1-2 Sara maten neuꞌ teu ni natun esa duahulu hitu. Tepoꞌ fo mate ni a, Abraham asa leo rai koro Kiryat-Arba (riꞌ Hebron), nai dae Kanaꞌan. Abraham boreu, ma ana mete.

3 Basa de Abraham neu dama lahenda Het ara. Ana dedea nae, 4 “Au adaꞌ noi manataiꞌ nai emi basa talada. Au ta anuu dae fo atoi sao ka fa. Maneniko emi nau, sona fee au asa a emi daem bibia anaꞌ esa, ela atoi ni neuꞌ naa.”

5 Ara rataa ni rae, 6 “Leo iaꞌ, papa! Doo-naru basa ia nana, ami tao papa sama leoꞌ lahenda lasiꞌ esa, de ami hadaꞌ ma papa seli. Papa here leo, dae bea riꞌ malole a naan seli, fo raa laꞌe papa hihii-nanaum. Ami sipo-sipoꞌ mesan, ta tipa fa.”

7 Abraham namanene leoꞌ na, boe ma napadeiꞌ, naloe aon fo fee hada-hormata neuꞌ lahenda Het, manuu dae ara. 8 Ana nae, “Maneniko emi sipoꞌ au dedea bisina ka, sona au hule emi fo dedea mo papa Sohar ana manen Efron. 9 Hulen fo maneniko bisa, sona ana seꞌo fee au ria lea na, nade Makpela, fo riꞌ nai oka na suu na. Ana hule beli na bau bea oo, au bae. Au nau bae etu beli na nai emi basa matam, ela dae ria dadi neuꞌ au nuhuu ka. Au nau taon dadi neuꞌ ami mamana roo-ratem.”

10 Faiꞌ ria, Efron natuuꞌ no lahenda Het ara nai na boe. Ana namanene Abraham dedean ria boe. Basa de ana napadei, de nataa neuꞌ Abraham nai basa lasiꞌ ara matan nae, 11 “Bosoꞌ tao leo naꞌ, Papa! Leo iaꞌ dei. Au fee hihiiꞌ okaꞌ ria no lea Makpela neuꞌ papa. Papa matoi sao ma neuꞌ na. Au fee heni dae ria leo papa neu nai au lahenda kara matan. Ela leoꞌ bea na sira basa sakasii!”

12 Basa de Abraham naloe aon seluꞌ neuꞌ lahenda Het ara. 13 Ana dedea no Efron nae, “Leoꞌ na boe malole a, tehuu emi basa nenene au dei. Au nau asa a dae ria, fo atoi lahenda kara reuꞌ na.”

14-15 Efron nataa nae, “Dae ria beli na adaꞌ noi doifulaꞌ natun haa! Huu hata de ita dua taloloe teu-mai no doi kabaianaꞌ sira? Papa muu fo matoi sao ma neuꞌ na leo.”

16 Abraham sipoꞌ na dae ria beli na, tuka Efron nafadan. Ana reke na doifulaꞌ natun haa nai basa lahenda Het ara matan fo ara sakasii. Basa de ana bae doi sira reuꞌ Efron.

17-19 No ria na Abraham hapu Efron dae na, dadi neuꞌ ria nuhuun. Dae fo riꞌ nai Makpela, naneneaꞌ no Mamre (riꞌ Hebron). Ana asa na dae ria no oka-tinen, lea na, ma ai huu nara katemaꞌ. Basa lasi Het ara sakasii, rae dae ria no basa oe isin, nana Abraham nuhuun.

Basa boe ma Abraham natoi Sara neuꞌ leaꞌ ria daleꞌ, nai dae Kanaꞌan. 20 No ria na okaꞌ ria, ma lea na fo maulu na lahenda Het ara daen, besaꞌ ia dadi neuꞌ Abraham nuhuun so, de ana taon dadi neuꞌ mamana roo-rates.