1 Basa boe ma, Yesus no ana mana tuka dea nara losa dano Galilea a seriꞌ, rai mamanaꞌ esa nade Gerasa. 2-6 Nai na hapu touꞌ esa nitu ra heke raan losa namulun. Ana leo nai rates ara. Hatu leledon leiꞌ-lei nafeo basa leteꞌ manai naa ra, ana poiraoꞌ, ma kasi-kasi mesan. Ma tututu na ao-ina na, hinaꞌ-hinaꞌ mesan neniꞌ batu. Tehuu baraꞌai na seli. Ta hapu lahenda bisa heke ran fa, leo mae reniꞌ rante besi boe ta ralan fa. Lahenda ra heke lima-ein kose-kose reniꞌ rante besi, tehuu rui naꞌetu rante besi ria, ma helu na tepa besi a neme ei na mai. Baraꞌai na seli losaꞌ ta hapu lahenda esa bisa ena ralan boeꞌ.

Yesus asa onda reme ofa lain mai de molo ei nara nai madaꞌ lain, boe ma lahenda kamulus ria teo nita si reme doo a mai so. Basa de ana kalua neme rates sira, mai, de nalai leo Yesus neu, boe ma sundaꞌ undu laka na neu Yesus mata Na. 7-8 Yesus nita lahenda ria mata-idun leo naꞌ, boe ma nae, “We! Nitu makaresiꞌ! O kalua memeꞌ lahenda ia mai leo!”

Boe ma, lahenda ria kasi namberaina nae, “He! O nau tao au leo beaꞌ! Au bubuluꞌ O ia, nana tebe Yesus, Manetualain Manakuasa a Anan. Au hule fo O bosoꞌ ese-rumu au, o!”

9 Boe ma Yesus natane ni nae, “O nade bea?”

Lahenda ria nataa nae, “Au nade Legion, huu fo ami ia nana dodouꞌ naan seli, nonooꞌ leo soldadu batalyon dodouꞌ.”

10 Nitu ra pake lahenda ria fo hule Yesus bosoꞌ nadenu si kalua remeꞌ nusaꞌ ria mai.

11 Ta dooꞌ a neme naꞌ mai hapu lahenda hida ranea bafi roka esa. Bafi sira bate rifun dua nuun. Ara totofi saka nanaaꞌ nai leteꞌ a suuꞌ na. 12 Boe ma nitu sira hule Yesus rae, “Madenu ami fo masoꞌ leo bafi sira daleꞌ meu.”

13 Yesus namanene leoꞌ na, boe ma nataa. Boe ma nitu sira kalua reme lahenda ria mai de leo bafi ra daleꞌ reu. Bafi rifu kaduaꞌ sira ralai ratotofaꞌ onda tuka leteꞌ a suu na leo dano daleꞌ reu, boe ma ara bolo de mate laesaꞌ asa.

14 Lahenda manea bafi ra rita leoꞌ na, boe ma ara bii mamateꞌ. Basa de ara ralai reu rafada basa lahenda rai koro maneneaꞌ sira. Boe ma lahenda dodouꞌ kalua mai fo nau reu rita hata manadadi ubeaꞌ ria. 15 Ara mai raneta roo Yesus, ara rita lahenda nitu hekeꞌ ria natuuꞌ nai na boe. Duduꞌa-aꞌafin malole a so, ma ana pake bua-loas so. Lahenda sira rita leoꞌ na, boe ma basa si bii, nana huu ara bubuluꞌ bea riꞌ bisa usi heni nitu dodouꞌ remeꞌ lahenda ria mai, sona memaꞌ ria lahenda kahereꞌ. 16 Boe ma basa si rafafada aoꞌ rae, ara rita mataꞌ lahenda kamulus ria malole na aon so, ma bafi sira bolo de mate basa si so. 17 Boe ma lahenda koro isiꞌ ara mai hule Yesus fo foa ela sira mamana na.

18 Tepoꞌ fo Yesus sakaꞌ ae leo ofaꞌ lain neu, boe ma bisinaꞌ a lahenda nitu hekeꞌ a mai hule neuꞌ Ana fo ria nau tuka boe.

19 Tehuu Yesus ta nau fa. Ana nafada nae, “Malole lenaꞌ o fali fo mafada katemaꞌ kileoboboki mara, hata fo Manetualain tao ni soa neuꞌ o so a. Ma mafada mae Manetualain sue na o seliꞌ.”

20 Basa boe ma, lahenda ria fali de neu nafeo basa nusaꞌ esa ma kota sanahulu fo riꞌ biasa rae, ‘Dekapolis’. Ana tui hata fo Yesus tao ni soa neuꞌ ana. Basa lahenda fo ramanene tutui ni ria, ara heran mamateꞌ rae, “Memaꞌ tebe, o!”

