1 Tata Dios lusninishina kashpa

chikniwak runakunamanta salvawan.

Chashna salvawaptin mana ni pita manchanichu.

Tata Dios amachawaptin

mana ni pita manchashachu.

2 Chay chikniwak mana alli rurak runakuna tantanakunsapa

makawashpa wañuchiwanankunapa.

Chashna wañuchiwayta yuyashpankunapish

mana atipansapachu.

3 Chay aypa chikniwak runakuna wañuchiwanayashpa chawpichawaptinkunapish

mana paykunata manchanichu.

Sukaman makawanayaptinkunapish mana turbakunichu.

4 Ñuka Tata Diosta suk imallata mañashkani.

Sukaman munani tukuy diya paypa wasinpi yaykuyta payta kuyanaynipa.

Chaypi sukaman munani kuyawananta yuyayta.

5 Sukaman sufrishpa kawsaptini

Tata Dios amachawashpa yanapawanka.

Chikniwak runakunamanta wasinpi pakawanka.

Manllayba rumi sawanpishina churawanka

ama ni pi wakllichiwananpa.

6 Chashna Tata Dios salvawaptin

atipani chikniwak runakunata kallpachiyta.

Chaypina payta agradesishpayni paypa wasinpi

ofrendakunata kusha kuyanaynipa.

Kushikushpa himnokunata Tata Diosta kantasha.

7 A, Tata Dios,

kanta roygaptini uyariway.

Llakichiwashpa yanapaway.

8 Kikini yuyanakushpa rimani:

“Tata Diosta roygasha yanapawananpa.”

Chayrayku, Tata Dios, roygayki yanapawanaykipa.

9 A, Tata Dios, yanapaway.

Ama piñakushpa karkuwaychu.

Kanlla atipanki salvawayta.

Ama sapallaynita sakiwaychu.

Kanmi kanki salvawak Tatayni Dios.

10 Tatayni mamayni sakiwaptinkunapish

kan, Tata Dios, mana sakiwashpa yanapawanki.

11 A, Tata Dios,

chikniwak runakuna makawanayaptinkuna

yanapaway allita rurashpa alli ñanpi purikshina kawsanaynipa.

12 Chay sakra runakuna llullakushpa chatawansapa

mana alli rurak kanaynita.

Chayrayku ama munaychu munashkankunata rurawanankunapa.

13 Chashna chatawaptinkunapish

ñuka allita yachani tukuy diya

kan, Tata Dios, kuyawashpayki yanapawanaykita.

14 Chayrayku akuychi Tata Dios yanapawananchikunata shuyaypachi.

Valorchinakushpa ama sampayaypachichu.

Ariya, Tata Dios yanapawananchikunata shuyaypachi.