1 Kasa tasiqu koe Karisito; be keke tie koa gamu si tavete va sea; ego, gamu pu ta turaṉa koasa Maqomaqona sa Tamasa si mi va toṉotia si asa; ba mi tavetia si hie pa vina pepekae. Mi kopu puleni gamu, pude mi lopu hoqa pa tinoketoke gua tugo asa si gamu. 2 Mi varitokae ni sari na mia tinasuna, pude gua asa si kaqu tiqe va tabea gamu sa tinarae te Karisito. 3 Be keke tie si balabala pule nia sapu asa si keke tie arilaena, gua; si sekesekei pule nia, meke loke laena si asa. 4 Hopeke tie si mani pitu pule nia pa nana tinavete soti telena; meke be leana sa, si mani qetu nia gua sapu evaṉia sa; ba mani lopu va padapadae pule nia telena koasa keke votiki tie. 5 Ura hopeke gita na tie si mani tupiti nia sa nana tinavete ninabulu soti telena.

6 Asa sapu tava tumatumae si mani toka nia na ponia sa nana titisa koari doduru tiṉitoṉa leadi. 7 Mi lopu balabala sea; lopu boka ta sekesekei sa Tamasa. Gua sapu letea sa tie, si kaqu paketia tugo sa. 8 Asa sapu lelete koasa hiniva kaleana tana sinea pa tini, si kaqu paketia tugo sa sa tinahuara koasa tini; ba asa sapu lelete koasa Maqomaqo Hope, si kaqu vagia tugo sa sa tinoa hola koasa Maqomaqo Hope. 9 Ke mada lopu mabo nia sa tinavete leana; ura be lopu malohoro si gita, si kaqu paketia tugo gita sa vuana pa totoso garona vugo repere. 10 Gua asa, ke doduru totoso pana boka gita, si mada tavete valeana la koari doduru tie; sapu nomana hola si koa rini pu somana koasa nada tatamana te Karisito.

11 Mi dogori kamahire sari na kinubekubere nomadi pu kuberi rau pa limaqu soti. 12 Sarini pu hiva ososoni gamu pude ta magu d, si na tie va titiedi pa tinoa vurana. Tavetia rini sapu gua asa, pude lopu ta ṉoṉovala si arini pa ginuguana sa korosi te Karisito, gua. 13 Ba arini pu ta magudi sara si lopu lulia rini doduruna sa Tinarae te Mosese. Hivani gamu rini pude ta magu si gamu, pude vahesi puleni pa dia zinama koari na tie, sapu lulia gamu sa tinavete minagu tana tini, gua. 14 Ba sapu arau si pa korosi mo tanisa Baṉara Zisu Karisito si boka vahesi pule nau. Ura pa ginuguana mo sa korosi tanisa si lopu va arilaedi i rau sari na ginugua tanisa kasia popoa, meke arau ba loke laequ tugo koasa kasia popoa. 15 Loke vinotikaena si pude ta magu, ba be lopu ta magu si keke tie. Sapu arilaena si pude ta evaṉae na tie sapu toa nia sa tinoa vaqura. 16 Ke koa rini pu lulia sa tinarae toṉoto hie pa dia tinoa, si mani koa koa rini meke koari doduru tie te Tamasa sa binule, na tataru variva taleosae. 17 Ego, mani lopu ṉoṉovala pule au keke tie. Ura paleki rau pa tiniqu sari na kirana e Zisu pu vata dogoro nia sapu arau si na Nana nabulu.

18 Mani koa koa gamu doduru tasiqu sa tataru variharupi tanisa Baṉara Zisu Karisito. Emeni.