SA KINERA KOARI NA KINERAKERA
Sa Vinabakala
Sa Kinera koari na Kinerakera si na vivinei sapu ta kerae meke kera vari olaolaṉa nia rini. Ta vivinei la si asa koari karua tie pa dia totoso varihaba. Sari tie varihaba hire si tava toṉotodi ba lopu vari gilanadi. Ke hiva la sa kinera meke tokani pude lopu vari kurekurei, pude vari hivae meke vari tatarue podalae koasa vinarihaba. Ke na hahanana babaere si kera vari olaolaṉa nia rini, gua ke ta tozi la koari karua sari tinidia.
Ta kera pilipule tugo sa vina balau sapu pude lopu bebeno sari vineki na koreo pude vari koa turaṉi ba pude aqa va ṉoṉo nia sa totoso, sa totoso varihaba.
Sari puku tie kera si sa koreo, sa vineki, sari barikaleqe pa Zerusalema, sari tasina koreo sa vineki, meke sa tie kopu vasileana. Arini pu lopu somana kera ba ta poza koasa vivinei si sa tinana meke sa tamana sa vineki, ari vineki vaqura pa Zerusalema meke sa baṉara pa vasileana. Kaiqa tie balabala ia sapu ta kerae si hie pa totoso varihaba se Solomone.
Sari na kinera gugua hire si hoke ta kerae pa totoso varihaba meke na dia hahanana ari na butubutu pa Izireli si hie, gua tugo sari soku butubutu pa vari likohaena sa.
Sari Ṉati Pinaqapaqahana sa Buka
Kinera kekenu. Hinia 1:1-23
Kinera vina rua. Hinia 2:8 kamo hinia 3:5
Kinera vina ṉeta. Hinia 3:6 kamo hinia 5:1
Kinera vina made. Hinia 5:2 kamo hinia 6:3
Kinera vina lima. Hinia 6:4 kamo hinia 8:4
Kinera vina onomo. Hinia 8:5-14
1
Sa Kinera Kekenu
1 Sa Kinera te Solomone sapu leleana hola koari na kinerakera.* 1 Baṉ 4:32
Sa Vineki
2 Mani aho au sa si arau, sari beruna madi aho au,
ura sa mua tataru si lomoso hola nia sa vaeni.
3 Sa humaṉa lea sapu dalo nia goi si lomoso;
sa pozamu si guana lumu humaṉa lea sapu ta zoropaena.
Garo gua ke roro igo rina vineki vaqura si agoi!
4 Mae mamu turaṉa taloa nau; aria mada tuturei!
Mani turaṉa nuquru nau sa baṉara koari nana lose.
Sari Barikaleqe pa Zerusalema
Qetu hola nigo gami si goi.
Meke qetu nia gami sa mua tataru hola nia sa vaeni.
Sa Vineki
Zoṉa gua ke roro igo rina barikaleqe si agoi!
5 Gamu na vineki pa Zerusalema,
muho si rau, ba na leleaqu,
sapu muho gua rina ipi mumuhodi tadi na tie pa Kedara,
ba leleana gua rina poko pu sigoto pa Zelepade te Solomone.
6 Mu lopu doṉo toto au sina muho si rau,
ura na rimata au ke muho.
Bugoro nau ri kasa tasiqu koreo,
meke va tavetave au rini pa inuma vaeni,
ke sa qua inuma vaeni si lopu boka va tana valeania rau.
7 Tozi nau, agoi pu roro igo rau, pae korapa turaṉa lani goi sari mua sipi?
Pavei kote va aqori goi sari mua sipi koasa rimata korapa rane hie?
Na vegua ke kote va paere ia tu rau sa isumataqu
koari na mua baere meke sari dia sipi?
Sa Koreo
8 Agoi pu tolavaemu hola koari na barikaleqe, be lopu gilania goi sa vasina,
si mamu luli sari na pou nenedi rina sipi,
mamu va hena ni duduli sari mua qoti
pa kali ipi tadi na sepati.
9 Qua babaere, guana hose mamaqota koari na hose kokoreo tadi na totopili varipera te Pero, guni nigo rau.
10 Sari paparamu si doṉo lea, sapu tava saridi koa rina vikulu,
gua tugo sa ruamu koa rina pakupaku patu ṉedala.
11 Kote tavete ponigo vikulu qolo gami,
meke na pakupaku sapu siliva.
Sa Vineki
12 Sipu korapa eko pa nana teqe sa baṉara,
si kamo la sa tivusuna sa qua lumu humaṉa lea.
13 Sa qua babaere si guana kuru hite, siṉi ia na lumu humaṉa lea,
sapu eko pa vari korapadi rina susuqu.
14 Guana vinarigara havoro humaṉa lea si asa koa rau,
sapu havoro pa korapa inuma vaeni pa Eqedi.
Sa Koreo
15 Kei! Nake tolava hola si agoi, qua babaere!
Na leleamu hola tugo!
Sari matamu si gua rina kukuva.
Sa Vineki
16 Doṉo lea hola si agoi na qua babaere!
Va qetu hola au goi!
Meke sa duduli mo sa nada teqe.
17 Sari na labete pa nada vetu si na huda sida,
meke sari koqana si na huda paeni.