1 Pa mudina sapu turu va nabu sa binaṉara te Rehoboami, si luara pania sa meke sari kasa nana tie sa tinarae te Zihova. 2 Gua asa ke pa korapana sa vina lima vuaheni sapu koa baṉara se Rehoboami, si la e Sisaka, sa baṉara pa Izipi meke rapatia sa popoa Zerusalema. 3 Sa qeto minate te Sisaka si ka keke tina karua gogoto totopili varipera meke onomo ṉavulu puta tina tie koi pa hose, meke kobi tie varipera, saripu soku hola ke lopu boka ta nae, somanae sari pu mae guadi pa Libia, pa Sukaiti, meke pa Itiopia. 4 La zau vagi sa sari na vasileana lavata ta gobadi pa Ziuda meke kamo latu pa Zerusalema.

5 La se Semaea sa poropita koe baṉara Rehoboami, meke koari na koimata pa Ziuda, saripu ele varigara pa Zerusalema sina matagutu nia rini se Sisaka, meke zama si asa koa rini, “Hie si zama nia e Zihova koa gamu, ‘Gamu si ele luara pani Au, ke kamahire si luara lani gamu Rau koe Sisaka.’ ”

6 Helahelae sa baṉara meke sari na koimata sapu ele sea si arini meke zama, “Toṉoto nana sapu tavetia e Zihova.”

7 Sipu dogoria Zihova sapu gua asa, si zama pulea Sa se Semaea, “Sina helahelae ni gamu sari na mia sinea, ke lopu kaqu ta huara beto taloa si gamu, ba kote harupu hite gamu Arau. Sa doduruna sa Qua tinaṉaziri si lopu kote va nonoga ia ari pa Zerusalema. 8 Ba kaqu na nabulu te Sisaka si gamu, pude gilania gamu sa vinotikaena koasa linuliqu Arau meke linulidi ri na binaṉara pa kasia popoa.”

9 Kamo mae pa Zerusalema se Sisaka, sa baṉara pa Izipi, meke paleke taloa ni sa sari na tinagotago arilaedi pa korapa Zelepade te Zihova meke koasa vetu baṉara. Vagi betoi sa sari doduru likakalae arilaedi meke sari na lave qolo tugo saripu taveti e Solomone, sa baṉara. * 1 Baṉ 10:16-17; 2 Koron 9:15-16 10 Ke tavete lave boronizi sa baṉara Rehoboami pude hobe ni sapu arini, meke va kopu ni sa koari na ṉati palabatu tadi na tie kopu, saripu kopu ni sari na sasada barana sa vetu lavata tanisa baṉara. 11 Pana la sa baṉara koasa Zelepade te Zihova si hoke paleki ri na tie kopu sari na lave meke mumudi si kote la veko pule lani rini koasa lose tadi na tie kopu. 12 Sina va pepekae pule nia se Rehoboami, ke sa tinaṉaziri te Zihova si rizu koasa ke lopu tava mate si asa. Meke leana tu sa tinoa pa Ziuda.

13 Koa baṉara pa Zerusalema se Rehoboami meke ṉiṉira nono latu sa binaṉara tanisa. Turu baṉara si asa totoso made ṉavulu eke vuahenina, meke ka manege zuapa vuaheni si koa baṉara si asa pa Zerusalema, sa popoa lavata sapu vizatia e Zihova koari doduru popoa pa Izireli pude vasina si kote ta vahesi si Asa. Sa pozana sa tinana e Rehoboami si e Neama, maena gua pa popoa Amoni. 14 Tavete va sesea tugo si asa sina lopu podekia sa pude lulia sa hiniva te Zihova.

15 Sari tinavete te Rehoboami podalae pa pinodalaena meke kamo pa vina betona sa nana binaṉara, si ta kubere koasa Kinubekubere te Semaea sa Poropita meke sa Kinubekubere te Ido sa Poropita. Ari Rehoboami meke Zeroboami si varipera la dia mo sari karua. 16 Mate se Rehoboami meke magogoso si asa somanae koari na tamana meke ta pomunae koasa vasileana lavata te Devita sa tamana, meke se Abaeza, sa tuna, si hobena si asa koasa binaṉara.