1 Makahulun, hataholi Yahudi la lemba sila heti-heu anggaman belan ana seli. Tehuu hatematak ia, Karistus soꞌu heni belak ndia neme hataholi, fo namahele neu Ndia so. Huu ndia, de hatematak ia ita takamboꞌik so. De, ei boso nana kedi nalak bali nenik heti-heuk ndia, fo sama leo ata ia.

2 Mamanene baa! Au ia Paulus, fo mana kokolak ia. Mete ma ei simbo sunat, fo tungga hataholi Yahudi la heti-heun, na, Karistus mamaten suek tao nakamboꞌik ei ndia, sosoan ta so. 3 Mete ma hataholi ana simbok sunat, na ndia boe oo, musi lemba seluk basa heti-heuk ndia bali. Ei masaneda, do ta? Huu makahulun, au afada memak ei so. 4 Hataholi fo ana nau pake heti-heuk ndia, fo tao Manetualain simbok ndia no malole, na ana naelak dook neme Karistus mai. Huu no leo ndiak, na, ana timba heni Manetualain dale malolen. 5 Tehuu Manetualain Dula Dale Malalaon soi dalak, suek ita tamahele neu Yesus Karistus losa fai babasan. Huu ndia, de ita tahani taa-taa tae, neu ko Manetualain kee-dede nala ita fo nae, ita hataholi ndoos. 6 Ela hataholi ana sunat do ta oo, ndia sosoan ta. Tehuu kasosoak, ndia hataholi namahele neu Karistus ma sue hataholi feꞌe kala.

7 Makahulun, ei masoda tungga dala teteben so. Tehuu hatematak ia, see ndia pepeko nala ei, losak ei ta tungga dalak ndia so bali? 8 Tehuu nanonoli pepekok fo ei mamanenek ndia, ta neme Manetualain mai. Naa te Ndia ndia seseik nala ei so, fo dadik Ndia hataholin. 9 Hata fo lanolik ndia, sososan kada dedeꞌa deꞌek esak. Tehuu doo-doo dei fo nanonolik ndia ana tao nala ei duduꞌam nakalulutuk. Sama leo lalu teik fa, fo seseo kana no hade uu, fo tao loti. Doo-doo, boe ma, lalu teik ma hade uu nana seseok ndia natafuu.✡ 1 Korintus 5:6 10 Huu ita dadik esa to ita Lamatuan Yesus Karistus, huu ndia, de au amahele tebe-tebe, neu ko Ana tao nala ei mamahele masafali hata fo au anolik ndia so. Ma Manetualain mesa kana neu ko huku sudi see fo ana tao nakalulutu ei namahehelem.

11 Leo iak tolanoo nggalei! Mete ma au anoli, ae, hataholi ana musi sunat, na, neu ko au ta hambu doidosok so bali sama leo hatematak ia. Ma hataholi Yahudi la, simbok au nanonoling so, laꞌeneu Yesus mamaten neme ai ngganggek ndia. 12 Tehuu hataholi ndia, fo mana tao nakandaa ei laꞌeneu sunat ndia, elan neme naa, suek mesa kasa leu kee heni basa sila ‘mamaen’!

13 Tolanoo nggalei! Lamatuak nakamboꞌik heni ei, fo ei boso masoda nanambaꞌak mia anggama heti-heun hihii-nanaun. Boso maehetuk ei makamboꞌik so, de masoda tungga ei hihii-nananum! Tehuu teteben, na ei musi masoda masueao, ma ei musi ono-lau esa no esa, sama leo ata ana ono-lau ndia malanggan. 14 Nai Manetualain Susula Malalaon nana sulak, nae, “O musi sue hataholi feꞌek sama leo o sue o ao-ina hehelim.” Mete ma ei tao tungga kada heti-heuk ia esak, na, ei tao tungga hataholi Yahudi heti-heun hihii-nanaun.✡ Malangga Anggama la Heti-heun 19:18 15 Tehuu mete ma esa nalaꞌu ao no esa, do esa nasii ao no esa, na mata neuk leo! Ta dook so bali, ei tao makalulutu ei ao-ina hehelim ndia.

16 Au hihiing leo iak: mete ma ei masoda tungga Manetualain Dula Dale Malalaon hihii-nanaun, na ta tungga hataholi hihii-nanaun so bali. 17 Huu hataholi hihii-nananun, ta nau tungga Dula Dale Malalaok hihii-nanaun. Ma Dula Dale Malalaok hihii-nanaun, ta nau tungga hataholi hihii-nanaun. Huu dua sala lalaba ao! Huu ndia de, ei ta bole kada tao tungga ei hihii-nanaum bali.✡ Roma 7:15-23 18 Tehuu mete ma Manetualain Dula Dale Malalaon nalangga ei, na ei ta nanambaꞌak so bali no heti-heu kala sila.

19 Hataholi fo ana tao tungga hataholi hihii-nanaun ndia, fo natutuduk leo: hataholi ndia hohongge no hataholi fo ndia saon ta ndia, hataholi ndia duduꞌan manggenggeok, tana mae nalelak, 20 songgo nitu do kamodo mamates, lamusu kala, hii nasisimbo bafak, hii dale hedi, hii nahuu, kada nasaneda ao-ina hehelin, nahiik mbau-edo hataholi, nahiik tao husanak, 21 nahiik ana holo, nahiik ninu mafuk, feta makiuk, ma tatao sala feꞌe kala. Makahulun, au afada itak, ae, hataholi fo ana tao tungga dedeꞌa kala sila leo ndiak, na sila ndia ta bisa dadik Manetualain hataholin.

22 Tehuu hataholi fo nasoda tungga Manetualain Dula Dale Malalaon hihii-nanaun ndia, neu ko Dula Dale Malalaok tao ndia dadik hataholi fo nahiik nasueao, naena dale namahokok, nahiik momolek, nggale loak, dale malole no hataholi, nahiik tulu-fali hataholi, na neu ko tao tungga ndia hehelun ndia, 23 malole no basa hataholi, ma nahiik nanea neulalau aok. Ta hambu heti-heuk esa boe, fo kaꞌi dedeꞌa kala ia. 24 Hataholi fo maso dadik neu Yesus Karistus hataholi nala, na ndia ta tungga hataholi hihiin so bali. Huu ndia hihii manggalaun ndia, nana mbakuk noꞌu so, no Yesus nai ai ngganggek. 25 De, mete ma Manetualain Dula Dale Malalaon fee ita soda beuk, na ita musi tao tungga takandoo Ndia hihii-nanaun. 26 Huu ndia de boso ita sangga nana hadak, mahiik laban esa no esa, ma boso madale hedi bali.