48
Sa Tamasa Baṉara nia sa Vugo Repere
1 Ego, avoso mae gamu na tutina e Zekopi,
gamu pu ta tioko pa pozana e Izireli
meke mae gua pa tuti te Ziuda,
gamu pu hoke tokotokoro pa pozana e Zihova
meke hoke poza ia sa Tamasa pa Izireli,
ba lopu pa hinokara babe pa tinoṉoto.
2 Avoso mae gamu pu poza puleni gamu na tiena sa vasileana hopena,
meke kalavarae koasa Tamasa pa Izireli,
e Zihova Tadi na Qeto Minate, asa sa Pozana Sa.
3 Zama vura guahe se Zihova, “Pukerane tu koroto veko ni Rau sari ginugua pu kote ta evaṉa,
sa ṉuzuqu tozi vura ni meke Arau vata gilana ni sari tie;
meke tavetavete si Rau, meke va gorevura i si arini.
4 Ura gilania Qua sapu na tie tasuna mia si gamu,
sari ruamia si heheda guana aeana,
meke sari raemia si guana boronizi.
5 Gua asa ke tozini gamu Rau si hire pukerane la tu,
sipu lopu ele ta evaṉa rini si tozi va kenue ni gamu Arau
pude lopu kote boka zama guahe si gamu,
‘Qua beku taveti si hire;
qua kineha huda meke tamasa aeana na va evaṉi,’ gua.
6 Gamu ele avoso ni si hire; mi doṉo la i.
Lopu kaqu helahelae nia tu gamu sia, sapu hinokaradi sari kinorokorotae pu ele zama vurani Rau pukerane?
Podalae kamahire si kote Maqu tozini gamu sari tiṉitoṉa vaquradi,
sari tiṉitoṉa ta tomedi meke lopu ta gilana koa gamu.
7 Vaquradi si arini, meke lopu tiṉitoṉa pukeranedi;
lopu ele avoso ni gamu, tiqe ṉinoroi mo.
Ke lopu boka zama si gamu,
‘Uve, tumae ni gami,’ gua.
8 Lopu ele avoso ni gamu meke lopu ele gilani;
pukerane tu lopu tukele sari taliṉa mia.
Ura tumae nia Qua sapu na tie sekesekei mia si gamu;
na podo mae gua mia tu sapu na tie va karikari mia.
9 Koasa laena sa Pozaqu Arau telequ si va sasanae si Rau koasa Qua tinaṉaziri;
koasa laena sa vinahesiqu Rau si tuqe pule ia Rau si asa koa gamu,
pude lopu va mate pani gamu.
10 Doṉo la, ele va via gamu Rau, ba lopu via sigiti guana siliva sapu via hola pa nika;
ele podeke gamu Rau koasa nika halalana tana tinasigiti.
11 Pa laequ tugo Arau, si tavetia Rau si hie.
Vea, kaqu va malumu pule Nau tu si Arau pude ta zama va kaleana?
Arau lopu kaqu va malumu la nia sa vinahesiqu pa keke tie babe pa beku.
Vizatia Zihova se Saerasi
12 Kei Zekopi, avoso mae koa Rau,
Izireli pu tioko igo Arau:
Arau si Asa;
Arau mo sa kekenu meke Arau sa mumudi.* Ais 44:6; Rev 1:17, 22:13
13 Pa Limaqu telequ si kuria Rau sa popoa pepeso pa pinodalaena pukerane,
meke pa Lima mataoqu si repahia Rau sa maṉauru;
totoso tiokia Rau sa maṉauru meke sa pepeso si va tabe tugo sari karua.
14 Mae varigara, gamu doduru, mamu va avoso:
Na beku savana ele tozi vata kenue i sari tiṉitoṉa hire?
Arau Zihova ele vizatia sa Qua tie
pude tavetia sa Qua hiniva koasa popoa Babiloni;
sa Lima mataoqu si kote raza la koari pa Babiloni.
15 Arau, sapu Arau mo hie, si zama;
uve Arau ele tiokia si asa.
Arau kote turaṉia si asa,
meke kote bokaboka si asa koasa tinavete pu ta garunu nia sa.
16 Tata mae koa Rau pude mi avosia si hie:
Podalae pa pinodalaena si lopu zama golomo si Arau;
meke totoso ta evaṉa si asa, si Arau si koa Qua vasina,” gua se Zihova.
Meke kamahire si garunu au e Zihova sa Baṉara meke sa Maqomaqona.
Sa Hiniva te Zihova Koari Nana Tinoni
17 Hiera gua si zama nia e Zihova,
sa mia Hinarupu, si Asa pu Hopena pa Izireli:
“Arau se Zihova sa mia Tamasa,
pu va tumatumaeni gamu koasa sapu leana koa gamu,
pu totolini gamu koasa siraṉa sapu kaqu enea gamu.
18 Be guana avosi gamu sari Qua zinama,
si kote guana ovuku sa mia binule,
sa mia tinoṉoto si kote guana bogusu pa lamana.
19 Sari tutimia si kote guana onone pa masa,
sari mia koburu si kote guana onone sapu lopu boka ta nae;
Sari pozadia si lopu kote ta kumata palae
babe ta huara taloa pa kenuqu Arau.”
20 Mi taluarae pa Babiloni,
mi govete taloa mia koari tie Babiloni!
Kukili vura nia si hie pa qinetuqetu,
mamu zama vura nia.
Garunu vura la nia koari pa vinabetona sa popoa pepeso;
mi zama guahe, “Se Zihova ele harupia sa Nana nabulu se Zekopi,” mi gua.
21 Lopu hite memeha si arini totoso turaṉi Sa pa soloso qega;
na kolo si va vura poni Sa pa patu;
viqalia Sa sa patu
meke zoropo vura sa kolo.
22 Zama vura se Zihova, “Loke binule si koa tadi na tie kaleadi,” gua.* Ais 57:21