21 Basa boe ma Yesus asa saꞌe ofaꞌ fali leo dano a seriꞌ reu. Faiꞌ fo ara onda reme ofaꞌ lain mai, lahenda dodou-inaꞌ mai eo raa Ni. 22 Nai na boe hapu lahenda esa nade Yairus. Ria nana malaka uma mamasoꞌ nai kota ria. Ana bei nita Yesus, boe ma ana sundaꞌ undu laka na neu mata Na 23 de ana hule nae, “Papa, é! Au anafeto ana ka besaꞌ ko teu ni sanahulu dua, namahedi noi mamaten. Papa tulu-fali fo mai puli maan dei.”* Sasura Makamoiꞌ dedea Yunani manaduiꞌ nae, “Papa tulu-fali fo fo mai fua lima ma neuꞌ ana, ela leoꞌ bea na teꞌe na aon, boe ma nasoda.” Nai naa, “hule fua lima na” sosoa na nae, “puli maan dei”. Anafeto anaꞌ ria teu na, dedea Yunani manaduiꞌ nai lalane ka 42.

24 Boe ma Yesus tuka leo Yairus uma na neu.

Tehuu ara mulai laꞌo, lahenda dodouꞌ tuka Ni, losaꞌ ara raseti ao neme po ii ma po ona Na mai.

25 Nai lahenda kadodouꞌ ina sira talada, hapu inaꞌ esa namahedi ina na ta teꞌe matetuꞌ fa teuꞌ sanahulu dua so. 26 Ana nabasa doi-talin ma hata-heton fo bae doter ara. Tehuu ta hapu esa bisa puli nan boeꞌ, hedi ni ria foe naroo. 27-29 Inaꞌ ria namanene dodouꞌ laꞌeneuꞌ Yesus so. De, ana naseseti nai lahenda kadodouꞌ sira talada, fo nau naneneaꞌ nesiꞌ Yesus dea Na. Ana afi nai dale na nae, “Sadi au oi laꞌe badu Na boe oo, au muste teꞌe a ao ka.”

Faiꞌ fo ana oi laꞌe Yesus badu Na, boe ma kekeneu te hedi na teꞌe tutiꞌ a. Ana nameda naan malole a matetuꞌ so. 30 Naraa no besaꞌria boe, Yesus nameda nan hapu baraꞌai kalua neme ao Na daleꞌ mai. Boe ma Ana lipe dea Na de mete lahenda kadodouꞌ sira. Basa de Ana natane nae, “Emi bea riꞌ oi laꞌe Au badu ka, é?”

31 Ana mana tuka dea nara rataa rae, “Papa ka mete aom leo. Lehenda desi-desi basa ia raseseti ao na. Papa matane mae, ‘Bea riꞌ oi laꞌe Au badu ka?’ ”

32 Tehuu Yesus mete naleleiꞌ, fo nau bubuluꞌ bea riꞌ bisi naꞌ a oi laꞌe Ni. 33 Inaꞌ ria namanene Yesus natane nae leoꞌ na, boe ma ana bii mamateꞌ. Basa de ana sunda undu laka na neuꞌ Yesus mata Na de manaku basa-basan nae, “Papa! Au riꞌ oi laꞌe Papa badu ma.”

34 Yesus nataa ni nae, “Huu no mama mamahere tebe-tebe neuꞌ Au, de mama teꞌe ma aom so. Besaꞌ ia, mama fali no namahoꞌo leo.”

35 Yesus bei dea-dea nae leoꞌ na, te hapu lahenda esa neme Yairus uma na mai, de nafada nae, “Kasian, anafeto anaꞌ a maten so. De bosoꞌ tao masosota Papa Mesen, fo bosoꞌ neu bali.”

36 Tehuu Yesus ta tao daleꞌ neu lahenda ria dedea na fa. De, Ana nafada Yairus nae, “Bosoꞌ o bii, e! Mamahere neuꞌ Manetualain.” 37 Boe ma Yesus laꞌo ela ana mana tuka dea feke nara. Tehuu no Petrus, Yakobis no fadin Yohanis, fo laꞌo raroo. 38 Faiꞌ fo ara losa Yairus uma na, ara rita lahenda dodouꞌ rapue raan seliꞌ, ma ramanene ruma boreu. 39 Yesus kodi uma daleꞌ neu. Boe ma Ana natane si nae, “Ubeaꞌ taon de emi mapue ma boreu leoꞌ ia? Anaꞌ ia ta maten fa. Ana adaꞌ noi suku ria!”

40 Ara ramanene Yesus dedea nae leoꞌ na, boe ma basa si hiꞌa ma ramumulu Ni.

Basa de Ana nadenu basa si deaꞌ reu. Boe ma Ana naloo na anaꞌ ria ina-ama nara, ma ana mana tuka dean telu, de basa si masoꞌ leo kama daleꞌ reu. 41 Yesus tai na anaꞌ ria lima na, basa boe ma Ana pake sira dedea Aram a, de dedea neuꞌ anaꞌ a nae, “Talita kum!” (Sosoa na nae, “Anafeto anaꞌ! Foa leo!”)

42-43 Kekeneu te, anafeto anaꞌ ria foa de mulai lalaꞌo. Boe ma Yesus nadenu anaꞌ a mama na nae, “Fee ni naa leo!”

Basa lahenda fo rita hata mandadiꞌ ria, boe ma roi ramakokoaꞌ a. Tehuu Yesus horo si nae, “Emi bosoꞌ mafada lahenda esa boe mae, Au fee ni nasoda seluꞌ so!”