxo. Sa suma beli jal pinden ana ido su ido sel ne mberengdax kerejal. 8 Sana nyingga yag kunggu dinggixam, nedine adun nyingga Kanin Mundor ana baptaisnggedxo.”
Yesus yag kungguasine toum maglib minjelxo.
9 Nal nenxa Yesus adu Nasaret taun Galili distrik maglib inggam lelane Jon ana Jodan yagbe yag kunggu dulxo. 10 Yesus yagbe sam loxolane lang hobox asine Xotei ido Mundor ne langbe sam goul pala yogololxo. 11 Silane ma be lang bugbe sam yogololxo. Ma ne adu sis mendelxo, “Nyi hajo du, sa nyi dobisx na, sa nyi xasi pari beli xiliyai bisxna.”
12 Sis nenx ya Kanin Mundor ana gasanx soilane so raurbe minjelxo. 13 Adu mosne so raurbe meleng 40 silane Satan ana toum lox. Adu werapin juwan jagar silane Xotei ido sombu andug ana xumar soubxo.
Yesus ido sox suma manji kuluilox.
14 Bungex Jon talu halib hogobane, Yesus Galili distrik be mosne Xotei ido sam beli publab dis munjurulxo. 15 “Nal dax ne de xuradixo,” adu mendelxo, “Xotei ido kingdom dax kulubx na bulsine Xotei sib minjax!† Kingdom sam ne sumaxangglixjax xo pinhalel kumogx suma be bogagub sixa. Ido sam beli wa xabu ud ayax!”
16 Saimon xo ido aubi kanangge Endrux xumam xedel ne isxo kinggal, nenxa yag korob suwen asui soulxo. Sisne Yesus adu Galili yag koro xou soxsine woxsi asux xoxnjulxo. 17 Yesus ana manjis munjurulxo, “Les sa soxbela! Silane sana nyisxa suma pax suwen xasuiya usernggedxm.” 18 Nal nenx ya gasanx asux isxo suwen udisne adu sox youlxo.
19 Adu giringx si mosne Jems Sebedi ido ngidibi xo ido aubi kanangge Jonx kubung maglib seoulx ne xoxnjulxo. Asux suwen gerei seoulxo. 20 Gasanx Yesus asux manjulxo. Asux isxo alabi Sebedi kubung maglib nenxa kinggal suma jagar udinjisne asux Yesus sox youlxo.
Yesus mundor hali xendeilox.
21 Andug Kapenamx taun minjoubxo. Sabat nal‡ Sabat nal ne Ju indo arpersi Xotei donyam pidingdax nal. alane Yesus Ju indo bojou maglib mosne sumaxangglixja xele hunjisilxo. 22 Adun andug sam munjiri silxo ne, suma xele pe xuraxo nedana sam palai silxo. Nenxa sumaxangglixja andug adu sam publab dulx ne andug pudox hali aiyoubxo. Adu manam sam ido xele suman sam palaijal. 23 Sis silane suma be mundor hali ana alul lox ne Ju indo bojou inggam maalox, 24 “Yesus, Nasaret suma, nyi ga koxra gax si? Nyi ga alul gax lexam, e? Sa nyi xele nyi Xotei ido suma une xujalxo!”
25 “Tenenem a!” Yesus ana korlox, “Nyi hamegx adu udisne habrex da!” 26 Mundor halin suma ne hagdulane rexrexasi xoeng alulsine habrexbe dalxo.
27 Sumaxangglixja pudox hali amai youbxo. Sisne andug indo indo da inar aiyoubxo, “Mangau wa xa? Sam wa kexei ido bail dili! Adu mundor hali hegaganji xanden andug adu sam xe huiyisxa.” 28 Adu ido sam ne Galili distrik maglib nenx ya serx belelai lox.
Yesus suma xo xangglixja lambeiyai gemba aiyox di hunjul beli aiyoubx.
29 Andug Ju indo bojou serx udisne Jems xo Jonx jagar Saimon xo Endrux isxo urumbe minjoubxo. 30 Saimon ido mugumabi do ngaring lane wil asilxo. Nenxa andug ana Yesus adu xasi serx mundoubxo. 31 Silane adu xanggli ne sib mosne barge pesne soxorlox. Do ngaring adu udulane adu andug dubli palxo.
32 Sabat nal ayox alane bunge seng kulolane suma kumogx indo gembax suma xo suma mundor halin alulnjulxo ne garwernjis Yesus sib leubxo. 33 Taun ne maglib sumaxangglixja kumogx lesne urum mbour kulub nenxa tumbang aiyoubxo. 34 Siylane Yesus ana gemba kulu dide dide aiyoxdi hunji silxo. Sisne mundor hali lambei xendei hunji silxo. Andug adu suma ye ne andug xele nenxa adu mundor hali xarwinji xanden samajal.
Yesus idoi so derxbe mos geinalox.
35 Koglix hali so xaluxalugx, Yesus xuduasine so derx beb mosne geinalox. 36 Saimon xo kinggal suma dagi jagar adu xedelasi mos 37 tordisne mundoubxo, “Sumaxangglixja kumogx nyi xedel mbisxa!”
38 Yesus andug sis munjurulxo, “Ga tubarbeb bili mosne sa sam nenx publab duda. Sa kulu nenx xasi yoglomonxo.” 39 Sisne adu Galili distrik maglib nenxa lumbiasine Ju indo bojoube sam publab disne mundor hali xendeinji silxo.
Suma hogar nyam wo dili.
40 Suma hogar nyam wo dili ne adu sib les tomblongsine gwari inaralox, “Ae, nyi sa gereibax ud asine sa jaxal dube.”
41 Yesus adu xasi pari xurang sisne barge soxorsi adu usub pidelxo ne sis mundulxo, “San yudxm. San nyi jaxal dumbixam!” 42 Gasanx hogar nyam wo ne suma ne udulane adu beli alox.
43-44 Yesus suma ne serx soisine kokoilox, “Suma be mundi mundiyaxjal nedine ino dodamug nei mosne Xotei ido kinggal suma ne usernjax. Sisne jaxal ido atra Moses ana manam sam bail dulxo ne soxsine jaxal ido atra ne yax, mangau simane suma xele aiyaxabarxo ino gemba ayox ayiux.” 45 Nedine adu mosne ido beli alox ne sumaxangglixja sam ne boyoalox. Silane Yesus adu taun be palagx duxa dejal, ne adu taun xoub silxo. Nedine suma so kumogx adu sib le soubxo.