96
Tamasa sa Baṉara Lavata
(1 Koronikolo 16:23-33)
1 Mi kera la nia si keke kinera vaqura koe Zihova,
mi kera la koe Zihova, gamu doduru pa kasia popoa.
2 Mi kera la koe Zihova, mi vahesia!
Mi tozi vura nia hopeke rane sa inavoso leana sapu ele harupu gita Sa si gita.
3 Tozi vura nia koari doduru butubutu sa Nana linavata,
meke sari Nana tinavete marilaedi pu evaṉi Sa.
4 Ura nomana lavata se Zihova meke garona tugo pude tavahesi,
pude pamaṉa nia, hola ni sari na tamasa huporodi.
5 Ura sari doduru tamasa pu vahesi rina votiki butubutu si na beku mo,
ba e Zihova si tavetia sa doduruna sa maṉauru.
6 Sa ṉinedala variva magasana si koa koa Sa,
sa ṉiniraṉira na tinolava si koa koasa Nana vasina hopena.
7 Mi vahesia se Zihova, gamu na tinoni pa kasia popoa,* Sam 29:1-2
vahesia sa Nana linavata na ṉiniraṉira.
8 Vahesia se Zihova koasa Pozana marilaena,
paleke mae ni pa Nana Zelepade sari na vinariponi.
9 Vahesia se Zihova sa Tamasa Hopena, tolavaena si Asa,
mi koa mala pa kenuna Sa, gamu doduru pa kasia popoa.
10 Mi zama guahe koari doduru butubutu, “E Zihova si na Baṉara!”
Sa kasia popoa si ele ta sokirae va nabu, meke lopu kaqu tava rizu;
kaqu varipitui va toṉoto ni Sa sari na tinoni.
11 Madi koa qetuqetu sari na maṉauru meke na pepeso,
Mani ovaṉa sa lamana, meke sari doduru tiṉitoṉa pu koa vasina.
12 Gamu na pepeso, meke doduru tiṉitoṉa pu koadi vasina, mi qetuqetu.
Madi velavela pa qinetuqetu sari na hudahuda, gua tugo ri na tinoni.
13 Ura na mae varipitui nia e Zihova sa kasia popoa,
meke kaqu varipitu ni Sa sari na tinoni pa korapa tinoṉoto,
meke lopu kaqu toka kale si Asa.