1 Zama se Zihova koe Samuela, “Vea seunae gua si kaqu kuliusu nia goi se Saula? Ele kilu pania Rau si asa pude na baṉara pa Izireli. Ba kamahire mu vagi kaiqa oela tanisa huda olive, mamu la pa Betilihema koa keke tie pozana Zese. Ura ele vizatia Rau si keke ri na tuna pude na baṉara,” gua.

2 Meke zama se Samuela, “Vegua meke kote boka tavetia rau sapu gua sana? Be guana avoso nia Saula sapu gua asa, si kote va mate au sa!” Meke olaṉa gua se Zihova, “Mamu turaṉia keke tuna bulumakao. Mamu zama sapu la vasina si goi pude va vukivukihi la koe Zihova. 3 Mu ruvatia se Zese pa vina vukivukihi, meke kaqu tozi nigo Rau gua sapu kaqu tavetia goi. Kaqu zoropo nia oela goi meke va madia pude na baṉara sa tie sapu kaqu tozi nigo Rau.”

4 Lulia Samuela gua sapu tozi nia Zihova pude tavetia meke la pa Betilihema. Sipu kamo vasina sari na koimata tanisa vasileana lavata si mae tutuvia rini si asa pa minatagutu meke nanasia, “Vegua koa ia na binule sa mua minae, taga?” 5 “Uve,” olaṉa gua si asa. “Mae si rau pude va vukivukihi la koe Zihova. Mi va via puleni gamu, mamu luli au.” Tozi nia tugo sa se Zese meke sari na tuna pude va via pule ni, meke ruvati tugo sa pude somana pa vina vukivukihi.

6 Sipu kamo si arini si dogoria Samuela sa tuna Zese se Eliabi meke zama telena, “Sa tie sapu korapa turu hie pa kenuna Zihova si hinokara, sapu asa mo sa tie sapu ele vizatia Sa.” 7 Ba zama se Zihova koa sa, “Mu lopu doṉo la ia sapu vea gelena gua meke vea tolavaena gua si asa. Namu kilua Rau si asa, ura lopu vizavizata gua sapu vizatia ri na tie si Arau. Sa tie si doṉo mo pa tinoa vurana, ba Arau si doṉo pa bulo tu.”

8 Meke tiokia Zese sa tuna se Abinadabi meke turaṉa la nia sa koe Samuela, ba zama se Samuela, “Lokari, lopu vizatia tugo Zihova si asa.” 9 Ke turaṉa mae nia pule Zese se Sama. Ba “Lokari, lopu vizatia tugo Zihova si asa,” gua se Samuela. 10 Koasa ginugua hie si turaṉa beto maei mo Zese sari ka zuapa tuna koreo koe Samuela. Meke zama se Samuela koasa, “Lokari, lopu vizatia Zihova si keke arini hire.” 11 Meke nanasia sa si asa, “Vegua koa dia pule kaiqa tumu koreo?”

Olaṉa se Zese, “Koanana si keke sapu mudina hokara, ba taloa si asa na korapa kopu sipi.”

“Tozi nia pude mae tani,” gua se Samuela. “Lopu kaqu va vukivukihi si gita pana lopu ele kamo si asa.” 12 Ke garunu tie se Zese meke la hata ia si asa. Keke koreo tolavaena na toa valeanana meke mataqara sa nana dinoṉo. Zama se Zihova koe Samuela, “Hiera tugo si asa! Va madia!” 13 Vagia Samuela sa oela meke zoropo nia sa koe Devita pa kenudi ri na tasina. Meke hinoqa kamo koa sa sa Maqomaqona e Zihova meke koa koa sa podalae tugo pa rane asa. Meke tiqe pule nana pa Rama se Samuela.

14 Sa Maqomaqona e Zihova si ele taluarae koe Saula, meke keke maqomaqo kaleana tu sapu garunu la nia Zihova si ṉovalana sa. 15 Zama sari na nabulu koasa, “Gilania gami sapu keke maqomaqo kaleana sapu garunia Tamasa si koa koa goi sana. 16 Ke poni gami sa ṉiniraṉira, pude mami hata ia si keke tie sapu tumaena mikemike. Meke pana mae koa goi sa maqomaqo kaleana, si kaqu mikemike sa tie sana, meke kote leana pule mo si agoi.”

17 Garuni Saula si arini, “Ego, mu hata mae nia sa tie sapu boka mikemike valeana, mamu turaṉa mae nia koa rau.”

18 Keke ari kasa pu koa si zama, “E Zese sa tie pa vasileana Betilihema, si koa nana keke tuna koreo sapu tumaena mikemike. Na tie varane meke tolavaena si asa; na bokaboka pa vinaripera meke na tie bokana zama tugo. Na koa koa sa se Zihova.”

19 Ke garunu lani Saula sari na tie paleke inavoso pude la zama guahe koe Zese, “Mu garunu mae nia sa tumu koreo se Devita, sapu hoke kopuni sari na sipi,” gua. 20 Ke garunu la nia Zese se Devita koe Saula meke keke qoti vaqura, keke doṉ'ki sapu suraṉa nia bereti rini, meke keke baika kapu kurukuru siṉia na vaeni. 21 Mae se Devita meke podalae tavetia sa nana tinavete. Hiva sisigiti nia Saula si asa meke vizatia sa sapu asa sa tie pude paleki sari nana tiṉitoṉa varipera gua. 22 Meke garunu pule la inavoso koe Zese se Saula, “Hiva hola nia rau se Devita. Va malumia pude mani tavetavete toka nau mo tani.” 23 Ke koari na totoso, sipu mae kamo tugo sa tomate kaleana sapu garunu mae nia Tamasa koe Saula, si hoke vagia Devita sa nana mike meke mikea sa. Hoke taluarae sa tomate kaleana, meke hoke leana pule se Saula.