13
Na Belete Lineni
1 Hiera gua si zama nia e Zihova koa rau: “La mamu holua si keke belete lineni, mamu dikuru nia pa kopetemu, ba lopu va tiqu nia pa kolo.” 2 Ke holua rau si keke belete, gua sapu garunu nia e Zihova, meke dikuru nia rau pa kopetequ.
3 Meke vina rua totoso si kamo mae sa zinama te Zihova: 4 “Vagia sa belete sapu holua goi meke sapu korapa va sage ia goi pa kopetemu, mamu la kamahire pa Ovuku Iuparetisi; mamu tomea vasina pa qoqoro patu sa belete.” 5 Ke la si rau pa Iuparetisi meke tomea, gua sapu tozi nau e Zihova.
6 Hola soku rane si zama au e Zihova si rau, “La kamahire pa Iuparetisi; mamu vagia sa belete sapu tozi nigo Arau pude tomea vasina.” 7 Ke la si rau pa Iuparetisi meke geli vagi pule nia sa belete meke vagi pania vasina pu tome nia rau, ba kamahire si popozu tu meke sapu kaleana hokara tu sia.
8 Beto asa si kamo mae sa zinama te Zihova koa rau: 9 “Hiera gua si zama nia e Zihova: ‘Gua tugo asa kote huara guni nia Rau sa vinahesi pule te Ziuda meke sa vinahesi pule lavata te Zerusalema. 10 Sari tie kaleadi arini pu korodia avosi sari Qua zinama, pu luli sari bulo tasunadi tadi kasa meke hata luli sari kaiqa tamasa pude nabulu ni meke vahesi, si kote gua sa belete hie, sapu loke laena hokara!’ 11 Zama vura guahe se Zihova, ‘Gua sa belete sapu ilupae pa kopete tie, si pusi vagi Rau sa doduruna sa butubutu Izireli meke sa doduruna sa butubutu Ziuda, pude na Qua tinoni pu kote vahesi meke va lavata Au meke va ululia sa Pozaqu. Ba lopu hite va avoso mae Au rini.’
Sa Bogu Vaeni
12 Mamu zama la guahe koari kasa: Hiera gua si zama nia e Zihova, sa Tamasa pa Izireli: ‘Doduru bogu vaeni si kaqu siṉi i na vaeni.’ Meke be zama si arini koa goi, ‘Na ta gilanana mo sapu asa, sapu doduru bogu vaeni si kaqu siṉi i na vaeni!’ gua, 13 si mamu tozini si arini sapu, ‘Hiera gua si zama nia e Zihova: Arau kote va siṉi ni vaeni sari doduru pu koa koasa popoa hie, podalae koari na baṉara pu habotu pa habohabotuana baṉara te Devita, sari na hiama, sari poropita meke doduru pu koa pa Zerusalema. 14 Kote vari huara ni Rau, koreo koasa tamana na gua, zama vura gua si Arau Zihova. Lopu kote va malumu ia Rau sa tataru babe tinalotaṉa babe tataru variva taleosae pude hukata Au pude va mate pani.’ ”
Va Balau nia Zeremaea sa Vinahesi Pule
15 Va avoso mamu va taliṉa mae,
mi lopu vahesi puleni gamu,
ura se Zihova si ele zama.
16 Mi ponia sa vina lavata koe Zihova sa mia Tamasa,
sipu lopu ele va mae ia Sa sa hinuporo,
sipu lopu ele ta tubarae sari nenemia
koari na toqere sapu opoadumi.
Korapa doṉo hata ia gamu sa kalalasa,
ba kote iliri la nia Sa pa huporo dudukurumu
meke hobe la nia pa hinuporo nomana.
17 Ba pana lopu va avoso si gamu,
si kote tome si arau meke kabo
koa gua koasa vinahesi pule tamugamu;
kote kabo sisigiti sari mataqu,
kote zoloro vurai na kolomata,
sina sari sipi te Zihova si kote ta raovo taloa.
18 Zama se Zihova, “Zeremaea, mu zama la ia sa baṉara meke sa tinana,
‘Mi gore mae koari na mia habohabotuana baṉara,
ura sari mia toropae baṉara leleadi
si kote hoqa gore pa batumia.’
19 Sari vasileana nomadi pa popoa Neqevi d si kote ta tuku,
meke loke tie si kote boka kamo la koa rini koa gua koari na kana.
Doduru pa Ziuda si kote ta raovo taloa,
ta paleke taloa beto pude koa nabulu pa votiki popoa,” gua se Zihova.
20 Eṉa sagei matamia mamu doṉo la,
sari na kana si korapa mae gua pa kali gede.
Avei sari mia rovana sipi sapu kopu ni gamu,
sari sipi sapu zama va titie ni gamu?
21 Sa kote gua si gamu pana sarini pu baere i gamu,
si arini tugo si vekoi e Zihova pude va kilasa meke baṉara ni gamu?
Vea, lopu kote ta sigiti nia gamu
guana barikaleqe podopodona?
22 Meke pana nanasa puleni gamu,
sapu “Na vegua ke ta evaṉa si hie koa gami?” gua.
Ta evaṉa si asa koa gua koari na mia soku sinea;
gua ke ta sira palae sari mia tivitivi
meke sari tinimia si ta ṉoṉovala.
23 Vegua, boka hobea sa tie Itiopia sa kapuna
babe sa leopadi koasa kidakida pa tinina?
Ke lopu kote boka tavete va leana tugo si gamu
pu ele manavasa tavete va kaleana.
24 Hiera gua si zama nia e Zihova, “Kote va hurakatae gamu Rau guana duduli popana
sapu palekia na givusu mae guana pa qega.
25 Asa si paqaha poni gamu Rau,
sa mia hinia va toṉotia Rau pude tamugamu,
sina muliṉi Nau gamu si Arau
meke raṉe la koari na tamasa kokohadi.
26 Kote la Rau daku sage lani pa isumata mia sari mia tivitivi
pude ta dogoro sa mia kinurekure,
27 sari mia binarabarata na nenere hata pude ta puta turaṉa gua,
meke sa mia hahanana maqota variva kurekuredi!
Ele dogori Rau sari mia vinahesi beku variva malederedi
koari na toqere na pezara.
Na tinalevei si koa koa goi, Zerusalema!
Vea seunae gua si kote koa boni eko si goi?” zama vura gua se Zihova.