1 Meke topue ene la sari na tinoni Izireli, meke la noso koari na pezara pa popoa Moabi pa kali gasa rimata pa Ovuku Zodani sapu doṉo karovo la gua pa Zeriko.

2 Sipu avoso nia sa baṉara Moabi sapu se Balaki, tuna koreo e Zipora, sa sinokudi rina tinoni Izireli, meke gua sapu tavetia rini koari na tinoni Amoraiti, 3 si matagutu sisigiti si asa, meke gua tugo sari na tinoni pa Moabi. 4 Ke zama la koari na koimata tadi na tinoni Midiani sari na tinoni Moabi, “Sa kobi tinoni hie si kote ṉovala betoi sari doduru tiṉitoṉa pa vari likohaena kekeṉoṉo sa bulumakao kokoreo sapu gani va upati sari na duduli pa inuma.” Ke garuni sa baṉara Balaki 5 sari na tie paleke inavoso pude tioko mae nia se Belami, sa tuna koreo e Beoro, sapu koa pa Petoro, tata pa Ovuku Iuparetisi pa popoa Amau. Guahe sa inavoso sapu paleke mae nia rini koe Balaki: “Hiva va gilana nigo rau sa butubutu lavata sapu mae guana pa popoa Izipi, sari na tinoni arini si koa betoa mo rini sa doduru vasina, meke variva mala pude vagi hobea rini sa nada popoa.* Nab 31:8; 2 Pit 2:15-16; Zd 11 6 Soku holani gamu rini, ke mae mamu leve maeni si arini. Meke gina kote boka va kilasi mo gami, meke hadu va seui pa mami popoa. Ura gilania rau sapu sarini pu manani goi si hoke ta manae tugo, meke sarini pu leveni goi si hoke ta gorei tugo,” gua si asa.

7 Meke topue la sari na palabatu Moabi meke Midiani, palekia rini sa tinabarana sa lineveleve, meke la kamo koe Belami, meke la tozia rini koasa sa zinama te Balaki. 8 Meke zama la koa rini se Belami, “Koa paki tani kohite boṉi, pude qu tozini gamu vugo sapu gua tozi nau e Zihova.” Ke koa paki koe Belami koasa boṉi sana sari na koimata tadi na tinoni Moabi.

9 Meke mae pana boṉi koe Belami sa Tamasa meke nanasa “Ari sei sari na tinoni saripu koa koa goi hire?”

10 Meke olaṉa la koe Tamasa se Belami, “E Balaki, sa baṉara pa Moabi garunu maeni koa rau pude tozi nau, 11 sapu sari na kobi tinoni saripu mae guadi pa Izipi si koa betoa rini sa doduruna sa popoa hie. Ke hiva nau sa pude leve ponia gua, pude boka va kilasi sa na hadu va seu i pa nana popoa gua.”

12 Meke zama la koe Belami sa Tamasa, “Mu lopu luli sari na tie sara, mamu lopu leveni sari na tinoni Izireli, sina ele mana ni Rau si arini.”

13 Vaṉunu munumunu se Belami meke la koari na tie paleke inavoso te Balaki meke zama, “Mi pule la pa mia popoa, ele heki nau e Zihova pude luli atu koa gamu.” 14 Ke pule la koe Balaki si arini, meke la tozi nia rini si asa sapu korona pude luli koa rini si asa.

15 Meke sokudi pule koimata arilaedi holani saripu ta garunu kekenu, si garunu lani pule Balaki. 16 Meke mae si arini koe Belami, meke zama: “Guahe sa zinama te Balaki tuna e Zipora: Namu loke ginugua hokara kaqu va karigo si goi pude lopu mae koa rau, 17 sina kote va lavatigo rau meke tavete vatua sapu gua zama nia goi, gua asa ke mamu leve poniau sari na tinoni hire.”

18 Ba olaṉa se Belami, “Be poni moka nau sa baṉara sari na siliva na qolo pa korapa nana vetu baṉara, ba lopu kaqu boka va karia rau sa zinama te Zihova sa qua Tamasa koa ke ginugua hitekena hola,” gua si asa. 19 “Ba leana koa paki tani kohite boṉi, kekeṉoṉo gua tugo ari kaiqa, maqu gilana pakia sapu nasa pule si kote zama nia e Zihova koa rau,” gua.

20 Ego, koasa boṉi sana si mae koe Belami se Zihova meke zama guahe: “Koa gua sapu ele mae koa goi sari na tie hire meke tepa igo pude luli la i gua, ke va namanama, mamu la, ba gua mo he: Mamu tavetia mo sapu gua tozi nigo Rau,” gua si Asa. 21 Ke pana munumunu si vaṉunu se Belami meke va namanama ia sa sa nana doṉ'ki meke luli sa sari na palabatu tadi na tinoni Moabi.

