1 Tavetia e Zekisi sa baṉara si keke tinabara takisi pa doduruna sa nana binaṉara kamo tu koari na raratana pa popoa seu gua. 2 Doduru nana tinavete arilaedi pu vata dogoro nia sa nana ṉiniraṉira sapu taveti sa, meke sari na vivinei gugua meke poni nia tuturuana sa se Modekae si ele ta kubere gore beto koari na buka vivinei tadi na baṉara pa Pesia meke pa Media. 3 Modekae sa tie Ziu si na tie vina rua pa binaṉara tanisa baṉara. Ta pamaṉaena si asa meke na ṉati hiniva tugo koari na tie Ziu. Tavetavete poni sa sari na nana tie soti pa tinavete leadi, pa kinopudi rini.