1 ¡Guliʼgul-la queëʼ Xanruʼ tu le cubi!

¡Guliʼgul-la queëʼ Xanruʼ, yúguʼtëliʼ zóaliʼ yödzölió!

2 ¡Guliʼgul-la queëʼ Xanruʼ! ¡Guliʼgún zxön lëʼ!

Tu dza tu dza buliʼsiyö́n bönachi didzaʼ dxiʼa ca rusölë́ʼ rëʼu.

3 Buliʼsiyö́n bönachi yúguʼtë yödzö yöl-laʼ ba queëʼ.

Buliʼsiyö́n yúguʼtë bönachi le nácagaca zxön nunëʼ.

4 Zxö́ntërö náquiëʼ Xanruʼ, ateʼ rundaʼ bayúdx cúʼuruʼ-nëʼ yöl-laʼ ba.

Ral-laʼ gádxitëruʼ Lëʼ ca tadxi bönachi izáʼa dios quéguequi.

5 Yuguʼ dios quégaca bönachi izáʼa nácagacasö budóʼ guiö́j budóʼ yaga,

pero Xanruʼ Dios nunëʼ lúzxiba xitsáʼ.

6 Nacuáʼ yöl-laʼ beníʼ, en yöl-laʼ ba lahuëʼ Lëʼ.

Nacuáʼ yöl-laʼ huáca, en yöl-laʼ lachi ga zoa cazëʼ.

7 ¡Guliʼcuʼë Xanruʼ yöl-laʼ ba, bönachi yúguʼtë yödzö!

¡Guliʼcuʼë yöl-laʼ ba, en yöl-laʼ huáca!

8 ¡Guliʼcuʼë Xanruʼ yöl-laʼ ba niʼa que Lëʼ!

¡Guliʼguáʼ le unö́dzjaliʼ, en guliʼdá lahuëʼ!

9 ¡Guliʼgún Lëʼ zxön, náculiʼ le naca baʼa!

¡Guliʼzxizi lahuëʼ, bönachi idútë yödzölió!

10 Guliʼnná lógaca bönachi yúguʼtë yödzö: “Rinná bëʼë Xanruʼ.

Naguixjëʼ tsaz luyú, ateʼ bitiʼ utá cuini.

Ca naca le naca tsahuiʼ uchiʼa usörö́ëʼ quégaca yúguʼtë bönachi.”

11 Ral-laʼ udzeja lúzxiba, en uluʼzíʼ xibé luyú.

Ral-laʼ cö́dxiʼa nísadoʼ, en ilaʼbödxi yúguʼtë le nacuáʼ lu nísadoʼ.

12 Ral-laʼ udzeja guixiʼ caz, en yúguʼtë le nacuáʼ laʼ guixiʼ.

Lu yöl-laʼ rudzeja quéguequi ilúl-la yaga

13 lahuëʼ Xanruʼ, tuʼ siʼ ulë́ʼ.

Guídëʼ duchiʼa dusörö́ëʼ nupa nacuáʼ yödzölió.

Ca naca le naca tsahuiʼ uchiʼa usörö́ëʼ quégaca yúguʼtë bönachi,

encaʼ quégaca bönachi yúguʼtë yödzö para ilunëʼ ca rnna xtídzëʼë.