22 Meke bugoro sa Tamasa, sapu luli la koarini se Belami, meke sipu korapa habotu nana koasa nana doṉ'ki se Belami meke ene turaṉi sa sari karua nana nabulu pa siraṉa, si turu nana pa korapa siraṉa sa mateana te Zihova, pude lopu va ene hola ia si asa, gua. 23 Meke sipu dogoria sa doṉ'ki sa mateana korapa turu nana pa kokorapa siraṉa, meke taṉinia nana pa limana si keke magu ṉaruna, ke luaria sa doṉ'ki sa siraṉa meke ene la gua nana pa vale siraṉa. Ke sekea Belami sa doṉ'ki meke va ene pule la ia pa siraṉa. 24 Beto asa si turu nana pa ṉizupuna sa siraṉa sa mateana pa varikorapadi ri karua inuma vaeni, pu koai karua bara patu varikalina. 25 Sipu dogoro pulea sa doṉ'ki sa mateana te Zihova sapu korapa turu nana pa siraṉa ṉizupuna sana, si ene kapae sisigiti si asa koasa kali goba patu meke rausu nia nenena se Belami koasa gobagoba patu asa. Ke seke pulea sa sa nana doṉ'ki. 26 Beto asa si rizu hola la pule koasa siraṉa sapu namu loke hite ari lolomona, pude taliri la gua pa kali matao babe kali gede, meke la turu vasina sa mateana te Zihova. 27 Meke sipu dogoria sa doṉ'ki sa mateana te Zihova, si opo gore pa pepeso si asa, ke ta ṉaziri sisigiti se Belami, meke seke nia kolu sa sa doṉ'ki. 28 Meke va zama ia e Zihova sa doṉ'ki, meke zama guahe si asa koe Belami: “Na sa si ele tavete nigo rau? Na vegua ke sekeau tu goi ka ṉeta totoso?”

29 Olaṉa la ia Belami sa doṉ'ki, “Ura ele va duviduvilau goi. Be guana taṉinia rau si keke magu, si be ele va matego tu rau kamahire,” gua si asa.

30 Zama la koe Belami sa doṉ'ki, “Vegua lopu arau sa mua doṉ'ki sapu hoke suraṉigo si goi pa doduruna sa mua tinoa? Hoke tavete guni nigo tugo rau tatasana?”

“Lokari,” gua si asa.

31 Meke tiqe va dogoro nia e Zihova koe Belami sa nana mateana sapu korapa turu nana pa siraṉa meke taṉinia nana pa limana si keke magu. Ke hoqa oporapaha pa pepeso se Belami. 32 Meke zama la sa mateana te Zihova koa sa, “Na vegua ke sekea tu goi ka ṉeta totoso sa mua doṉ'ki? Sapu turu nia rau tani si pude hukatigo pude lopu ene hola la si goi, si na sapu gua tavetia goi si lopu toṉoto. 33 Ba sa mua doṉ'ki si dogorau, ke va talevara si asa ka ṉeta totoso. Be lopu va talevara nau sa, si ele tava mate tu kamahire si goi, ba sa doṉ'ki si lopu kaqu tava mate,” gua si Asa.

34 Zama la koasa mateana te Zihova se Belami, “Ele sea mo si rau. Na lopu gilanigo rau sapu agoi si korapa turu mua pa korapa siraṉa pude hukatau. Ego, be lopu qetu nau goi kamahire, si maqu pule qua mo.” 35 Ba zama la koasa sa mateana te Zihova, “Mu luli la koa ri na tie, ba mamu zamani mo sapu gua tozi nigo Rau pude zamani,” ke luli la i mo Belami sari na koimata te Balaki, sa baṉara pa Moabi.

36 Sipu avoso nia e Balaki sapu ele korapa mae se Belami gua, si ene la tutuvia sa si asa koasa vasileana lavata sapu ta pozae Ara tata koasa voloso pa ovuku Anoni, pa hukihukirina sa nana kali popoa pa Moabi. 37 Zama la koa sa se Balaki, “Na vegua ke lopu tuturei mae si goi pa totoso kekenu sipu tioko atu igo rau pude mae. Balabala ia goi sapu lopu kaqu boka pia valeanigo rau, gua si goi?”

38 Olaṉa se Belami, “Ele mae si rau kamahire. Ba lopu kaqu boka zama nia rau si keketoṉa, ba gua mo sapu tozi nau sa Tamasa si boka zama vura nia rau,” gua si asa. 39 Ke luli la koe Balaki meke la koasa vasileana nomana pa Huzoti se Belami. 40 Meke va vukivukihi bulumakao na sipi se Balaki, meke valani sa si kaiqa koe Belami meke sari na koimata saripu koa koasa.

41 Pa koivugona si turaṉa sage la nia Balaki se Belami pa Bamoti Beolo meke vasina si boka doṉo gore la ia sa sa kukuruna sa vasina sapu koa ia rina tinoni Izireli.