1 ¡Náquiëʼ Dios Nu run chiʼi rëʼu, en Nu ruzóa rëʼu tsutsu!

¡Zóaticaʼsëʼ gácalenëʼ rëʼu cateʼ bi raca queë́ruʼ!

2 Que lë ni naʼ bitiʼ gádxiruʼ sal-laʼ izxizi idútë yödzölió,

en ilaʼniti yuguʼ guíʼa lu nísadoʼ,

3 en sal-laʼ chasa idxía, en tsuʼu bö nísadoʼ naʼ,

en ilaʼzxizi guíʼadoʼ tuʼ nözi le raca.

4 Zoa tu yegu le run ga tuʼdzeja nupa nacuáʼ ladzëʼ Dios,

ga naʼ röʼö yudoʼ láʼayi ga zoëʼ Dios nayë́pisëtërëʼ.

5 Zoa cazëʼ Dios yödzö naʼ, le catu caz initi.

Cateʼ niʼ soa itö́ yu gácalenëʼ nupa nacuáʼ niʼ.

6 Tadxi taʼdzöbi bönachi yuguʼ yödzö,

ateʼ taʼbö́ʼ baguíʼi nupa taʼnná bëʼ,

tuʼ ruʼë didzaʼ Dios, ateʼ riniti luyú ni.

7 Xanruʼ nayë́pisëtërëʼ zóalen cazëʼ rëʼu.

Dios quégaca zxíʼini xiʼsóëʼ Jacob rapa chiʼë rëʼu.

8 Guliʼdá iléʼeliʼ le nunëʼ Xanruʼ.

Buliʼyú ca nusunítiëʼ luyú ni.

9 Ruzóa dxíëʼ gudil-la rácagaca idútë yödzölió.

Riguitsjëʼ yuguʼ uxitiʼ yaga,

en rusunítiëʼ yuguʼ yaga lahui tuchiʼ que gudil-la.

Ruzéguiʼë yuguʼ carreta que gudil-la tu lu guíʼ zxön.

10 Rnnëʼ: “Guliʼsóa dxisö, ateʼ guéquibeʼeliʼ naca cazaʼ Dios.

Nayë́pisëtëraʼ yuguʼ lu yödzö, en lu idútë yödzölió.”

11 Xanruʼ nayë́pisëtërëʼ zóalen cazëʼ rëʼu.

Dios quégaca zxíʼini xiʼsóëʼ Jacob rapa chiʼë rëʼu.