2
Sa Hinoqa te Ninive
1 Na puku qeto minate si kamo pude raza igo si agoi, Ninive.
Turu lavelave nia sa goba,
kopu nia sa siraṉa,
va nama gamu,
tioko varigarani sari tie varipera!
2 Kote vala pule nia e Zihova sa tinolava te Zekopi
gugua sa tinolava te Izireli,
be vea huara guni nia ari tie huhuara
meke vea ṉovala guni ni rini sari inuma vaeni.
3 Sari lave tadi na tie varipera tadina kana si ziṉara;
meke sari varane si poko ziṉara.
Sari aeana koari totopili varipera si malakapi
koasa rane sapu tava nama si arini;
sari hopere sapu huda paeni si ta avaṉa va nama.
4 Sari totopili varipera si haqala nuquru koari na siraṉa,
rerege la, mae, gua, koari na varivarigarana.
Doṉo guana zuke huruṉudi;
rizu tuturei guana kapi.
5 Tioko vagi rina palabatu varipera tadi na kana sari dia qeto tie varipera ta vizatadi,
gua, ba tubarae ni tu pa dia inene la.
Bebeno la si arini koasa gobana sa vasileana;
kuria rini sa lave nomana pude hukati sari patu pu ta gona ni rini.
6 Sari sasada pa kali ovuku si tukele va hodaka
meke hoqa mo sa vetu baṉara.
7 Ta tozi mo sapu sa vasileana lavata
si kote ta raovo taloa.
Sari nana pinausu vineki si kunikunisi guana kukuva
meke sekei ri raqaraqa dia pa tinalotaṉa.
8 Sa Ninive si guana kopi,
meke sari kolona si vura taloa.
“Noso! Noso!” kukili gua si arini,
ba loke tie si kekere pule.
9 Saputu vagi sari na siliva!
Saputu vagi sari na qolo!
Sa tinagotago si loke vina betona,
sari tinago arilaedi koari doduru nana vasidi!
10 Ninive si ta saputu taloa, ta hiko, ta teuru palae!
Ta duaṉa sari bulo meke neneqara sari tuṉutuṉu,
neneqara sari tini meke sari isumatadia si hobe, na matagutu va hola.
11 Avei kamahire se Ninive sa bae tadina laione,
sa vasina sapu poni ginani rini sari dia koburu,
vasina la sari laione kokoreo meke laione mamaqota,
meke sari tuna laione, meke loke dia minatagutu?
12 Va mate poni sa laione sari tuna laione
meke garata palekia sa si tanisa tinadia,
sa nana vasina si va siṉi nia sa koari gana ginani,
meke sa nana bae si tale kurukuru matedi mo koa ia.
13 Zama vura guahe se Zihova Tadi na Qeto Minate,
“Arau kana igo si agoi.
Kote sulu pani Rau sari mua totopili varipera,
meke sa vedara kote va mate pani sari mua tie vaqura.
Kote vagi pani Rau sari doduru vinagi pu vagini goi koari na mua kana.
Sari mamalaiṉidi ri mua tie paleke inavoso
si lopu kote ta avoso pule,” zama gua si Asa.