1 Tata Dios animuchiwanchisapa.

Chikniwakninchi runakunamanta amachawanchisapa.

Llakishpa sufriptinchikuna yanapawanchisapa.

2 Chashna Tata Dios amachawaptinchikuna

allpa chukchukushpa waklliptinpish

mana manchakushunchisapachu.

Urkukuna manllayba kochapi sumiptinkunapish

mana manchakushunchisapachu.

3 Yakukuna olasyashpa kaparikuptinpish

urkukuna chukchukuptinkunapish

mana manchakushunchisapachu.

4 Suk yaku kallpashpa kushichiwanchisapa

Tata Dios chay yakushina yanapawashpanchikuna kushichiwanchisapa.

Kamachiwakninchikuna Tata Dios ñukanchikunapi kawsan.

5 Chashna Tata Dios ñukanchikunapi kawsashpa

sufriptinchikunapish tukuy diya yanapawanchisapa.

6 Chayta kawashpa mana Tata Diosta kasuk runakuna

manchakushpa kaparinkasapa.

Sinchi kamachikukkuna sukwan sukwan makanakushpa kawsansapa.

Tata Dios rimakuptin

tukuy llaktakuna wakllichinakunsapa.

7 Tukuy laya atipak Tata Dios

ñukanchikunawanmi kawsan.

Jakobopa Tata Diosninmi amachawanchisapa.

8 Payka almirana milagrukunatami rurashka.

Shamuychi kawak kay allpapi rurashkanta.

9 Kuchun mañan allpapi kamachikushka

amana makanakunankunapa.

Ñami balistankunata pakishkana.

Makanakunankuna lansankunata

ñami paki pakina rurashka.

Makanakunankuna karrunkunata

ñami rupachishkana.

10 Chayrayku Tata Dios willawanchisapa:

“Kasillayaychi.

Riksiwaychi sinchi kamachikuk Tata Dios kanaynita.

Yachaychi tukuy allpapi tukuy llaktakunata sinchita kamachinaynita.”

11 Tukuy laya atipak Tata Dios

ñukanchikunawanmi kawsan.

Jakobopa Tata Diosninmi amachawanchisapa.