10
Va Tatara nia Zihova sa Tinarupaha
1 “Tepa ia sa ruku koe Zihova pa pinodalaena sa vuaheni;
e Zihova tavetedi sari lei raneboṉi,
meke poni ruku Sa sari tie,
meke sari linetelete pa inuma koari doduru.
2 Sari beku si sekesekei,
sari matemateana si dodogorae kokoha;
tozi rini sari pinutagita kokohadi,
sari vina manoto taveti rini si loke laedi.
Gua ke ene lamae sari tie guana sipi
sapu nunala sina loke dia sepati.
3 Ta sulu ni Qua binugoro sari sepati,
meke kote va lipulipu i Arau sari na tie tuturaṉa;
ura se Zihova Tadi na Qeto Minate kote kopu nia
sa Nana rovana sipi, sapu sa butubutu Ziuda,
meke tavete guni nia na hose varipera ṉiṉirana.
4 Koe Ziuda kote mae gua sa ṉati patu sinokiraena sa vetu,
koe Ziuda kote mae gua sa tupili tana ipi,
koa sa kote mae gua sa bokala varipera,
koa sa kote mae gua sari doduru baṉara.
5 Kote guana varane si arini pa vinaripera
sapu puza i sari siraṉa kosikosiridi pa vinaripera.
Sina koa turaṉi e Zihova
ke kote varipera si arini meke gona goreni sari tie koi pa hose.
6 Kote va ṉiṉira ia Rau sa butubutu te Ziuda
meke harupu ia sa butubutu te Zosepa.
Kote va turu pule i Rau
sina tataruni Arau si arini.
Arini si kote guana
sapu lopu hite kilu i tu Arau,
ura Arau se Zihova sa dia Tamasa
na kote olaṉi Rau si arini.
7 Ari tie Iparemi si kote ta evaṉae guari na tie ṉiṉiradi,
meke sari bulodia si kote qetuqetu guana napo vaeni si arini.
Kote dogoria ari dia koburu meke qetu;
sari bulodia si kote qetu nia se Zihova.
8 Kote sipu mae i Rau
meke varigara mae ni.
Hinokara kote harupu i Rau;
meke kote soku pule gua pukerane si arini.
9 Na va hurakatae i tugo Arau koari na tinoni,
ba kote balabala Au rini koari na popoa seu.
Arini meke sari dia koburu si kote toa hola dia,
meke kote pule mae si arini.
10 Kote turaṉa pule mae ni Arau sapu koadi pa Izipi
meke varigara pule mae ni sapu koadi pa Asiria.
Kote turaṉa lani Arau pa Qileadi meke pa Lebanoni,
osolae loke lolomo si koa.
11 Kote holapa gua si arini koasa kolo lamana sapu koa ia tinasuna;
sa kolo bogusu si kote noso
meke doduru kolo pa Ovuku Naelo si kote popa.
Sa vinahesi pule te Asiria si kote tava kilasa
meke sa binaṉara pa Izipi si kote kokoi.
12 Arau kote va ṉiṉira i pa dia tinoa koa Arau Zihova
meke kote ene si arini pa korapa Pozaqu Rau,”
zama vura gua se Zihova.