9
1 ba sa totoso huporo meke talotaṉa si lopu kaqu koa hola.
Sa Baṉara sapu Korapa Mae
Pukerane si va kurekure i Tamasa sari butubutu Zeboloni meke Napitalai, ba koari na rane vugo repere si kote va lavatia Sa sa popoa Qaleli tadi na tie Zenitailo d. Sa popoa sapu koa ia sa siraṉa mae gua koasa kolo Meditareniani karovo la pa kali Ovuku Zodani.* Mt 4:15
2 Saripu ene pa hinuporo* Mt 4:16; Lk 1:79
si dogoria si keke kalalasa nomana;
sarini pa popoa hupohuporona vasina tata sa minate
si pelara vura i na kalalasa.
3 Agoi va noma ia sa butubutu Izireli
meke hoda ia Agoi sa dia qinetuqetu;
qetuqetu si arini pa Kenumu
qetu gua ari tie totoso pakepakete pa inuma,
qetu gua ari na varane totoso vari hia ni ri sari vinagi pa mudi vinaripera.
4 Gua sapu tavetia Goi koasa totoso va kilasia Goi sa qeto minate tadi pa Midiani,
si huara pania Goi sa ioki d sapu ta mamata nia arini,
sa huda sapu pilivarata pa avaradi,
meke sa kolu sekesekeana tanisa tie ṉoṉovala.
5 Sari buti tadi na varane sapu ene lani rini pa vinaripera,
meke sari doduru dia poko sapu tale eharadi
si kaqu ta sulu palae,
kaqu ta sutuṉu la pa nika.
6 Ura, koa gita si podo si keke koburu,
keke koburu koreo si ta poni koa gita!
Meke sa qinavuna si kote koa pa avarana Sa,
meke kaqu ta pozae,
Tie Varitokae Valeana pa Binalabala, Tamasa Heheda,
Tamada Koa Hola, Koburu Tavia tana Binule.
7 Sa tinoqolona sa Nana qinavuna meke sa Nana binule si loke kokoina.* Lk 1:32-33
Kaqu koa baṉara si Asa pa habohabotuana baṉara te Devita
meke koasa nana binaṉara,
kaqu kuria Sa meke zuka ia Sa pa ṉinoṉo meke tinoṉoto
podalae pa totoso asa meke kamoa na kamoa.
Sa hiniva ṉiṉirana te Zihova Tadi na Qeto Minate
kote va gorevura ia si asa.
Kote Va Kilasia e Zihova sa Binaṉara Izireli
8 E Zihova si zama vura la koe Zekopi;
sa vinilasa hie tanisa si hoqa la koa sa popoa Izireli.
9 Doduru tie Izireli kote tumae nia,
sa butubutu Iparemi meke arini pu koa pa Sameria,
arini pu vahesi puleni meke doṉo gore tie
si zama,
10 “Sari biriki si ele hoqa gore,
ba kote kurikuri pule si gami koari na patu ta peqodi;
sari huda piqi si ele ta maho beto,
ba kote hobeni huda sida gami.”
11 Ba ele la e Zihova meke turaṉi sari kana te Rezini pude la rapata pa Izireli,
meke garunu nono lani Sa sari doduru kana te Izireli koa rini.
12 Ari pa Siria pa kali gasa rimata meke ari pa Pilisitia pa kali lodu rimata,
si ele va puzulu pania sa popoa Izireli;
gua ba sa tinaṉaziri te Zihova si lopu rizu taloa,
sa Limana si ovulu sage eko mo, nama pude seke.
13 Ba sari tie pa Izireli si lopu kekere pule la koa Sa pu va kilasadi,
meke lopu hata ia tugo rini se Zihova Tadi na Qeto Minate.
14 Ke kote la e Zihova meke seke kumatia koe Izireli sa batuna meke sa pikutuna,
sari na kava ṉohara meke sa kuli pa kolo, pa keke rane mo;
15 Sa batu si ari kasa palabatu na koimata,
meke sa pikutu si ari na poropita sapu hoke kokoha pa dia zinama.
16 Sarini pu totoli ni sari tie hire si turaṉa va sea i,
meke sarini pu ta totoli si ta turaṉa va seu.
17 Gua asa ke e Zihova si lopu kaqu qetu ni sari tie vaqura,
meke lopu kaqu tataru ni Sa sari pu eapa na naboko,
sina doduru si lopu gilania sa Tamasa meke kaleadi beto si arini,
tale zinama bonidi si tozi rini pa ṉuzudia;
gua ba, sa tinaṉaziri te Zihova si lopu rizu taloa,
sa Limana si ovulu sage eko mo, nama pude seke.
18 Hinokara huruṉu gua tugo na nika sa kinaleana;
gani sa sari na hiqohiqo rakihi,
sulu pania sa sa hiqohiqo pa soloso,
meke sa tuṉahana sa si ale va toketokele sage.
19 Koasa tinaṉaziri te Zihova Tadi na Qeto Minate,
si sa popoa si kaqu ta sulu,
meke sari tie mo si na hudana sa nika;
meke loke tie kote toka nia sa tasina.
20 Kote raza ia rini sa turaṉa dia pa kali matao,
ba kote korapa ovia tugo;
kote vagi koasa turaṉadia pa kali gede,
ba kote lopu deṉa tugo.
Sari tudia soti ba kote kamo henai mo rini!
21 Sari tie pa Manase kote henai sari pa Iparemi,
ari pa Iparemi kote henai sari pa Manase;
meke kote taliri sari karua meke raza ia si pa Ziuda;
gua ba, sa tinaṉaziri te Zihova si lopu hite rizu taloa,
sa Limana si ovulu sage eko mo, nama pude seke.