1 Zama se Zihova koa rau, “La mamu va dogoro pule nia sa mua tataru koasa mua barikaleqe, be vea ta tatarue gua si asa pa votiki tie meke na barikaleqe barabaratana gua. Tataru nia gua sapu tataru guni nia e Zihova si pa Izireli, be vea vahesi guni ni arini sari votiki tamasa meke variponi lani sari resini vua qurepi koa rini, gua si arini.”

2 Ke holu vagi pule nia rau si asa pa manege lima poata siliva meke keke gogoto lima ṉavulu puta kilo mamatana sa kiko bale. 3 Meke tozi nia rau si asa, “Soku rane si kote koa turaṉau agoi si arau; lopu kaqu na maqota si agoi babe puta turaṉa ia agoi si keke tie, na arau kote koa turaṉigo si agoi.” 4 Ura soku rane si kote koa loke dia baṉara sari pa Izireli; kote loke dia koimata, loke vinukivukihi, babe na vina tigono hopedi pude tana vahesi, loke poko hopedi babe beku pude vakuvakutae la koari tomate. 5 Mudina asa si kote pule mae sari tie Izireli meke hata ia se Zihova sa dia Tamasa meke se Devita sa dia baṉara. Kote neneqaradi meke mae koe Zihova meke mae koari Nana minana koari na rane mumudi.